30 September 2018 - Hari Minggu Ke Dua Puluh Enam Musim Selama - Berita Iban Online

Header Ads

  • Baru Nyadi

    30 September 2018 - Hari Minggu Ke Dua Puluh Enam Musim Selama

    “Barang sapa ngasuh siku ari sida ke mit tu, ke arapka Aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik.
    30 September 2018 - Hari Minggu Ke Dua Puluh Enam Musim Selama

    Bacha Ke Satu:

    Penyampau 11: 25 - 29

    Udah nya TUHAN nurun dalam mua hari, lalu bejaku ngagai Moses. TUHAN lalu ngambi sekeda Roh ti udah diberi Iya ngagai Moses, lalu meri Roh nya ngagai tujuh puluh iku bala tuai orang Israel.

    Lebuh Roh nya datai ba sida, sida lalu belabuh benabi, tang enda lama.

    Dua iku ari sida ke tujuh puluh iku nya, iya nya Eldat seduai Medat, mengkang dalam kem lalu enda enggau sida ti bukai datai ngagai Langkau Kain TUHAN. Lebuh Roh nya datai ngagai seduai iya dalam kem nya, seduai iya mega belabuh benabi.

    Siku orang bujang lalu belanda, madahka ngagai Moses utai ti dikereja Eldat seduai Medat.

    Udah nya Josua anak Nun, ti nyadi penyaup Moses kenyau ari iya agi bujang, bejaku enggau Moses, “Tagang seduai iya, tuan!”

    Disaut Moses, “Nama kebuah nuan ngiruh diri pasal aku? Naka meh pemadas enti sema TUHAN deka meri Roh Iya ngagai semua nembiak Iya, lalu ngasuh semua sida manjung baka nabi!”

    Masmur Entara:

    Masmur 19: 7, 9, 11 - 12, 13

    Saut (peda 8a): Adat TUHAN endang ngena, lalu ngelantangka ati.

    Ke Satu
    Adat TUHAN endang pemadu badas. 
    Iya meri pengering ti baru. Pesan TUHAN endang tau dikarapka meri penemu-dalam ngagai orang ke nadai penemu-dalam.

    Saut: Adat TUHAN endang ngena, lalu ngelantangka ati.

    Ke Dua
    Bebasaka TUHAN nya utai ti manah, lalu basa nya deka majak belama iya. Atur ti diberi TUHAN endang lurus. Atur nya endang nadai kala berat sepiak.

    Saut: Adat TUHAN endang ngena, lalu ngelantangka ati.

    Ke Tiga
    Utai nya meri penemu ngagai aku, ke nembiak Nuan. Aku diupah ketegal ngasika utai nya. Nadai siku kitai ulih meda penyalah diri. Selamatka aku, TUHAN, ari penyalah ti enda dipeda!

    Saut: Adat TUHAN endang ngena, lalu ngelantangka ati.

    Ke Empat
    Intu aku likun mega ari dosa ti dikereja enggau sengaja. Anang nejuka dosa nya merintah aku. Nya baru aku deka nyadi pemadu badas sereta dilepaska ari penyai dosa.

    Saut: Adat TUHAN endang ngena, lalu ngelantangka ati.

    Bacha Ke Dua:

    St. James 5: 1 - 6

    Dingaka aku, kita ke kaya. Nyabak duie-duie meh kita laban kita deka ditinggang pemerinsa.

    Pengaya kita udah buruk, lalu gari kita abis diempa indu gegat.

    Perengka emas enggau pirak kita udah betegar, lalu tegar nya deka nyadika saksi kena ngelaban kita, lalu deka makai isi kita baka api. Kita udah nugungka pengaya ba hari ti penudi.

    Dinga kita! Gaji kuli ke bekereja ba umai kita ti enda dibayar kita, diatu ngangau, lalu sabak orang ke ngetau udah didinga Allah Taala, Tuhan ti Pemadu Bekuasa.

    Kita udah nyamai diau di dunya tu, ngelantangka diri. Kita udah nupi diri gemu nyendiaka diri disayat.

    Kita udah ngukum lalu munuh orang ke lurus, ke enda ngelaban kita.

    Alleluia (peda John 17: 17B, 17A)

    Alleluia, alleluia
    Jaku Nuan, O TUHAN, nya pemendar;
    nguduska kami dalam pemendar.
    Alleluia.

    Bacha Injil:

    Mark 9: 38 - 43, 45, 47 - 48

    Lebuh maya nya, John lalu bejaku ngagai Jesus, “Pengajar, kami bisi meda orang siku muru antu dalam nama Nuan, lalu kami nguji nagang iya, laban iya ukai raban kitai.”

    Tang ku Jesus bejaku, “Anang nagang iya, laban nadai orang ke ngereja kereja ajih dalam nama Aku lalu udah nya bejai Aku.

    Barang sapa enda ngelaban kitai, setanah enggau kitai.

    Laban enggau bendar Aku madah ngagai kita, barang sapa meri kita ai irup ketegal kita nembiak Aku, deka nerima upah.

    “Barang sapa ngasuh siku ari sida ke mit tu, ke arapka Aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik.

    Enti jari nuan mai nuan bedosa, tetak iya! Manah agi nuan tama ngagai pengidup nadai jari sepiak, ari ke bisi dua piak jari, lalu nuan dibuai ngagai neraka,ngagai api ti enda nemu padam,

    Lalu enti kaki nuan mai nuan bedosa, tetak iya! Manah agi nuan tama ngagai pengidup nadai kaki sepiak, ari ke bisi dua piak kaki, lalu nuan dibuai ngagai neraka.

    Lalu enti mata nuan mai nuan bedosa, keruk iya! Manah agi nuan tama ngagai Perintah Allah Taala mai sigi aja leka mata, ari ke bisi dua igi leka mata, lalu nuan dibuai ngagai neraka, alai ulat ti makai sida enda nemu mati, lalu api ti makai sida enda nemu padam.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads