Header Ads

  • Berita Tebaru

    8 September 2018 - Hari Enam ba Minggu Ke Dua Puluh Dua Musim Selama

    Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

    8 September 2018 - Hari Enam ba Minggu Ke Dua Puluh Dua Musim Selama (Feast of the Nativity of the Blessed Virgin Mary)

    Bacha Ke Satu:

    Mikah 5: 2 - 5

    Ku TUHAN bejaku, Betlehem Epratah, nuan suku raban bansa ti pemadu mit ari peturun Judah, tang ari nuan Aku deka mansutka siku pemerintah ke orang Israel, ari peturun orang ke dulu kelia.”

    Nya alai TUHAN deka nejuka bala nembiak Iya diperintah munsuh sida, nyentuk ngagai maya indu ke deka beranak nya udah ngadaka anak lelaki iya. Udah nya, orang Israel ti udah dibuai ngagai menua bukai, deka pulai baru ngagai bala sida empu.

    Lebuh pemerintah nya datai, iya deka merintah bala nembiak iya ngena kuasa ti datai ari TUHAN, sereta enggau mulia TUHAN Allah Taala empu. Bala nembiak iya deka diau likun, laban semua mensia di serata dunya deka ngaku iya endang besai kuasa, lalu iya deka mai pemaik.

    Tauka

    Rome 8: 28 - 30

    Menyadi:
    Kitai nemu, dalam semua utai, Allah Taala endang bekereja ke penguntung orang ke rinduka Iya, ke dikangauka Iya nitihka juluk ati Iya.

    Laban orang ke udah dikelala Allah Taala kenyau ari pun, mega diletak Iya nyadi sebaka enggau Anak Iya, ngambika Anak Iya nyadi Aka Tuai ke sida menyadi Iya dalam ruang bilik ti besai nya.

    Lalu orang ke udah diletak Iya nyadi sebaka enggau Anak Iya, mega dikangauka Iya; lalu orang ke dikangauka Iya mega digaga Iya lurus; lalu orang ke digaga Iya lurus, mega diberi Iya mulia.

    Masmur Entara:

    Masmur 13: 5, 6

    Saut (Isaiah 61: 10): Aku rami gaga ketegal utai ti udah dikereja TUHAN.

    Ke Satu
    Aku manggaika diri ba pengerindu Nuan ti meruan belama iya. Aku deka gaga ati laban Nuan deka ngidupka aku.

    Saut: Aku rami gaga ketegal utai ti udah dikereja TUHAN.

    Ke Dua
    Aku deka belagu ke Nuan, O TUHAN, 
    laban Nuan udah manah enggau aku.

    Saut: Aku rami gaga ketegal utai ti udah dikereja TUHAN.

    Alleluia

    Alleluia, alleluia
    Beberekat meh nuan Maria, dara tuchi ti kudus, ti patut bempu semua puji; ari nuan udah datai penampak ti mai pengelurus, iya nya Kristus Allah Taala kami.
    Alleluia.

    Bacha Injil:

    Matthew 1: 1 - 16, 18 - 23

    Tu tusut pasal Jesus Kristus, ke peturun David, ke peturun Abraham.

    Baka tu ku ripih nama aki ini Iya berengkah ari Abraham nyentuk ngagai Raja David: Abraham, Isak, Jakop, Judah enggau sida menyadi lelaki iya; udah nya Peres enggau Serah (indai seduai iya Tamar), Hesron, Ram, Aminadap, Nason, Salmon, Boas (indai iya Rahap), Obet (indai iya Rut), Jesi enggau Raja David.

    Ari David nyentuk ngagai maya orang Israel dibuai ngagai menua Babilon, baka tu ku ripih nama aki ini Iya: David, Solomon (indai iya udah nyadi bini Uriah), Reheboam, Abijah, Asa, Jehosapat, Joram, Usiah, Jotam, Ahas, Hesekiah, Manasi, Amon, Josiah, enggau Jehoiakin enggau bala menyadi iya.

    Ari maya sida dibuai ngagai menua Babilon nyentuk ngagai pengada Jesus, baka tu ku ripih nama aki ini Iya:

    Jehoiakin, Sealtiel, Serubabel, Abiut, Eliakim, Asor, Sadok, Akim, Eliut, Eleasar, Matan, Jakop, enggau Josep, ke jadi enggau Maria, indai Jesus ke dikumbai Kristus.

    Baka tu ku gaya pengada Jesus Kristus. Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus.

    Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai.

    Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

    Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.”

    Semua utai tu nyadi kena ngamatka jaku ti udah disebut Tuhan beseruanka siku nabi, “Siku dara bungas deka betubuh-bisi, lalu ngadaka anak lelaki siku, lalu iya deka dikumbai Imanuel” (reti nya, “Allah Taala enggau kitai”).

    Tauka

    Matthew 1: 18 - 23

    Baka tu ku gaya pengada Jesus Kristus. Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus.

    Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai.

    Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

    Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.”

    Semua utai tu nyadi kena ngamatka jaku ti udah disebut Tuhan beseruanka siku nabi, “Siku dara bungas deka betubuh-bisi, lalu ngadaka anak lelaki siku, lalu iya deka dikumbai Imanuel” (reti nya, “Allah Taala enggau kitai”).

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: