1 October 2018 - Hari Satu ba Minggu Ke Dua Puluh Enam Musim Selama - Berita Iban Online

Header Ads

  • Baru Nyadi

    1 October 2018 - Hari Satu ba Minggu Ke Dua Puluh Enam Musim Selama

    Sida murid betalatka enggau pangan diri pasal sapa ari bala sida ke pemadu besai.
    1 October 2018 - Hari Satu ba Minggu Ke Dua Puluh Enam Musim Selama (Memorial of Saint Thérèse of the Child Jesus, Virgin and Doctor of the Church)

    Bacha Ke Satu:

    Jop 1: 6 - 22

    Nyadi sekali lebuh bala orang serega datai ngadap TUHAN, Sitan bisi mega datai enggau sida.

    TUHAN lalu nanya Sitan, “Datai ari ni nuan?’’ Sitan lalu nyaut, “Aku udah bejalai kia-kia, segau-segau nengah dunya tu.’’

    TUHAN lalu nanya Sitan, “Kati nuan bisi udah berundingka nembiak Aku Jop? Nadai orang di dunya ke badas sereta lurus baka iya, ke nangika Allah Taala sereta nyeliahka penyai.’’

    Sitan lalu nyaut, “Kati Jop deka nyembah Nuan enti iya nadai bulih utai ari nya?
    Ukai enda Nuan ke seruran nyaga iya, nyaga ruang bilik enggau semua utai ti diempu iya? Nuan udah merekatka semua utai ti dikereja iya, lalu jelu bedus enggau jelu sapi iya udah nambah-menambah di menua tu.

    Tang enti Nuan ngunjurka jari Nuan, lalu ngambi semua utai ti dikemisi iya, iya tetap deka nyumpah Nuan mua mata!’’

    “Barang ku jaku,’’ ku TUHAN bejaku enggau Sitan, “semua utai ti dikemisi iya sigi ba jari nuan magang, tang nuan enda tau ngemediska Jop.’’ Sitan lalu mupuk.

    Nyadi sekali, lebuh bala anak Jop benung ngintu pengerami makai besai ba rumah aka tuai sida, siku seruan datai belanda ngagai Jop. 

    Ku iya, “Kami benung ngeradu tanah ngena sapi, lalu raban keledai meruan ba padang rumput semak endur nya.

    Orang Sabean lalu ngenyit nyerang kami lalu ngerampas semua jelu nya. Sida munuh semua bala orang gaji nuan.

    Semina aku aja ulih ngerarika diri lalu madahka tu ngagai nuan.’’

    Lebuh orang gaji nya agi benung bejaku, siku agi orang gaji datai, lalu bejaku, “Jelu bedus enggau bala pengibun bedus udah dipangkaka ngitar, lalu semua sida mati magang. Ka semina aku aja agi idup lalu madahka utai tu ngagai nuan.’’

    Lebuh orang gaji nya agi benung bejaku, siku agi orang gaji datai lalu bejaku, “Tiga bengkah raban soldadu penyelawai orang Kaldea udah nyerang kami, ngerampas jelu unta, lalu munuh semua bala orang gaji nuan. Ka semina aku aja ulih ngerarika diri lalu madahka utai tu ngagai nuan.’’

    Lebuh orang gaji nya agi benung bejaku, siku agi orang gaji datai, lalu bejaku, “Lebuh bala anak lelaki enggau anak indu nuan agi benung ngintu pengerami makai besai ba rumah anak tuai nuan, kabut ti besai datai lalu ngenyit mangka ari menua puang, numbangka rumah.

    Semua sida mati magang ditinggang rumah nya. Ka semina aku aja agi idup lalu madahka utai tu ngagai nuan.’’

    Jop lalu angkat, nyarikka gari diri, ngukur pala iya, lalu nyungkurka diri ke tanah nyembah Allah Taala.

    Ku iya bejaku, “Aku ada telanjai, lalu aku deka mati telanjai. TUHAN udah meri, lalu TUHAN udah ngambi. Pujika nama TUHAN!’’

    Dalam semua utai nya, Jop enda bedosa, laban iya enda besalah Allah Taala.

    Masmur Entara:

    Masmur 17: 1, 2 - 3, 6 - 7

    Saut (peda 6): Singitka pending Nuan ngagai aku, lalu pendingka jaku aku.

    Ke Satu
    O TUHAN, pendingka aku ke minta atur ti lurus. Pendingka sabak aku ke minta tulung! Dingaka sampi aku, laban sampi aku endang amat.

    Saut: Singitka pending Nuan ngagai aku, lalu pendingka jaku aku.

    Ke Dua
    Nuan deka kasihka aku lebuh Nuan ngakim aku, laban Nuan nemu utai ti ngena. Nuan nemu ati aku, Nuan udah datai ngagai aku lebuh malam hari. Nuan udah meresa semua ati aku lalu nadai tetemuka pengingin ti jai dalam aku.

    Saut: Singitka pending Nuan ngagai aku, lalu pendingka jaku aku.

    Ke Tiga
    Aku besampi ngagai Nuan, O Allah Taala, laban Nuan nyaut aku. Nya alai singitka pending Nuan ngagai aku, lalu pendingka jaku aku. Pandangka pengerindu Nuan ti manah, lalu selamatka aku. Lebuh aku ngimbai Nuan, aku likun ari munsuh.

    Saut: Singitka pending Nuan ngagai aku, lalu pendingka jaku aku.

    Alleluia (peda Mark 10: 45)

    Alleluia, alleluia
    Anak Mensia udah datai deka mela
    lalu nyerahka nyawa Diri kena nebus orang mayuh.
    Alleluia.

    Bacha Injil:

    Luke 9: 46 - 50

    Sida murid betalatka enggau pangan diri pasal sapa ari bala sida ke pemadu besai.

    Tang Jesus nemu peragam ati sida, lalu Iya ngambi siku anak mit, ngasuh iya bediri ngimbai Iya, lalu bejaku ngagai sida, “Barang sapa nerima anak mit tu dalam nama Aku, nerima Aku, lalu barang sapa nerima Aku, nerima Iya ke ngirumka Aku. Laban orang ke pemadu mit ba bala kita, nya meh orang ke pemadu besai.”

    John lalu nyaut, “Pengajar, kami bisi udah meda orang siku muru antu dalam nama Nuan, lalu kami nguji nagang iya, laban iya enda nitihka kitai.”

    Tang ku Jesus bejaku ngagai iya, “Anang nagang iya, laban orang ke enda ngelaban kita, setanah enggau kita.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads