Header Ads

  • Berita Tebaru

    Siku lelaki ditemu enda ngeleda ba dalam kerita Hilux di simpang Sungai Assan

    BA PALAN PENUSAH NYADI: Mansa ditemu enda nyeleda ba dalam kerita Hilux.

    SIBU: Siku lelaki, penatai ari Kuching ditemu enda ngelada tauka enseput ba dalam sebuah kerita ke dipechayaka bekaul enggau kes belaya, ditu. 

    Mansa, lelaki beumur 51 taun nya ditemu siku raban polis peronda ba dalam kerita hilux ba tisi jalai, enda jauh ari simpang Sungai Assan, urung jam 7.15 pagi kemari (Hari Enam).

    Mansa telih, bakal ba mua enggau lengan kiba iya. Pengudah nya iya dianjung ke Sepital Sibu ngambika ulih diperubat enggau silik agi.

    Tang taja pia, mansa diripotka parai urung jam 10 malam tadi lebuh diperubat ba sepital pengudah 'koma', dipechayaka ketegal balat bedarah ba untak. 

    Ketuai Polis Pampang Sibu, ACP Stanley Jonathan Ringgit, madahka kes nya dipansik ari baruh Seksyen 325 Kanun Keseksaan laban ngemediska mansa, taja pa diklasifikasi baru ngagai Seksyen 302 Kanun Keseksaan pengudah mansa diripotka parai.

    "Pengudah kerita mansa dibai ke Balai Polis Ulu Lanang, raban polis meresa kerita nya enggau bisi tetemuka perengka ke dikena nginsap dadah ba penuduk penumpang ba belakang. 

    "Berindik enggau nya, polis pechaya kes nya bisi bekaul enggau kes belaya ketegal dadah entara bala sida iya," ku iya lebuh dirandau pengarang berita, sehari tu tadi.

    Ku iya, asil pansik tumu, empat iku orang ke bekait enggau kes nya nyengkaum siku indu.

    "Tiga saspek nyengkaum siku indu udah mujur ditangkap ba Jalan Kampung Nyabor urung jam 2 pagi tadi, tang siku agi bedau ulih tangkap tauka agi lepas," ku iya.

    Stanley, madah kebuah enggau tuju belaya dipechayaka mansa nguji ngelindung saspek indu ke dituduh enchuri dadah ari salah siku entara tiga saspek ke ngemediska mansa nya.

    "Kesemua saspek enggau mansa sama bela ngelala pangan diri enggau polis pechaya kebuah penusah nyadi bepun ari dadah," ku iya.

    "Kesemua saspek deka direman enggau peresa ai kemi deka dipejalaika sehari tu," tandu iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: