Siku lelaki diripotka lenyau ba Gunung Singai - Berita Iban Online

Header Ads

  • Baru Nyadi

    Siku lelaki diripotka lenyau ba Gunung Singai

    Lokasyen ke dikirumka mansa ngagai kaban iya, lemai kemari.

    BAU: Siku lelaki ke diripotka tesat ba Gunung Singai, kemari, mujur ngirum endur iya 'lokasyen' ngena aplikasyen WhatsApp, sehari tu tadi.

    Taja pia, raban ngiga enggau penyelamat bisi penanggul deka nentuka endur iya laban enti dipeda ba peta, lokasyen ke dikirumka mansa ke dikelala enggau nama, Stanley Kho, 22 taun, jauh kebukai tauka enda temu.

    Ketuai Balai Bomba enggau Penyelamat (BBP) Bau, Ebby Hirwandy Sarbini, madahka nyentuk jam 5 lemai sehari tu tadi, raban bomba agi bejalaika operasyen ngiga mansa ba sebelah gunung nya.

    Ku iya, operasyen ngiga enggau nyelamat mansa dipejalaika pengudah nerima kangau urung jam 4.35 lemai kemari.

    Operasyen ngiga enggau nyelamat nya dipejalaika sembilan iku Raban Bomba, tujuh iku Raban Penyaga Pengelikun Malaysia (APM) enggau dibantu orang mayuh.

    “Operasyen agi dipejalaika nyentuk lemai tu pengudah napi penanggul mimit laban ujan bangat pagi tadi,” ku iya

    Mansa dipechayaka lenyau lebuh kediri niki gunung nya urung jam 8.30 pagi kemari.

    Mansa ditemu lenyau pengudah beberapa iku kaban iya tetemuka kerita iya paking ba kaki gunung nya

    Ebby Hirwandy, madahka kepenudi sekali mansa berandau enggau kaban iya nya ngena aplikasyen WeChat, urung jam 10.05 pagi kemari.

    “Pengudah lama nganti ba kaki gunung enggau nadai nyaut kangau, empat kaban iya niki gunung nya laban deka ngiga mansa urung jam 4 lemai kemari.

    “Taja pia, sida iya enda tetemuka mansa enggau kaban iya alu berumban ngangauka BBP Bau ngambika ulih mantu ngiga mansa,” ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads