9 September 2018 - Hari Minggu Ke Dua Puluh Tiga Musim Selama - Berita Iban Online

Header Ads

  • Baru Nyadi

    9 September 2018 - Hari Minggu Ke Dua Puluh Tiga Musim Selama

    Orang lalu mai ngagai Iya siku lelaki ke bengal sereta bisu; sida lalu minta Jesus ngengkahka jari Iya atas orang nya.

    9 September 2018 - Hari Minggu Ke Dua Puluh Tiga Musim Selama

    Bacha Ke Satu:

    Isaiah 35: 4 - 7A

    Ku TUHAN bejaku:
    Sebut ngagai semua orang ke lemi semengat, “Kita enda tau enda kering, lalu enda tau takut! Allah Taala deka datai ngelepaska kita, lalu ngukum bala munsuh kita.”
    Orang ke buta ulih meda, lalu orang ke bengal ulih ninga.

    Orang ke enda ulih bejalai, deka merejuk lalu betanda, lalu orang ke bisu, deka manjung gaga ati. Ai sungai deka rarat nengah menua puang.

    Pasir ti angat deka nyadi danau, lalu tanah ti rangkai deka penuh laban mata ai.

    Masmur Entara:

    Masmur 146: 6B - 7, 8 - 9, 9 - 10

    Saut (peda 1b): Puji meh TUHAN, O semengat aku!

    Ke Satu
    Allah Taala Jakop endang seruran ngamatka semaya Iya. Lebuh Iya ngakim Iya ngeringka orang ke kena tekan, lalu meri pemakai ngagai orang ke lapar. TUHAN ngelepaska orang ke kena jil.

    Saut: Puji meh TUHAN, O semengat aku!

    Ke Dua
    TUHAN ngasuh orang ke buta meda. 
    Iya ngangkatka orang ke udah rebah. 
    Iya rinduka bala nembiak Iya ke lurus.
    Iya nyaga orang kampar ti diau di menua kitai.

    Saut: Puji meh TUHAN, O semengat aku!

    Ke Tiga
    TUHAN nulung indu ke balu enggau orang ke nadai apai indai, tang ngerusak orang ke jai. TUHAN endang Raja belama iya. O Sion, Allah Taala nuan deka merintah belama iya. 
    Puji TUHAN!

    Saut: Puji meh TUHAN, O semengat aku!

    Bacha Ke Dua:

    St. James 2: 1 - 5

    Menyadi, kati kita ke arapka Jesus Kristus Tuhan kitai ti bemulia enda bepilih mata? Enti sema siku orang ke ngena tinchin emas, enggau gari ti manah, datai ngagai gempuru kita, lalu siku orang ke seranta, ke ngena gari ti kamah mega datai, lalu kita ibuhka orang ke ngena gari ti manah nya, lalu bejaku ngagai iya, “Duduk ditu,” tang bejaku ngagai orang ke seranta nya, “Bediri din”, tauka “Duduk semak kaki aku,” enda ke kita bepilih mata, lalu ngakim orang ngena runding ti jai?

    Pendingka tu, menyadi ke dikerinduka aku! Kati Allah Taala nadai udah milih orang ke seranta di dunya tu nyadi orang ke kaya dalam pengarap, sereta bempu Perintah ti udah disemaya Iya ke orang ke rinduka Iya?

    Alleluia (peda Matthew 4: 23)

    Alleluia, alleluia
    Jesus nusui Berita Manah pasal Perintah Allah Taala, sereta ngeraika orang ke kena laban semua macham penyakit enggau pemedis.
    Alleluia.

    Bacha Injil:

    Mark 7: 31 - 37

    Udah nya Jesus mulaika Diri ari menua Tire, lalu bejalai nengah menua Sidon mansang ngagai Danau Galili, ngerenchah menua Sepuluh Buah Nengeri.

    Orang lalu mai ngagai Iya siku lelaki ke bengal sereta bisu; sida lalu minta Jesus ngengkahka jari Iya atas orang nya.

    Jesus lalu mai orang nya ke tisi, ngejang ari bala mayuh. Iya ngachukka tunjuk Iya ngagai lubang pending orang nya, ngeludah dilah iya lalu negu dilah iya nya, engkadah ke langit, meresu ngesuhka seput, lalu bejaku ngagai orang nya, “Epata,” reti nya, “Tebuka meh!”

    Tekala nya orang nya lalu ulih ninga, dilah iya ulih engkebut, lalu iya ulih bejaku enggau terang.

    Jesus lalu enda nyagi sida nusui pasal nya ngagai orang. Tang makin balat Iya enda nyagi sida, makin balat agi ga sida nusui utai nya.

    Sida balat amat alit ati. Ku sida, “Semua utai ti dikereja Iya manah magang!Iya ngasuh orang ke bengal ulih ninga, lalu ngasuh orang ke bisu ulih bejaku!”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads