15 October 2018 - Hari Satu ba Minggu Ke Dua Puluh Lapan Musim Selama - Berita Iban Online

Header Ads

  • Baru Nyadi

    15 October 2018 - Hari Satu ba Minggu Ke Dua Puluh Lapan Musim Selama

    “Orang ke rebak diatu endang amat jai. Sida minta tanda, tang nadai tanda deka diberi ngagai sida, kelimpah ari tanda Jonah.
    15 October 2018 - Hari Satu ba Minggu Ke Dua Puluh Lapan Musim Selama (Memorial of Saint Teresa of Jesus, Virgin and Doctor of the Church)

    Bacha Ke Satu:

    Galatia 4: 22 - 24, 26 - 27, 31 - 5: 1

    Menyadi:
    Laban endang udah ditulis, Abraham bisi dua iku anak, siku diadaka indu ke ulun, lalu siku diadaka indu ke ukai ulun.

    Anak ke diadaka indu ke ulun nya ada ngena jalai selama, tang anak ke diadaka indu ke ukai ulun, ada nitihka semaya.

    Tu tau diambi nyadika jaku sempama: 
    Indu dua iku nya nandaka dua bengkah sempekat. Siti sempekat nya ari Bukit Sinai, ke ngadaka anak ke deka nyadi ulun. Indu nya Hagar.

    Tang Jerusalem ti di serega nya ukai ulun, lalu iya nya indai kitai.

    Laban endang udah ditulis, “Rami gaga ati meh nuan, indu ke mandul! nuan ke nadai kala beranak, manjung sereta belagu meh nuan ke nadai kala ngasaika pemedis beranak! Laban anak ke diadaka indu ke nadai laki, mayuh agi ari anak ke diadaka indu ke bisi laki.”

    Nya alai, menyadi, kitai tu ukai anak ari indu ke ulun, tang anak ari indu ke ukai ulun.

    Laban Kristus udah ngelepaska kitai ngambika kitai amat-amat dilepaska. Nya alai bediri tegap, lalu anang nejuka diri dikungkung nyadi ulun baru.

    Masmur Entara:

    Masmur 113: 1 - 2, 3 - 4, 5A & 6 - 7

    Saut (peda 2): Puji meh nama TUHAN belama iya.

    Ke Satu
    Puji TUHAN! Kita ke nembiak TUHAN, puji meh nama Iya! Puji meh nama TUHAN kenyau ari diatu datai ke belama iya.

    Saut: Puji meh nama TUHAN belama iya.

    Ke Dua
    Ari timur nyentuk ke barat puji meh nama TUHAN! TUHAN merintah semua bansa, 
    mulia Iya tinggi agi ari langit.

    Saut: Puji meh nama TUHAN belama iya.

    Ke Tiga
    Nadai orang sebaka enggau TUHAN Allah Taala kitai. Iya nilik ke baruh deka meda langit enggau dunya. Iya ngasuh orang ke seranta diau lantang. Iya ngelepaska orang ke suntuk ari pemerinsa sida.

    Saut: Puji meh nama TUHAN belama iya.

    Alleluia (peda Masmur 95: 7C - 8A)

    Alleluia, alleluia
    Sehari tu dingaka utai ti disebut Iya: Anang kieh.
    Alleluia.

    Bacha Injil:

    Luke 11: 29 - 32

    Lebuh orang nyau majak mayuh-semayuh, Jesus lalu belabuh bejaku,

    “Orang ke rebak diatu endang amat jai. Sida minta tanda, tang nadai tanda deka diberi ngagai sida, kelimpah ari tanda Jonah.

    Laban baka Jonah ke nyadika tanda ke orang Nineweh, baka nya meh Anak Mensia deka nyadika tanda ke orang ke rebak diatu.

    Lebuh Hari Pechara ila, kuin ari menua ti di Selatan deka bediri sama enggau orang ke rebak diatu, lalu besalah sida, laban iya udah datai ari tisi dunya deka mendingka penemu-dalam Solomon.

    Tang peda, utai ti besai agi ari Solomon bisi ditu diatu.

    Lebuh Hari Pechara ila orang Nineweh deka bediri sama enggau rebak ti diatu, lalu besalah sida, laban orang Nineweh empu udah nesal ati ke dosa sida, lebuh sida mendingka jaku ti dipadahka Jonah. Tang peda, utai ti besai agi ari Jonah bisi ditu diatu!”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads