3 September 2018 - Hari Satu ba Minggu Ke Dua Puluh Dua Musim Selama - Berita Iban Online

Header Ads

  • Baru Nyadi

    3 September 2018 - Hari Satu ba Minggu Ke Dua Puluh Dua Musim Selama

    Lebuh Iya datai di Nasaret, alai Iya ke diau kenyau ari mit, Iya mansang ngagai balai gempuru baka selama lebuh hari Sabat. Iya bediri, deka macha ari Bup Kudus.

    3 September 2018 - Hari Satu ba Minggu Ke Dua Puluh Dua Musim Selama (Memorial of Saint Gregory the Great, Pope and Doctor of the Church)

    Bacha Ke Satu:

    1 Korint 2: 1 - 5

    Lebuh aku datai ngagai kita suba, menyadi, aku ukai datai madahka misteri Allah Taala ngena jaku ti enda ditemu reti tauka ngena penemu-dalam.

    Laban aku udah mutuska runding enggai nemu utai bukai lebuh aku begulai enggau kita, tang semina Jesus Kristus, enggau pasal Iya ke diregang.

    Lalu aku datai ngagai kita mai pengelemi, sereta getar-getar nangi.

    Jaku enggau pesan aku ukai disebut ngena jaku ti datai ari penemu-dalam, tang ngayanka kuasa enggau Roh Allah Taala, ngambika pengarap kita ukai dipanggaika ba penemu-dalam mensia, tang ba kuasa Allah Taala.

    Masmur Entara:

    Masmur 119: 97, 98, 99, 100, 101, 102

    Saut (peda 97a): TUHAN, aku rinduka adat Nuan.

    Ke Satu
    Aku rinduka adat Nuan! 
    Aku belematika iya sepemanjai hari.

    Saut: TUHAN, aku rinduka adat Nuan.

    Ke Dua
    Pesan Nuan ngasuh aku pintar agi ari bala munsuh aku, laban pesan Nuan endang seruran enggau aku.

    Saut: TUHAN, aku rinduka adat Nuan.

    Ke Tiga
    Aku mereti agi ke utai ari semua pengajar aku, laban aku belematika ajar Nuan.

    Saut: TUHAN, aku rinduka adat Nuan.

    Ke Empat
    Aku meretika mayuh agi utai ari sida ke tuai umur, laban aku ngasika ajar Nuan.

    Saut: TUHAN, aku rinduka adat Nuan.

    Ke Lima
    Aku udah nyeliahka semua ulah ti jai, 
    ngambika aku ulih ngasika jaku Nuan.

    Saut: TUHAN, aku rinduka adat Nuan.

    Ke Enam
    Aku nadai kala limpang ari adat Nuan 
    laban Nuan Empu udah ngajar aku.

    Saut: TUHAN, aku rinduka adat Nuan.

    Alleluia (peda Luke 4: 18)

    Alleluia, alleluia
    Roh Tuhan bisi ba Aku; Iya udah ngasuh Aku nusui Berita Manah ngagai orang ke seranta.
    Alleluia.

    Bacha Injil:

    Luke 4: 16 - 30

    Lebuh Iya datai di Nasaret, alai Iya ke diau kenyau ari mit, Iya mansang ngagai balai gempuru baka selama lebuh hari Sabat. Iya bediri, deka macha ari Bup Kudus.

    Bup nabi Isaiah lalu disuaka ngagai Iya. Iya muka bup nya, lalu tetemuka siti endur alai jaku tu ditulis, “Roh Tuhan bisi ba Aku, laban Iya udah nata Aku ngambika Aku nusui Berita Manah ngagai orang ke seranta. 

    Iya udah ngasuh Aku madahka pengelepas ke orang ke kena tangkap enggau pengerai ke orang ke buta, pengelepas ke orang ke kena tekan lalu madahka maya udah datai alai Tuhan deka ngelepaska nembiak Iya.”

    Iya lalu ngulungka bup nya baru, lalu nyuaka bup nya pulai baru ngagai orang ke udah nyuaka bup nya ngagai Iya. 

    Iya lalu duduk. Semua orang dalam balai gempuru nya bela merening ngagai Iya magang.

    Iya lalu madah ngagai sida, “Sehari tu ayat dalam Bup Kudus tu udah dikamatka munyi ti udah didinga kita.”

    Semua sida bela bejaku muji Iya, sereta balat alit ati ke pemanah jaku Iya. Ku sida, “Ukai enda Iya tu anak Josep?”

    Iya lalu bejaku ngagai sida, “Kita tentu deka nyebut jaku-dalam tu ngagai Aku, ‘Lutur, geraika diri empu.’

    Lalu kita deka nyebut, ‘Kereja mega di menua Nuan Empu ditu utai ti udah didinga kami kereja Nuan di Kapernaum.’”
    Lalu ku Iya bejaku ngagai sida, 

    “Enggau bendar Aku madah ngagai kita, nadai siku nabi kala diterima di menua iya empu.

    Tang iya ti bendar: indu ke balu endang mayuh di menua Israel lebuh rambau Elijah menya, lebuh hari enda ujan tiga taun setengah, lalu lapar pungkang nyadi di serata menua tu.

    Tang Elijah ukai diasuh datai ngagai sida, tang semina ngagai siku indu ke balu ke diau di Sarepat, di menua Sidon.

    Lalu orang ke sakit lan mega mayuh di menua Israel lebuh rambau nabi Elisa menya, tang nadai siku sida digeraika, kelimpah ari Naaman orang Siria.”

    Lebuh sida ninga nya, semua sida ke dalam balai gempuru nya lalu balat amat pedis ati.

    Sida angkat, lalu muru Iya ari nengeri nya, mai Iya ngagai tuchung bukit ti alai nengeri nya bediri, deka nikauka Iya ari pala tingkah.

    Tang Iya enselit pansut nengah bala sida, lalu mupuk ari endur nya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads