Siku anak mit indu, tiga taun, bebadi nyawa, labuh ari tingkat 17 - Berita Iban Online

Header Ads

  • Baru Nyadi

    Siku anak mit indu, tiga taun, bebadi nyawa, labuh ari tingkat 17

    KASIH AMAI: Mansa bebadi ba palan penusah ke nyadi.

    PETALING JAYA: Siku anak mit indu beumur tiga taun bebadi nyawa pengudah labuh ari tingkat 17 di Blok A Projek Perumahan Rakyat (PPR) Kota Damansara, ditu, pagi tadi.

    Penusah nyadi urung jam 7.10 pagi nya, mansa dipechaya tegelinchir maya niki bangku pelestik ba balkoni rumah ke nadai dipasang pagar (grill) atas.

    Maya penusah nyadi, mansa diau kediri ba rumah, apai enggau indai iya pansut ari rumah urung jam 6 pagi laban deka bejual asi lemak di Bukit Jelutong, Shah Alam, tang menyadi indu (kakak) mansa beumur 14 taun mega pansut laban nganjung siku agi menyadi iya ke beumur tujuh taun ke sekula tadika di Blok D PPR.

    Ketuai Polis Pampang Petaling Jaya, Asisten Komisioner Mohd Zani Che Din, madah nitihka penerang ari kakak mansa, iya enda ngerak adik iya (mansa) laban benung tabin enggau agi tinduk.

    "Maya menyadi indu mansa enggau siku agi adik iya pansut ari rumah urung jam 7 pagi, mansa benung tidur.

    "Maya pulai, orang ke berimbai rumah enggau sida iya madahka adik iya (mansa) labuh enggau midang ba palan penusah ke nyadi," ku iya maya ke dirandau pengarang berita, sehari tu.

    Ku iya, asil pansik ba rumah mansa bisi tetemuka bangku pelesetik ba endur 'balkoni' ke enda pagar ngena 'grill' ba atas.

    "Kami pechaya mansa niki besemak grill ngena bangku pelesetik nya sebedau labuh.

    "Bangkai mansa dianjung ke Unit Forensik Sepital Sungai Buloh kena bejalaika pengawa buntas tasat," ku Mohd Zani.

    Berebak enggau nya, siku sekuriti PPR nya ke dikelala enggau nama Param, madah bisi ninga munyi bedegum ti ingar maya iya benung bejalaika pengawa ba sebuah blok besemak. 

    "Aku dipadahka siku anak mit labuh enggau berumban ngesah ke palan penusah ke nyadi sebedau beberapa iku genturung pendiau diak ngagau ke ambulans.

    "Bisi mega madahka mansa engka labuh maya deka ngambi gari ke dijemi ba balkoni laban maya penusah nyadi, mansa semina ngena tanchut pandak aja," ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads