Header Ads

  • Berita Tebaru

    6 September 2018 - Hari Empat ba Minggu Ke Dua Puluh Dua Musim Selama

    Nyadi sekali, lebuh Jesus bediri ba tebing Danau Genesaret, mayuh amat orang mansang ngagai Iya, deka mendingka jaku Allah Taala.

    6 September 2018 - Hari Empat ba Minggu Ke Dua Puluh Dua Musim Selama

    Bacha Ke Satu:

    1 Korint 3: 18 - 23

    Menyadi:
    Anang nipu diri empu. Enti kita ngumbai diri bepenemu-dalam nitihka kira dunya, kita patut nyadi orang ke beli, ngambika kita tau nyadi orang ke bepenemu-dalam.
    Laban penemu-dalam mensia nya utai ti beli ba Allah Taala. Laban endang udah ditulis, 

    “Allah Taala manjuk orang ke bepenemu-dalam ngena pemintar sida empu.”
    Lalu Bup Kudus mega nyebut, 
    “Tuhan nemu runding orang ke bepenemu-dalam endang nadai guna.”

    Nya alai, nadai orang tau temegahka mensia. Laban semua utai endang enggi kita magang, nemuka iya nya Paul, Apollos, tauka Peter, tauka dunya tu, tauka pengidup, tauka pemati, tauka utai ti diatu enggau utai ti jemah ila, semua sida nya endang enggi kita magang, lalu kita endang enggi Kristus, lalu Kristus endang enggi Allah Taala.

    Masmur Entara:

    Masmur 24: 1 - 2, 3 - 4AB, 5 - 6

    Saut (peda 1): Dunya enggau semua utai ti dalam dunya endang enggi TUHAN.

    Ke Satu
    Dunya enggau semua utai ti dalam dunya endang enggi TUHAN. Dunya enggau semua orang ke diau di dunya endang enggi TUHAN; laban Iya udah nudukka dunya ba tasik enggau ba sungai.

    Saut: Dunya enggau semua utai ti dalam dunya endang enggi TUHAN.

    Ke Dua
    Sapa tau niki ngagai bukit TUHAN? Sapa tau bediri dalam Rumah Sembiang Iya ti kudus? Orang ke tuchi jari, tuchi ati, ti enda ngaga semaya ti bula.

    Saut: Dunya enggau semua utai ti dalam dunya endang enggi TUHAN.

    Ke Tiga
    TUHAN deka merekat lalu ngidupka sida. Allah Taala ke meri sida pengelepas, deka ngumbai sida nadai penyalah. Nya meh orang ke ngiga Iya, ke ngiga Allah Taala Jakop.

    Saut: Dunya enggau semua utai ti dalam dunya endang enggi TUHAN.

    Alleluia (peda Matthew 4: 19)

    Alleluia, alleluia
    Titihka Aku, ku TUHAN, lalu Aku deka ngajar kita jalai ngulihka mensia.
    Alleluia.

    Bacha Injil:

    Luke 5: 1 - 11

    Nyadi sekali, lebuh Jesus bediri ba tebing Danau Genesaret, mayuh amat orang mansang ngagai Iya, deka mendingka jaku Allah Taala.

    Iya tepedaka dua buah perau ba tebing danau nya, tang orang berikan udah ninggalka perau nya, benung masu jala sida.

    Iya lalu nepan sebuah ari perau nya ke diempu Simon, lalu ngasuh Simon ngejangka perau nya jauh mimit ari tebing. Iya duduk, lalu ngajar orang mayuh ari perau nya.

    Lebuh Iya udah tembu bejaku ngagai sida, Iya lalu bejaku ngagai Simon, 
    “Kejangka perau tu ngagai ai ti dalam, lalu ulurka pukat nuan ngambika bulih ikan.”

    Simon lalu nyaut, “Pengajar, kami udah bebendar gawa semalam-malam tu, tang nadai bulih utai. Tang laban Nuan ngasuh, aku deka ngulurka pukat.”

    Lebuh sida udah ngulurka pukat sida, sida bulih mayuh amat ikan, datai ke pukat sida nyau ka charik.

    Nya alai sida ngepai ngagai pangan sida ke ba perau sebuah, minta sida datai nulung sida. Sida datai lalu ngisi dua buah perau nya enggau ikan, datai ke perau nya nyau deka karam.

    Tang lebuh Simon Peter meda nya, iya lalu nyungkurka diri ngagai patung Jesus, ku iya, “Rari ari aku, Tuhan, laban aku tu orang ke bedosa!”

    Laban iya enggau semua orang ke enggau iya balat alit ati ke pemayuh ikan ti ulih sida, lalu baka nya mega James seduai John, anak Sebedi, ke sama bekunsi berikan enggau Simon. 

    Jesus lalu bejaku ngagai Simon, “Anang takut. Berengkah ari diatu nuan deka ngulihka mensia.”

    Lebuh sida udah narit perau dua buah nya ke tebing, sida ninggalka semua utai, lalu nitihka Iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: