14 October 2018 - Hari Minggu Ke Dua Puluh Lapan Musim Selama - Berita Iban Online

Header Ads

  • Baru Nyadi

    14 October 2018 - Hari Minggu Ke Dua Puluh Lapan Musim Selama

    “Pengajar ti manah, nama utai ti enda tau enda dikereja aku ngambika aku bulih pengidup ti meruan belama iya?”
    14 October 2018 - Hari Minggu Ke Dua Puluh Lapan Musim Selama

    Bacha Ke Satu:

    Penemu Dalam Solomon 7: 7 - 11

    Laban aku nemu diri empu endang mensia, nya alai aku besembiang, lalu diberi pemereti, lalu roh Penemu-dalam datai ngagai aku. 

    Aku ngira iya lebih tinggi ari penuduk tauka makuta raja. Pengeraja nadai banding enggau iya. 

    Pemesai reti Penemu-dalam jauh lebih ari batu intan; semua mas dalam dunya baka segenggam pasir ti dibanding enggau Penemu-dalam, lalu pirak baka tanah dibanding enggau iya. 

    Aku ngira iya lebih agi ari pengerai enggau pemanah gamal. Penampak iya enda nemu kelabur. Aku sigi milih iya ari penampak bukai.

    Lebuh Penemu-dalam datai ngagai aku, semua utai ti manah sama datai enggau iya. Iya mai ngagai aku mayuh macham pengeraja.

    Masmur Entara:

    Masmur 90: 12 - 13, 14 - 15, 16 - 17

    Saut (peda 14): Isi kami enggau pengerindu Nuan, O TUHAN, lalu kami deka belagu gaga ati.

    Ke Satu
    Ajar kami pasal pemandak umur kami, 
    ngambika kami tau nyadi orang ke pintar. Ni pengelama Nuan agi ringat? Kasihka kami ke nembiak Nuan, O TUHAN!

    Saut: Isi kami enggau pengerindu Nuan, O TUHAN, lalu kami deka belagu gaga ati.

    Ke Dua
    Isi kami genap pagi enggau pengerindu Nuan ti meruan belama iya, ngambika kami ulih belagu lalu gaga ati sepemanjai umur kami. Beri kami diatu pengelantang 
    ngenyampau penusah ti udah diberi Nuan ngagai ati kami dalam berapa taun kami ke natka diri merinsa.

    Saut: Isi kami enggau pengerindu Nuan, O TUHAN, lalu kami deka belagu gaga ati.

    Ke Tiga
    Awakka kami ke nembiak Nuan, meda pengawa Nuan ti besai. Awakka peturun kami meda pemesai kuasa mulia Nuan. O TUHAN Allah Taala kami, awakka berekat Nuan seruran enggau kami. Asuh kami mujur dalam semua utai ti dikereja kami!

    Saut: Isi kami enggau pengerindu Nuan, O TUHAN, lalu kami deka belagu gaga ati.

    Bacha Ke Dua:

    Hebrew 4: 12 - 13

    Menyadi:
    Laban jaku Allah Taala idup sereta bekuasa, tajam agi ari pedang ti bemata dua, ti ngerejang datai ke iya nyeraraka semengat ari roh, nyeraraka buku tulang ari untak tulang; iya ulih ngakim runding enggau niat ati mensia.

    Nadai utai ulih dipelalaika ari Allah Taala. Semua deka dikebak lalu diayanka magang di mua Iya. Lalu semua kitai enda tau enda madahka pasal diri empu ngagai Iya.

    Alleluia (peda Matthew 5: 3)

    Alleluia, alleluia

    Beberekat meh orang ke seranta dalam roh, laban Perintah serega endang enggi sida.

    Alleluia.

    Bacha Injil:

    Mark 10: 17 - 30

    Lebuh Jesus baru deka mupuk, siku lelaki belanda datai lalu besugang di mua Iya, lalu nanya, “Pengajar ti manah, nama utai ti enda tau enda dikereja aku ngambika aku bulih pengidup ti meruan belama iya?”

    Ku Jesus bejaku ngagai iya, “Nama kebuah nuan ngumbai Aku manah? Nadai orang ke manah. Semina Allah Taala siku aja manah.

    Nuan nemu pesan: 
    ‘Anang munuh orang; 
    Anang butang; 
    Anang ngenchuri; 
    Anang betenahka orang; 
    Anang nipu orang; 
    Bebasaka apai indai nuan.’”

    Orang nya lalu nyaut, “Pengajar, semua pesan nya udah dititihka aku magang kenyau ari aku agi biak.”

    Jesus merening ngagai iya, rinduka iya, lalu bejaku ngagai iya, “Siti utai apin dikereja nuan. Mupuk nuan lalu jual semua utai ti dikemisi nuan, lalu beri ngagai orang ke seranta. Nya baru nuan bisi pengaya di serega. Udah nya titihka Aku.”

    Lebuh lelaki nya ninga nya, mua iya lalu bebali tusah lalu mupuk ari endur nya enggau ati ti balat tusah, laban iya kaya bendar.

    Jesus lalu malik kiba kanan, lalu bejaku ngagai sida murid Iya, “Mar amat meh orang ke kaya tama ngagai Perintah Allah Taala!”

    Sida murid tusah ati ninga nya, tang ku Jesus bejaku ngagai sida, “Anak, mar amat meh tama ngagai Perintah Allah Taala! Nyamai agi jelu unta tama nengah lubang jarum ari orang ke kaya tama ngagai Perintah Allah Taala.”

    Sida lalu balat amat alit ati, lalu bejaku enggau pangan diri, “Enti pia, sapa ulih diselamatka?”

    Jesus merening ngagai sida, lalu bejaku, 
    “Ba mensia, utai tu enda ulih, tang ba Allah Taala utai tu enda baka nya, laban ba Allah Taala semua utai ulih magang.”

    Peter lalu belabuh bejaku enggau Iya, 
    “Peda Nuan, kami udah ninggalka semua utai, lalu nitihka Nuan.”

    Ku Jesus bejaku, “Enggau bendar Aku madah ngagai kita, nadai orang ke udah ninggalka rumah, tauka menyadi lelaki, tauka menyadi indu, tauka indai, tauka apai, tauka anak, tauka tanah, ketegal Aku, enggau ketegal Berita Manah, enda nerima seratus kali lipat mayuh agi ba maya ti diatu -- rumah, menyadi lelaki, enggau menyadi indu, indai, anak, enggau tanah, sereta kena perinsa -- lalu dalam dunya ti deka datai, bulih pengidup ti meruan belama iya.”

    Tauka:

    Mark 10: 17 - 27

    Lebuh Jesus baru deka mupuk, siku lelaki belanda datai lalu besugang di mua Iya, lalu nanya, “Pengajar ti manah, nama utai ti enda tau enda dikereja aku ngambika aku bulih pengidup ti meruan belama iya?”

    Ku Jesus bejaku ngagai iya, 
    “Nama kebuah nuan ngumbai Aku manah? Nadai orang ke manah. Semina Allah Taala siku aja manah.

    Nuan nemu pesan: 
    ‘Anang munuh orang; 
    Anang butang; 
    Anang ngenchuri; 
    Anang betenahka orang; 
    Anang nipu orang; 
    Bebasaka apai indai nuan.’

    Orang nya lalu nyaut, “Pengajar, semua pesan nya udah dititihka aku magang kenyau ari aku agi biak.”

    Jesus merening ngagai iya, rinduka iya, lalu bejaku ngagai iya, “Siti utai apin dikereja nuan. Mupuk nuan lalu jual semua utai ti dikemisi nuan, lalu beri ngagai orang ke seranta. Nya baru nuan bisi pengaya di serega. Udah nya titihka Aku.”

    Lebuh lelaki nya ninga nya, mua iya lalu bebali tusah lalu mupuk ari endur nya enggau ati ti balat tusah, laban iya kaya bendar.

    Jesus lalu malik kiba kanan, lalu bejaku ngagai sida murid Iya, “Mar amat meh orang ke kaya tama ngagai Perintah Allah Taala!”

    Sida murid tusah ati ninga nya, tang ku Jesus bejaku ngagai sida, “Anak, mar amat meh tama ngagai Perintah Allah Taala! Nyamai agi jelu unta tama nengah lubang jarum ari orang ke kaya tama ngagai Perintah Allah Taala.”

    Sida lalu balat amat alit ati, lalu bejaku enggau pangan diri, “Enti pia, sapa ulih diselamatka?”

    Jesus merening ngagai sida, lalu bejaku, 
    “Ba mensia, utai tu enda ulih, tang ba Allah Taala utai tu enda baka nya, laban ba Allah Taala semua utai ulih magang.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads