20 October 2018 - Hari Enam ba Minggu Ke Dua Puluh Lapan Musim Selama - Berita Iban Online

Header Ads

  • Baru Nyadi

    20 October 2018 - Hari Enam ba Minggu Ke Dua Puluh Lapan Musim Selama

    Ku Jesus bejaku ngagai sida murid Iya: “Aku madah ngagai kita, genap iku orang ke ngaku Aku di mua orang, deka diaku Anak Mensia di mua bala melikat Allah Taala.
    20 October 2018 - Hari Enam ba Minggu Ke Dua Puluh Lapan Musim Selama

    Bacha Ke Satu: Epesus 1: 15 - 23
    Menyadi:

    Aku bisi udah ninga pasal pengarap kita ke Tuhan Jesus, enggau pasal pengerindu kita ke semua nembiak Tuhan. Nya kebuah aku enda ngetu-ngetu meri terima kasih ke kita lebuh aku ngingatka kita dalam sampi aku.

    Aku besampi minta Apai ti bemulia, Allah Taala Jesus Kristus, meri kita Roh penemu-dalam enggau pemandang ngambika kita lebih agi nemu Iya.

    Aku mega besampi ngambika mata ati kita diberi penerang, ngambika kita nemu pengadang, laban kita udah dikangauka ngagai pengadang nya, iya nya pemayuh pesaka ti bemulia ti disedia Iya ke bala nembiak Iya, enggau pemesai kuasa Iya ti nadai banding, ke kitai ti arap.

    Kuasa nya sebaka enggau kuasa ti besai ti udah dikena Iya ngangkatka Kristus ari mati, lalu nudukka Iya muak ari kanan Iya Empu di serega, jauh ari atas semua adat enggau pemerintah, kuasa, enggau perintah, enggau ari atas semua nama, ukai semina di dunya tu, tang mega di dunya ti deka datai.

    Lalu Iya udah ngengkahka semua utai di baruh kaki Kristus, lalu udah ngeletak Iya ari atas semua utai, ke penguntung eklisia.

    Eklisia nya tubuh Kristus, ti penuh laban semua personaliti Kristus Empu ke menuhka semua utai di semua endur.

    Masmur Entara:

    Masmur 8: 1 - 2AB, 3 - 4, 5 - 6

    Saut (6a): Nuan udah ngasuh Anak Nuan merintah semua utai ti digaga Nuan.

    Ke Satu
    O TUHAN, ti TUHAN kami. Naka meh pemesai kuasa nama Nuan di serata dunya! Nuan ke bempu mulia ti tinggi ngilah langit, ke dipuji bala nembiak enggau bala anak mit. Nuan udah ngaga kuta kena Nuan ngelaban munsuh Nuan.

    Saut: Nuan udah ngasuh Anak Nuan merintah semua utai ti digaga Nuan.

    Ke Dua
    Lebuh aku engkadah ke langit ti udah digaga Nuan, engkadah ngagai bulan enggau bintang ti udah di atur Nuan,
    aku lalu nanya: ‘Sapa mensia, alai Nuan deka bedulika sida? Sapa anak mensia, alai Nuan deka ibuhka sida?’

    Saut: Nuan udah ngasuh Anak Nuan merintah semua utai ti digaga Nuan.

    Ke Tiga
    Tang taja pia, Nuan udah ngaga iya semina baruh mimit ari Nuan Empu, lalu Nuan udah meri iya mulia enggau basa nyadika makota iya. Nuan udah ngasuh iya merintah semua utai ti digaga Nuan; Nuan udah ngengkahka semua utai di baruh kaki Iya.

    Saut: Nuan udah ngasuh Anak Nuan merintah semua utai ti digaga Nuan.

    Alleluia (peda John 15: 26B, 27A)

    Alleluia, alleluia
    Roh pemendar deka besaksika pasal Aku, ku TUHAN, alu kita mega enda tau enda besaksika pasal Aku.
    Alleluia.

    Bacha Injil: Luke 12: 8 - 12

    Ku Jesus bejaku ngagai sida murid Iya: “Aku madah ngagai kita, genap iku orang ke ngaku Aku di mua orang, deka diaku Anak Mensia di mua bala melikat Allah Taala.

    Tang barang sapa besangkalka Aku di mua orang, deka disangkal Anak Mensia di mua bala melikat Allah Taala.

    “Lalu genap iku orang ke bejaku ngelaban Anak Mensia, deka diampun, tang barang sapa bejaku busung ngelaban Roh Kudus, enda diampun.

    Lebuh sida mai kita ngagai balai gempuru, ngambika kita kena pechara di mua raja, di mua orang ke megai perintah, anang irauka jalai kita deka nyaut sida, tauka utai ti deka disebut kita, laban Roh Kudus deka ngajar kita, ba jam nya, utai ti patut disebut kita.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads