12 October 2018 - Hari Lima ba Minggu Ke Dua Puluh Tujuh Musim Selama - Berita Iban Online

Header Ads

  • Baru Nyadi

    12 October 2018 - Hari Lima ba Minggu Ke Dua Puluh Tujuh Musim Selama

    Lebuh Jesus udah muru antu, sekeda orang mayuh bejaku, “Iya muru antu ngena kuasa Belsebup, ti raja antu.”
    12 October 2018 - Hari Lima ba Minggu Ke Dua Puluh Tujuh Musim Selama

    Bacha Ke Satu:

    Galatia 3: 7 - 14

    Menyadi:
    Nya alai, ari nya kita nemu, semina orang ke arap aja ke nyadi peturun Abraham.

    Lalu Bup Kudus nemu Allah Taala deka ngaga orang bansa bukai lurus ulih pengarap, nya alai Berita Manah nya udah dulu dipadahka ngagai Abraham:

    “Semua bansa deka diberekatka nengah nuan.”

    Nya alai, orang ke arap deka diberekatka sama enggau Abraham ke arap.

    Semua orang ke manggaika diri ba Adat, ditinggang sumpah; laban endang udah ditulis,

    “Tulah meh semua orang ke enda nitih sereta enda ngasika semua utai ti ditulis dalam Bup Adat!”

    Nya alai utai tu terang: nadai orang digaga lurus di mua Allah Taala ulih Adat laban

    “Orang ke lurus deka idup ngena pengarap.”

    Tang Adat ukai bepanggai ba pengarap, laban, “Orang ke ngereja semua utai nitihka Adat, deka idup nitihka Adat.”

    Kristus nebus kitai ari sumpah ti dibai Adat, laban Iya udah nejuka Diri ditinggang sumpah ngarika kitai, laban endang udah ditulis,

    “Tulah meh semua orang ke digantung ari kayu,” 

    ngambika, ulih Jesus Kristus, berekat ti diberi ngagai Abraham tau diberi ngagai orang bansa bukai, ngambika kitai, ulih pengarap, tau nerima Roh Kudus ti udah disemaya.

    Masmur Entara:

    Masmur 111: 1B - 2, 3 - 4, 5 - 6

    Saut (peda 5): TUHAN endang seruran ingatka sempekat Iya belama iya.

    Ke Satu
    Aku deka meri terima kasih ngagai TUHAN enggau pengabis ati aku 
    lebuh nembiak Iya begempuru bebala mayuh. Naka meh pemadas pengawa TUHAN, ti deka dipelajarka semua orang ke gagit ati ke utai nya.

    Saut: TUHAN endang seruran ingatka sempekat Iya belama iya.

    Ke Dua
    Semua utai ti dikereja Iya penuh laban basa enggau puji, lalu pengelurus Iya meruan belama iya. Iya udah ngasuh pengawa Iya ti badas dikingatka; TUHAN endang nelap sereta kasih.

    Saut: TUHAN endang seruran ingatka sempekat Iya belama iya.

    Ke Tiga
    Iya meri pemakai ngagai orang ke nangika Iya. Iya endang seruran ingatka sempekat Iya. Iya udah mandangka kuasa pengawa Iya ngagai bala nembiak Iya lebuh Iya meri menua orang bansa bukai ngagai sida.

    Saut: TUHAN endang seruran ingatka sempekat Iya belama iya.

    Alleluia (peda John 12: 31B - 32)

    Alleluia, alleluia

    Orang ke merintah dunya tu deka diburu,
    lalu lebuh Aku diangkatka ari dunya, 
    Aku deka ngaul semua orang ngagai Aku Empu, ku TUHAN.

    Alleluia.

    Bacha Injil:

    Luke 11: 15 - 26

    Lebuh Jesus udah muru antu, sekeda orang mayuh bejaku, “Iya muru antu ngena kuasa Belsebup, ti raja antu.”

    Sida ti bukai majak minta Iya ngayanka tanda ari serega, kena sida nguji Iya Tang Jesus nemu peragam ati sida, lalu ku Iya bejaku ngagai sida, “Semua perintah ti bepechah-belah lalu beripih ngelaban diri empu, deka rusak, lalu ruang bilik ti bepechah-belah, deka alah.

    Enti Sitan bepechah-belah lalu ngelaban diri empu, baka ni ku perintah nya ulih tan? Laban kita ngumbai Aku muru antu ngena kuasa Belsebup.

    Enti Aku muru antu ngena kuasa Belsebup, ngena kuasa sapa murid kita muru antu? Nya alai sida empu deka nyadi hakim kita.

    Tang enti Aku muru antu ngena kuasa Allah Taala, nya nunjukka Perintah Allah Taala udah datai ba kita.

    Lebuh orang ke kering, ke chukup disikap enggau senyata, nyaga rumah iya, semua reta tengkira iya likun magang.

    Tang lebuh orang ke kering agi ari iya, nyerang lalu ngalahka iya, orang nya deka ngerampas senyata ti dikarapka iya, lalu magi perapasan iya.

    Barang sapa enda setanah enggau Aku, ngelaban Aku, lalu barang sapa enda enggau Aku ngempuru, mambar.

    “Lebuh roh ti jai udah pansut ari orang, iya bejalai segau-segau nengah menua ti rangkai, ngiga endur alai belelak. Lebuh iya nadai tetemuka endur nya, iya lalu bejaku, ‘Aku deka pulai baru ngagai rumah aku ti udah ditinggalka aku.’ Lebuh iya datai, iya nemu rumah nya udah disapu sereta dikemas. Iya lalu pansut, lalu mai tujuh iku roh ti bukai ti lebih jai agi ari iya empu. Sida tama lalu diau dia, lalu ke pengujung iya, pendiau orang nya jai agi ari ti dulu.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads