Siku orang tuai bakal, lelaki tama rumah belalai - Berita Iban Online

Header Ads

  • Baru Nyadi

    Siku orang tuai bakal, lelaki tama rumah belalai

    Mansa diatu benung diperubatka ba Sepital Bintulu.

    BINTULU: Siku orang tuai (warga emas) bakal pengudah belibat enggau siku lelaki ke tama belalai ke rumah iya ba Jalai Tanjung Kidurong, Bintulu, kemari.

    Ketuai Polis Pampang Bintulu, Superintendan Zulkipli Suhaili, madah mansa benung jenak tinduk ba bilik iya. Mansa dani kenyap pengudah ninga bunyi ti ingar ba bilik besai (ruang tamu) urung jam 11 pagi.

    “Saspek tekenyit meda mansa bisi ba dalam rumah nya enggau nguji mampur mua indu tuai nya.  Tang taja pia, mujur ditepis mansa ngena jari sebedau seduai iya belibat. Maya nya mih, mansa kena palu ngena perengka tajam ba mua enggau tubuh iya, perengka tajam nya mega dipechaya dikena saspek ngerumpak.

    “Pengudah meda mansa balat bedarah enggau lemi, saspek alu ngelarika diri enggau nabanka kantung sandi mansa ke bisi mayuh bengkah dokumen penting, enggau penyampau mata duit keretas RM500,” ku iya lebuh dirandau pengarang berita, seharitu tadi.

    Ku iya, asil pansik tumu, nadai bekau pecah masuk ke dalam rumah mansa enggai raban polis diatu benung bejalaika pengawa ngiga identiti saspek.

    Berebak enggau nya, Zulkipli madah, mansa diatu benung diperubatka ba Sepital Bintulu enggau iya diripotka udah berinsur manah, taja pia iya agi 'trauma' berindik ari penusah ke ditapi iya.

    “Kes dipansik ari baruh Seksyen 394 Kanun Keseksaan laban ngerumpak. Enti nyema dikenuka salah, ulih ukum jil pengelama 20 taun enggau tunggu tauka sipat tauka kededua nya sekali,” ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads