7 September 2018 - Hari Lima ba Minggu Ke Dua Puluh Dua Musim Selama - Berita Iban Online

Header Ads

  • Baru Nyadi

    7 September 2018 - Hari Lima ba Minggu Ke Dua Puluh Dua Musim Selama

    Lalu nadai mega orang nyimpan wain ti baru dalam kambut ti lama, enggai ke wain ti baru nya mechahka kambut nya, lalu wain nya deka nyaya, lalu kambut nya rusak.

    7 September 2018 - Hari Lima ba Minggu Ke Dua Puluh Dua Musim Selama

    Bacha Ke Satu:

    1 Korint 4: 1 - 5

    Menyadi: Baka tu ku jalai kita patut ngira kami: kami tu ulun Kristus, ke ngibun misteri Allah Taala.

    Nambahka nya, orang ke ngibun utai Allah Taala, enda tau enda orang ke tau dikarapka.

    Tang ba aku siku, aku enda irauka diri diakim kita, tauka diakim dalam kot.

    Indah aku empu deh enda ngakim diri empu.

    Aku nadai nemu diri udah ngereja penyalah, tang ukai reti nya aku nadai penyalah. Tuhan ke ngakim aku.

    Nya alai anang ngakim orang sebedau maya ti patut, sebedau Tuhan datai.

    Lebuh Iya datai, Iya deka mantaika semua resia ti dilalaika dalam pemetang ngagai penampak, lalu deka mansutka juluk ati ti dipelalaika mensia. Nya baru semua orang deka nerima puji ari Allah Taala.

    Masmur Entara:

    Masmur 37: 3 - 4, 5 - 6, 27 - 28, 39 - 40

    Saut (peda 39a): TUHAN ngelepaska orang ke lurus.

    Ke Satu
    Panggaika pengarap kita ba TUHAN, lalu kereja utai ti badas; nya baru kita deka diau di menua tu, lantang sereta likun. Gaga ati ke TUHAN, lalu Iya deka meri nuan utai ti dikinginka nuan.

    Saut: TUHAN ngelepaska orang ke lurus.

    Ke Dua
    Serahka pengidup nuan ngagai TUHAN. 
    Panggaika pengarap nuan ba Iya, lalu Iya deka nulung nuan. Iya deka ngasuh pemadas nuan manchar baka penampak, lalu ngasuh pengelurus nuan manchar terang baka penampak tengah hari.

    Saut: TUHAN ngelepaska orang ke lurus.

    Ke Tiga
    Lengkaka penyai, lalu kereja pemadas; 
    ngambika kita diau di menua tu belama iya, laban TUHAN rinduka atur ti lurus; Iya enda ninggalka bala nembiak Iya ke tetap ati ngagai Iya. Orang ke lurus deka dijaga Iya belama iya, tang peturun orang ke jai, deka diburu.

    Saut: TUHAN ngelepaska orang ke lurus.

    Ke Empat
    TUHAN ngelepaska orang ke lurus 
    lalu nyaga sida lebuh penusah nyadi.
    TUHAN nulung sida, lalu ngelepaska sida. Iya ngelepaska sida ari orang ke jai, lalu nyelamatka sida, laban sida belindung ba Iya.

    Saut: TUHAN ngelepaska orang ke lurus.

    Alleluia (peda John 8: 12)

    Alleluia, alleluia
    Aku tu penampak dunya, ku TUHAN; barang sapa nitihka Aku deka ngembuan penampak ti meri pengidup.
    Alleluia.

    Bacha Injil:

    Luke 5: 33 - 39

    Udah nya sida pengajar Adat enggau orang Parisi bejaku ngagai Jesus, “Sida murid John, baka murid orang Parisi, suah bepasa sereta besampi, tang murid Nuan makai ngirup.”

    Jesus lalu bejaku ngagai sida, “Kita enda ulih ngasuh bala pengabang ba gawai tikah bepasa lebuh lelaki ke ditikah agi enggau sida, ukai enda?

    Hari deka datai alai lelaki ke ditikah nya deka diambi ari sida. Nya baru sida bepasa.”

    Iya mega madahka siti sempama ngagai sida: 

    “Nadai orang nyarikka chebik ari kain ti baru, lalu nampalka iya ngagai kain ti lama, enggai ke nyarikka kain ti baru, lalu chebik ti baru nya enda sebaka enggau kain ti lama.

    Lalu nadai mega orang nyimpan wain ti baru dalam kambut ti lama, enggai ke wain ti baru nya mechahka kambut nya, lalu wain nya deka nyaya, lalu kambut nya rusak.

    Wain ti baru enda tau enda disimpan dalam kambut ti baru!

    Lalu nadai mega orang deka ngirup wain ti baru lebuh iya udah ngirup wain ti lama, laban ku iya, ‘Iya ti lama nyamai agi.’”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads