Admin, nulung aku ngiga indai aku.. - Berita Iban Online

Header Ads

  • Baru Nyadi

    Admin, nulung aku ngiga indai aku..

    SINU AMAI: Nurul begambar enggau indai maya iya beumur 5 taun suba. Nurul PM ngagai kami ba FB 'Berita Iban Online" (gambar tengah).

    Tabi pagi pemacha semua, urung jam 4.42 lemai kemari, Hari Satu, raban kami bisi nerima penerang ari siku pemacha minta tulung tauka bantu ngiga indai iya ke udah lama nadai temu rita.

    Tabi basa admin. Aku deka betanya, ulihka aku minta bantu ngiga indai aku. Apai enggau indai aku udah sarak maya aku beumur 5 taun. Nyentuk ke diatu aku nadai kala ninga rita ari indai aku enggau enda nemu dini endur iya diau diatu. Aku ngarapka ulih betemu enggau indai aku enggau naka pengelengkas laban aku deka melah pinang tauka kawin bulan 12 tu ila. Ngarapka admin ulih ngiarka enggau 'viral' ke berita tu", ku iya nulis (PM) penerang ba Facebook (FB) pages 'Berita Iban Online

    Siku indu ke meri penerang ngagai kami nya dikelala enggau nama Nurul Famiza beumur 23 taun, penatai ari Port Dickson, Negeri Sembilan.

    PENGINGAT LAMA MAYA BEGULAI SUBA: Nurul enggau indai iya sama bela bediri ngambi gambar, 5 taun ke udah.

    Nurul madahka diri deka minta bantu ngiga indai iya ke dikelala enggau nama Lunyana Anak Jol tauka Anak Jol (nama kangau ba rumah panjai) tauka Noriana bt Abdullah (nama islam).

    "Aki (apai indai) aku suba ex polis ba Sarawak, iya enggau indai aku diau besemak enggau rumah panjai Jana, Batu Matub, di Julau.

    "Indai kawin enggau apai aku maya apai aku agi gawa nyadi Soldadu Langit Malaysia (TUDM) ba Sarawak. Pengudah nya, seduai iya ngambi aku nyadi anak angkat seduai lebuh aku ada ba sepital. 

    SINU AMAI: Indai Nurul mangku iya benung duduk ba mua pintu.

    "Indai aku ada taun 1965, diatu umur iya udah mangai 53 taun. Pengudah apai enggau indai aku sarak, aku lalu nadai kala betemu enggau indai angkat aku nya nyentuk ke diatu", ku iya lebuh dirandau pengarang Berita Iban Online.

    "Berindik ari tu, aku ngarapka bala kaban belayan, menyadi indai aku enggau orang mayuh ke ngelala indai aku tau betalipaun tauka mesej/whatsapp ngagai aku ngena lumur 0162344075 (Nurul Famiza)", tandu iya.

    Berebak enggau nya, kami ari raban Berita Iban Online tauka BeritaIban.com ngarapka semua pemacha ulih nulung tauka mantu Nurul Famiza ngiga indai iya enggau naka pengelengkas laban iya deka mai indai iya datai maya pengerami melah pinang iya kena bulan december tu ila.

    Aram mih kitai sama bela bekunsi 'share' artikel tu, ngambika bala kaban belayan tauka suku juru ke ngelala Lunyana Anak Jol tauka Anak Jol (nama kangau ba rumah panjai) tauka Noriana bt Abdullah (nama islam) ulih madahka iya sereta ulih begulai baru baka maya agi mit suba. Terima kasih semua. Tuhan merekat semua..😇



    PUJI TUHAN: Nurul madahka iya udah mujur berandau enggau indai angkat tang bisi penanggul ba line talipaun.


    JAKU GERAH: 

    Keterubah sekali, raban kami deka meri terima kasih ngagai semua bala pemacha ke udah besaup bekunsi 'share' sereta nulung ngiga Indai Nurul Famiza.

    Nitihka penerang ke diterima kami ari Nurul, iya udah berandau enggau indai angkat iya empu. Nyadi reti nya tadi, Nurul udah mujur betemu enggau indai iya.

    Puji Tuhan, Nurul Famiza udah mujur betemu enggau indai angkat iya. Terima kasih pemacha semua. Tuhan merekat semua. 😇

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads