17 October 2018 - Hari Tiga ba Minggu Ke Dua Puluh Lapan Musim Selama - Berita Iban Online

Header Ads

  • Baru Nyadi

    17 October 2018 - Hari Tiga ba Minggu Ke Dua Puluh Lapan Musim Selama

    Lalu ku Jesus bejaku, “Tulah meh kita pengajar Adat! Laban kita ngengkahka ma ti mar dibai ba orang, tang kita empu enggai enchukirka tunjuk nulung sida mai ma nya.”
    17 October 2018 - Hari Tiga ba Minggu Ke Dua Puluh Lapan Musim Selama (Memorial of Saint Ignatius of Antioch, Bishop and Martyr)

    Bacha Ke Satu: Galatia 5: 18 - 25

    Menyadi:
    Enti kita diiring Roh Kudus, kita ukai diperintah Adat.

    Utai ti dikereja mensia endang nyata: 
    bambai, runding ti kamah, kereja ti kamah, besembahka engkeramba, bemanang, bemunsuh, charut enggau pangan diri, kepapas, belaya, bepechah-belah, beripih, ngining orang, pemabuk, berami enda beiga-iga, enggau utai ti baka nya. 

    Aku meri kita jaku tangkan, baka ti udah dikereja aku suba: 

    Orang ke ngereja utai nya enda ulih bempu Perintah Allah Taala.

    Tang buah Roh Kudus nya pengerindu, pengaga, pemaik, pengeliat ati, penyiru, pemadas, penetap ati, penelap, ulih nagang diri. 

    Nadai adat ngelaban utai nya.
    Lalu orang ke enggi Jesus Kristus, udah ngeregang tubuh sama enggau penenguk enggau pengingin iya.

    Enti kitai idup nitihka Roh Allah Taala, awakka Roh nya meh ngiring kitai.

    Masmur Entara: Masmur 1: 1 - 2, 3, 4 & 6

    Saut (peda John 8: 12): Barang sapa nitihka Nuan, TUHAN, deka ngembuan penampak ti meri pengidup.

    Ke Satu
    Beberekat meh orang ti enda nitihka penemu orang ke jai, lalu enda nitihka teladan orang ke bedosa ti enda begulai enggau orang ke ngeleseka Allah Taala,tang gaga ati ke Adat TUHAN, lalu belematika Adat nya siang malam.

    Saut: Barang sapa nitihka Nuan, TUHAN, deka ngembuan penampak ti meri pengidup.

    Ke Dua
    Orang nya baka kayu ti ditanam ba tebing sungai, ti bebuah ninting musin lalu daun iya nadai kala layu. Iya mujur dalam semua utai ti dikereja iya.

    Saut: Barang sapa nitihka Nuan, TUHAN, deka ngembuan penampak ti meri pengidup.

    Ke Tiga
    Tang orang ke jai enda baka nya. 
    Iya baka rumput ti rangkai ti dikebuka ribut. Laban TUHAN deka ngintu orang ke lurus, tang jalai pengidup orang ke jai deka dirusak.

    Saut: Barang sapa nitihka Nuan, TUHAN, deka ngembuan penampak ti meri pengidup.

    Alleluia (peda John 10: 27)

    Alleluia, alleluia

    Bedus Aku mendingka nyawa Aku, ku TUHAN;Aku ngelala sida, lalu sida nitihka Aku.

    Alleluia.

    Bacha Injil: Luke 11: 42 - 46

    Ku TUHAN: “Tulah meh kita orang Parisi! Kita meri sepuluh peratus ari rempah kita, baka telasih, daun rempah, enggau semua macham rempah ti bukai, tang kita enggai ngereja pengelurus, enggau pengerindu Allah Taala. 

    Nya utai ti patut dikereja kita, tang anang nejuka utai bukai nya enda dikereja.

    Tulah meh kita orang Parisi! Laban kita rindu duduk ba penuduk ti pemadu manah dalam balai gempuru, lalu rindu ditabi orang ba sebelah pasar.

    Tulah meh kita! Laban kita tu baka kubur ti enda dikelai, lalu kena lunjak orang, lalu sida enda nemu diri udah ngelunjak nya.”

    Siku pengajar adat lalu nyaut Iya, “Pengajar, lebuh Nuan nyebut nya, Nuan mega ngeleseka kami!”

    Lalu ku Jesus bejaku, “Tulah meh kita pengajar Adat! Laban kita ngengkahka ma ti mar dibai ba orang, tang kita empu enggai enchukirka tunjuk nulung sida mai ma nya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads