Siku pelajar bebadi, ditinggang kayu ba palan ai terejun Jangkar, Lundu - Berita Iban Online

Header Ads

  • Baru Nyadi

    Siku pelajar bebadi, ditinggang kayu ba palan ai terejun Jangkar, Lundu

    Raban bomba mai bangkai mansa ari palan ai terejun nuju ke jalai penatai.

    KUCHING: Siku pelajar beumur 16 taun bebadi pengudah ditinggang kayu ba palan ai terejun Jangkar, Lundu, ditu, sehari tu.

    Nitihka pengari Operasyen Opis Bomba enggau Penyelamat Malaysia (JBPM) Sarawak, seraban bomba diketuaika PBK Pathi Samsudin berumban ngesah ke palan penusah nyadi pengudah nerima kangau urung 12.30 tengah hari.

    "Mansa datai ke palan nya begulai enggau apai iya. Apai iya mega ngulu sereta nunjukka jalai nuju palan ai terejun nya.  

    "Maya penusah nyadi, mansa benung duduk kediri ba atas batu maya tanah ke ba belakang iya enda mukai-mukai tusur lalu kayu ke bisi ba atas bukit tumbang lalu ninggang mansa," ku iya maya ke dirandau pengarang berita sehari tu tadi.

    Ku iya, orang mayuh ke bisi ba palan penusah ke nyadi, besaup ngarika kayu nya laban deka mansutka mansa sebedau raban bomba datai.

    "Ngam-ngam gak maya nya, salah siku ari orang ke bisi datai ba diak ianya lutur enggau iya meri peresa tumu ngagai mansa.

    "Tang taja pia, mansa enda ulih diselamatka ketegal balat bakal ba dalam tubuh," 

    Berindik ari nya, lutur nya madahka mansa bebadi ba palan penusah ke nyadi.

    Raban bomba ngatung bangkai mansa pansut ari palan nya enggau nyua ke raban polis kena bejalaika pengawa silik agi. 

    Operasyen mai mansa pansut ari palan penusah ke nyadi ke jalai penatai urung penyauh empat kilometer enggau operasyen tembu urung jam 5.10 lemai.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads