Header Ads

  • Berita Tebaru

    Sebuah kantin angus lengis, ba Ladang Saremas, Jalai Lama Miri - Bintulu

    Raban bomba benung bejalaika operasyen 'overhaul' ba palan penusah angus ke nyadi. 📷@DayakDaily

    MIRI: Siku 'tokey' tauka orang ke ngempu kantin nadai endur ngiga jereki pengudah premis ke endur iya bedagang ba Ladang Saremas, KM 115, Jalai Lama Miri-Bintulu, angus kemari.

    Penusah nyadi urung jam 10.30 pagi nya, udah nganguska 100 peratus sebuah kantin ke digaga ari kayu.

    Ketuai Balai Bomba enggau Penyelamat Zon Miri, Law Poh Kiong, madahka raban bomba bisi nerima kangau urung jam 12.22 tengah hari bekaul enggau penusah ke nyadi.

    Ku iya, berindik ari kangau ke diterima, seraban bomba ari Balai Bomba enggau Penyelamat (BBP) berumban ngesah ke palan nyadi enggau bejalaika pengawa ngemadamka api.

    Raban Bomba Sukarela Batu Niah mega bisi mantu bejalaika operasyen ba palan penusah ke nyadi. 

    "Tang, maya datai ba palan penusah ke nyadi, raban bomba ngeripotka kantin nya udah ambis lengis diempa api," ku iya maya ke dirandau pengarang berita kemari.

    Law ngelansa, raban bomba lalu ngena ai ari tangki jentera kena ngemadamka bara api nyentuk ke padam magang.

    Ku iya, nadai bakal tauka bebadi nyawa diripotka ba palan penusah ke nyadi.

    "Operasyen 'overhaul' tembu urung jam 3.30 lemai.

    "Naka ke diatu, kebuah penusah angus nyadi enggau penyampau pengerugi agi dipansik," ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: