Header Ads

  • Berita Tebaru

    Aku tekenyit laban enda nyangka ginti bulih siku baya

    CHUKUP PEMESAI: Abi pala baya ke udah kena timbak (kiba) enggau ngambi gambar siku ari gentung pendiau dia (kanan)

    MARUDI: Siku orang ke nginti tekenyit sepengudah ginti iya bulih siku baya urung pemanjai pemanjai 13 kaki enggau pemerat urung 400 kilogram ba Sungai Baram besemak rumah iya di Kampung Dagang ditu, pagi kemari.

    Lelaki ke nginti nya dikelala enggau nama Sarbini Hamid, beumur 45 taun, madah iya nurun ngabas ginti nya urung jam 5 pagi sereta berasai tekenyit meda ginti ke ditan iya nya bulih siku baya, berindik ari nya iya lalu madah ke genturung pendiau ba kampung nya. 

    Baya nya ditembak genturung pendiau dia ba pala ngena senapang, pengudahnya ditarit ke pantai, sereta dikemataka Ketuai Kampung Dagang Abdullah Piee enggau genturung pendiau dia, serayaka nganti raban Sarawak Forestry Corporation (SFC) datai.  

    Ku Sarbini, beberapa minggu ke udah lalu, beberapa iku angsa enggau itit ke ditupi iya lenyau sereta dipechayaka diempa baya. Berindik ari nya iya mutus ati deka nangkap baya nya. 

    “Aku ngetanka ginti aku ba tebing sungai, ianya ba endur aku tepedaka siku baya nyemerai ba ditu ngelamatu enggau baya dipechayaka makai jelu ke ditupi aku.

    “Pagi kemari maya aku ngabas ginti, aku tekenyit laban enda nyangka ginti bulih siku baya,” ku iya maya ke dirandau pengarang berita.

    Berebak enggau nya, raban SFC mega datai ba palan nya, pengudahnya sida lalu melah perut baya nya sereta dikemataka siku pengajar ke dipechayaka anak iya diempa baya ba palan penusah ke nyadi dalam kandang beberapa bulan ke udah lalu.

    Ngambika apai mansa ulih ngelala barang ke diempu anak iya, enti baya nya sama ke dipechaya makai anak iya. 

    Tang pengudah dibelah tauka peruti, utai ke bisi dalam perut baya ianya siku bayak enggau kambut uras ke dibuai ba Sungai Baram.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: