23 October 2018 - Hari Dua ba Minggu Ke Dua Puluh Sembilan Musim Selama - Berita Iban Online

Header Ads

  • Baru Nyadi

    23 October 2018 - Hari Dua ba Minggu Ke Dua Puluh Sembilan Musim Selama

    Ku Jesus bejaku ngagai sida murid Iya: “Seruran besedia, lalu awakka lampu kita seruran menyadi belama, baka orang gaji ke nganti tuan sida pulai ari gawai tikah, ngambika sida ulih muka pintu ke iya, lebuh iya datai lalu nekung pintu.
    23 October 2018 - Hari Dua ba Minggu Ke Dua Puluh Sembilan Musim Selama

    Bacha Ke Satu: Epesus 2: 12 - 22

    Menyadi:
    Ingat, dulu suba kita nadai Kristus, diseraraka ari bansa orang Israel, nadai ungkup dalam sempekat, nadai pengadang, lalu nadai Allah Taala di dunya tu. 

    Tang diatu, dalam Jesus Kristus, kita ke udah diau jauh suba, udah dibai semak, ulih darah Kristus. 

    Laban Kristus Empu nyadika pemaik kitai. Ngena tubuh Iya Empu, Iya udah ngaga orang Judah enggau orang bansa bukai nyadi siku, lalu udah ngeruntuhka dinding pemenchi ti nyeraraka kitai. 

    Iya udah muai Adat enggau semua pesan enggau atur ti dalam Adat, ngambika Iya, dalam Iya Empu, ngaga siti aja bansa kena Iya nganti dua bengkah bansa nya, lalu mai pemaik ngagai sida. 

    Iya lalu mai bansa dua bengkah nya bebaik enggau Allah Taala, dalam siti tubuh, ulih kayu regang, lalu munuh ati sida ti seruran deka bemunsuh enggau pangan diri. 

    Nya alai Kristus datai lalu madahka pemaik ngagai kita ke jauh ari Allah Taala, enggau ngagai orang Judah ke semak Iya, laban ulih Kristus, kitai sama ulih datai ngagai Apai ulih siku Roh. 

    Nya alai, kita ukai temuai agi, ukai orang kampar agi, tang sama nyadi peranak enggau bala nembiak Tuhan, nyadi raban ruang bilik Allah Taala. 

    Ruang bilik nya didirika ba atas pugu ti didudukka sida rasul enggau sida nabi, lalu Jesus Kristus Empu nyadika batu pemun nya. 

    Dalam Iya semua perengka rumah nya dipejantilka lalu mansang nyadi rumah sembiang ti kudus dalam Tuhan. 

    Lalu dalam Iya kita mega didirika nyadi rumah alai Roh Allah Taala diau.

    Masmur Entara:

    Masmur 85: 8AB - 9, 10 - 11, 12 - 13

    Saut (peda 8): TUHAN besemaya deka meri pemaik ngagai nembiak Iya.

    Ke Satu
    Aku mendingka utai ti disebut TUHAN Allah Taala. Iya besemaya deka meri pemaik ngagai kitai ke nembiak Iya. Iya tentu sedia deka ngelepaska orang ke ngemesaika Iya, lalu mulia Iya deka diau di menua kitai.

    Saut: TUHAN besemaya deka meri pemaik ngagai nembiak Iya.

    Ke Dua
    Pengerindu enggau penetap ati deka betemu. Pengelurus enggau pemaik deka beberap. Penaluk mensia deka niki ari dunya, lalu pengelurus Allah Taala deka nilik ke baruh ari serega.

    SautTUHAN besemaya deka meri pemaik ngagai nembiak Iya.

    Ke Tiga
    TUHAN deka ngasuh kitai nyadi kaya-raja, lalu kitai deka bulih ngetau. Pengelurus deka bejalai dulu ari TUHAN 
    lalu nyendiaka jalai Iya.

    SautTUHAN besemaya deka meri pemaik ngagai nembiak Iya.

    Alleluia (peda Luke 21: 36)

    Alleluia, alleluia
    Bejaga berari lalu besampi 
    ngambika kita bisi pengering bediri di mua Anak Mensia.
    Alleluia.

    Bacha Injil:

    Luke 12: 35 - 38

    Ku Jesus bejaku ngagai sida murid Iya: “Seruran besedia, lalu awakka lampu kita seruran menyadi belama, baka orang gaji ke nganti tuan sida pulai ari gawai tikah, ngambika sida ulih muka pintu ke iya, lebuh iya datai lalu nekung pintu.

    Beberekat meh orang gaji ke ditemu tuan sida enda tinduk lebuh iya datai. Enggau bendar Aku madah ngagai kita, iya deka nyendiaka diri, lalu ngasuh sida belatur duduk, lalu mela sida.

    Beberekat meh orang gaji nya enti tuan sida tetemuka sida udah sedia, lebuh iya datai ba urung tengah malam tauka ba urung dini hari.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads