Dua 'tokey' ditangkap, dipechayaka nyual arak bisi rachun - Berita Iban Online

Header Ads

  • Baru Nyadi

    Dua 'tokey' ditangkap, dipechayaka nyual arak bisi rachun

    Dua 'tokey' ditangkap bekaul enggau kes arak bisi rachun ngejung ke dua iku parai. 📷#EffendyRashid

    IPOH: Dua 'tokey' ditangkap bekaul enggau kes arak bisi rachun ngejung ke dua iku parai, direman sehari nyentuk ke lemai kemari.

    Majistret Nurul Hafizah Mohd Pauzi, meri pemendar ngagai raban polis kena nangkap enggau ngereman dua lelaki beumur 35 enggau 44 taun nya nyentuk ke jam 5 lemai kemari.

    Kededua saspek direman nitihka Seksyen 117 Kanun Prosedur Jenayah kena masik kes nitihka Seksyen 304(b) Kanun Keseksaan ke ulih diukum jil enda kurang ari 10 taun tauka tunggu, tauka kededua nya sekali, enti dikenuku salah.

    Kemari, polis nangkap dua 'tokey' kedai runcit nya enggau ngerampas 43 tin sereta 24 butul ai bisa, berindik ari dua lelaki bebadi tang tiga iku agi ditaban ke sepital sepengudah ngirup ai bisa ke dipechayaka dijual dua kedai nya.

    Lebuh abas ngenyit, urung jam 4 lemai ba sebuah kedai di Bercham, polis nangkap lelaki beumur 35 taun sereta ngerampas 24 butul enggau 18 tin ai bisa ke bisi dia.

    Dua jam pengudah nya, siku lelaki beumur 44 taun ditangkap ba Kanthan Bharu, Chemor, enggau penyampau 25 tin ai bisa ke bisi dijual ba kedai nya dirampas.

    Ketuai Opis Tasat Jenayah Perak, Senior Asisten Komisioner Yahya Abd Rahman, madahka saspek ditangkap lebuh bejalai Op Methanol Perak enggau kes dipansik ari baruh Seksyen 304 (b) Kanun Keseksaan.

    Sapit Ketuai Polis Perak, Datuk Razarudin Husain, mega madahka, abis ngenyit nya dipejalaika pengudah nerima ripot polis ari Opis Pemesai Pengerai Pampang Kinta (KPDK) urung jam 1.30 tengah hari bekaul enggau kes ngirup arak bisi rachun.

    Ku iya, nitihka ripot ke diterima, naka kemari, dua lelaki parai, dua iku agi diperubatka ba Unit Rawatan Rapi (ICU) di Sepital Raja Permaisuri Bainun (HRPB) enggau siku agi lelaki benung diperubatka ba wad perubat sepital ke sama enggau kesemua mansa beumur antara 35 nyentuk 55 taun.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads