3 October 2018 - Hari Tiga ba Minggu Ke Dua Puluh Enam Musim Selama - Berita Iban Online

Header Ads

  • Baru Nyadi

    3 October 2018 - Hari Tiga ba Minggu Ke Dua Puluh Enam Musim Selama

    Siku ti bukai bejaku, “Aku deka nitihka Nuan, Tuhan, tang awakka aku meri selamat tinggal ngagai kami sebilik dulu.”
    3 October 2018 - Hari Tiga ba Minggu Ke Dua Puluh Enam Musim Selama

    Bacha Ke Satu:

    Jop 9: 1 - 12, 14 - 16

    Ko Jop:
    Sigi amat. Aku bisi udah ninga semua utai nya suba. Tang baka ni ku mensia tau menang bechara ngelaban Allah Taala?

    Kati mensia ulih bekelikuh enggau Iya? Iya tau nanyaka seribu macham tanya ti enda ulih disaut.

    Allah Taala endang bepenemu-dalam sereta besai kuasa. Nadai orang tan ngelaban Iya.

    Iya enda madahka Diri lebuh Iya nginsitka bukit lalu ngeruntuhka sida lebuh Iya ringat.

    Allah Taala ngasuh tanah berenyang, lalu ngasuh tanah belinggang. Iya nguyat tiang ti nungkat dunya.

    Iya ulih nagang mata hari tumbuh, ulih nagang bintang manchar lebuh malam hari.

    Nadai orang nulung Allah Taala mintarka langit tauka ngelunjak belakang naga tasik.

    Allah Taala ngantung Bintang Tiga di langit, Bintang Banyak, Bintang Tujuh, enggau Bintang Selatan.

    Kitai enda meretika utai ti dikereja Iya, lalu kereja ajih Iya endang enda nemu abis.

    Allah Taala mansa, tang aku enda ulih meda Iya.

    Iya ngambi utai ti dikedekaka Iya, lalu nadai orang ulih nagang Iya. Nadai orang berani nanya Iya, “Nama utai ti dikereja Nuan?’’

    Nya alai, nama leka jaku kena aku nyaut Allah Taala?

    Taja pen aku nadai penyalah, aku semina ulih minta kasih ari Allah Taala ti Hakim aku.

    Tang taja pia, enti sema Iya ngasuh aku bejaku, enda meh aku arapka Iya deka mendingka aku.

    Masmur Entara:

    Masmur 88: 9BC - 10, 11 - 12, 13 - 14

    Saut (peda 2): Dingaka sampi aku, O TUHAN.

    Ke Satu
    O TUHAN, tiap hari aku ngangauka Nuan 
    lalu ngangkatka jari aku besampi. Kati Nuan ngereja kereja ajih ke orang ke mati? Kati sida ke mati angkat lalu muji Nuan?

    Saut: Dingaka sampi aku, O TUHAN.

    Ke Dua
    Kati pengerindu Nuan ti meruan belama iya bisi dikenang dalam kubur? Kati penetap ati Nuan dikenang ba endur alai pengerusak? Kati kereja ajih Nuan bisi dipeda ba endur ti petang nya? Kati pemadas Nuan bisi ditemu di dunya pemati?

    Saut: Dingaka sampi aku, O TUHAN.

    Ke Tiga
    O TUHAN, aku ngangauka Nuan minta tulung. Tiap pagi aku besampi ngagai Nuan.Nama kebuah Nuan nulak aku, O TUHAN? Nama kebuah Nuan ninggalka aku?

    Saut: Dingaka sampi aku, O TUHAN.

    Alleluia (peda Pilipi 3: 8 - 9)

    Alleluia, alleluia
    Aku ngira semua utai nya uras magang, 
    ngambika aku tau bempu Kristus, lalu diau dalam Iya.
    Alleluia.

    Bacha Injil:

    Luke 9: 57 - 62

    Lebuh sida benung di rantau jalai, siku orang bejaku ngagai Jesus, “Aku deka nitihka Nuan, ngagai sebarang endur Nuan bejalai.”

    Jesus lalu bejaku ngagai iya, “Munsang bisi lubang, lalu burung bisi tansang, tang Anak Mensia nadai endur alai ngalika Diri.”

    Ku Iya bejaku ngagai siku ti bukai, “Titihka Aku.” Tang ku orang nya bejaku, “Tuan, awakka aku pulai dulu lalu nguburka apai aku.”

    Tang ku Jesus bejaku ngagai iya, “Awakka orang ke mati, nguburka bala sida empu ke mati. Tang nuan empu enda tau enda bejalai lalu nusui pasal Perintah Allah Taala.” 

    Siku ti bukai bejaku, “Aku deka nitihka Nuan, Tuhan, tang awakka aku meri selamat tinggal ngagai kami sebilik dulu.”

    Ku Jesus bejaku ngagai iya, “Orang ke belabuh ngeradu tanah lalu malik kebelakang, enda tau nyadi nembiak Perintah Allah Taala.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads