Header Ads

  • Berita Tebaru

    47 iku orang ke ngibun rumah panjai ba Gran Limur, nadai palan endur ngenduh

    Gambar ba palan penusah angus ke nyadi.

    SRI AMAN: Penyampau 47 iku orang ke ngibun rumah panjai ba Gran Limur, Stumbin, ditu, nadai palan endur ngenduh dalam sekelip mata pengudah rumah panjai ke diibun sida iya ambis lengis diempa api sehari tu tadi. 

    Penusah angus nyadi urung jam 2.40 lemai nya, udah nganguska 24 buah pintu ba rumah panjai 100 peratus.

    Ketuai Balai Bomba enggau Penyelamat (BBP) Sri Aman, Willian Baheng, madah bisi nerima kangau bekaul enggau penusah angus nya urung jam 2.46 lemai.

    Ku iya, berindik ari nerima kangau nya,  penyampau sebelas iku raban bomba ari BBP Sri Aman berumban ngesah ke palan penusah ke nyadi ngambika ulih bejalaika operasyen madamka api.  

    "Enam raban bomba ari BBP Betong mega bisi datai ba palan penusah ke nyadi laban deka mantu bejalaika operasyen nya.

    Raban bomba enggau APM benung bejalaika operasyen madamka api ba palan penusah ke nyadi. 

    "Maya datai din, raban bomba meda api benung nyelarai nganguska sebuah rumah panjai struktur enda entap enggau pemesai 288 x 1,440 kaki persegi," ku iya maya ke dirandau pengarang berita, sehari tu tadi.

    Willian ngelansa, raban bomba lalu bejalaika operasyen ngerara api nyentukka api padam.

    Ku iya, asil peresa silik, nadai orang ke ngibun rumah nya napi pemedis tauka bakal laban sida iya sempat pansut enggau nyelamatka diri. 

    "Operasyen madamka api tembu urung jam 5.35 lemai enggau kebuah penusah angus nyadi enggau penyampau pengerugi agi dipansik," ku iya.

    "Raban Polis enggau Raban Penyaga Pengelikun Malaysia (APM) mega bisi mantu bejalaika operasyen ba palan penusah ke nyadi", tandu iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: