4 October 2018 - Hari Empat ba Minggu Ke Dua Puluh Enam Musim Selama - Berita Iban Online

Header Ads

  • Baru Nyadi

    4 October 2018 - Hari Empat ba Minggu Ke Dua Puluh Enam Musim Selama

    Udah nya Jesus lalu milih tujuh puluh iku sida ti bukai, lalu ngasuh sida bejalai dulu ari Iya, dua-dua iku begulai, ngagai genap buah nengeri enggau endur ti deka digusung Iya Empu.
    4 October 2018 - Hari Empat ba Minggu Ke Dua Puluh Enam Musim Selama (Memorial of Saint Francis of Assisi)

    Bacha Ke Satu:

    Jop 19: 21 - 27

    Ku Jop:
    Kita tu pangan aku! Kasihka aku! Jari Allah Taala udah nyamah aku.

    Nama kebuah kita merinsaka aku baka chara Allah Taala? Kati kita enda udah chukup merinsaka aku?

    Naka meh pemanah enti orang bisi ngingatka jaku aku lalu nuliska jaku nya dalam bup!

    Tauka nebukka leka jaku nya ba batu ngena pat ngambika tan belama iya.

    Laban aku nemu, aku bisi siku pengari ti idup ti deka bejaku ngarika aku ba pengujung dunya ila.

    Lalu lebuh kulit aku udah abis diempa penyakit, ngena tubuh tu aku deka meda Allah Taala ngimbai aku, lalu mata aku empu deka meda Iya ukai meda orang kampar. Ati enda sabar nganti!

    Masmur Entara:

    Masmur 27: 7 - 8A, 8B - 9ABC, 13 - 14

    Saut (peda 13): Aku nemu diri deka idup lalu meda pemadas TUHAN dalam pengidup tu.

    Ke Satu
    Dingaka aku, TUHAN, lebuh aku ngangauka Nuan! Kasihka aku, lalu saut meh aku! Lebuh Nuan nyebut, ‘Datai kitu lalu sembah Aku.’

    Saut: Aku nemu diri deka idup lalu meda pemadas TUHAN dalam pengidup tu.

    Ke Dua
    Aku deka datai, TUHAN. Anang ngelalaika Diri ari aku! Anang ringat ngagai aku. Anang nulak nembiak Nuan. Nuan udah nulung aku.

    Saut: Aku nemu diri deka idup lalu meda pemadas TUHAN dalam pengidup tu.

    Ke Tiga
    Aku nemu diri deka idup lalu meda pemadas TUHAN dalam pengidup tu. Panggaika pengarap ba TUHAN. Kering sereta berani; Panggaika pengarap ba TUHAN.

    Saut: Aku nemu diri deka idup lalu meda pemadas TUHAN dalam pengidup tu.

    Alleluia (peda Mark 1: 15)

    Alleluia, alleluia
    Perintah Allah Taala nyau semak!
    Nesal ati ke dosa kita, lalu arapka Berita Manah!
    Alleluia.

    Bacha Injil:

    Luke 10: 1 - 12

    Udah nya Jesus lalu milih tujuh puluh iku sida ti bukai, lalu ngasuh sida bejalai dulu ari Iya, dua-dua iku begulai, ngagai genap buah nengeri enggau endur ti deka digusung Iya Empu.

    Ku Iya bejaku ngagai sida, “Utai ti diketau mayuh, tang orang ke ngetau mimit. Nya alai besampi minta orang ke bempu umai ngirumka mayuh agi orang ngetau umai Iya.

    Mupuk meh kita! Ingat, Aku ngasuh kita bejalai baka anak domba ngagai raban ukui kampung.

    Anang mai kandi duit, tauka kambut, tauka selipar. Lalu anang nabi orang di rantau jalai.

    Sebarang rumah alai kita tama, sebut dulu, ‘Awakka pemaik meruan dalam rumah tu.’

    Enti orang ke rinduka pemaik bisi dalam rumah nya, pemaik kita deka mengkang ba orang nya. Enti enda pia, pemaik nya deka pulai baru ngagai kita.

    Diau ba rumah nya, lalu empa irup sebarang utai ti diberi sida ngagai kita, laban orang ke gawa endang patut diberi gaji. Anang mindah ari rumah sebuah ngagai rumah sebuah.

    Genap kali kita datai ba sebuah nengeri, lalu sida nerima kita, empa sebarang utai ti diberi ngagai kita.

    Geraika orang ke sakit dalam nengeri nya, lalu sebut ngagai sida, ‘Perintah Allah Taala udah datai semak kita.’

    Tang genap kali kita tama ngagai nengeri, lalu sida enda nerima kita, bejalai kita nengah jalai raya di nengeri nya lalu sebut, ‘Indah abus ari nengeri kita empu, ti lekat ba kaki kami, deh ditesai kami, kena ngelaban kita. Tang awakka kita nemu tu: Perintah Allah Taala udah datai semak!’

    Aku madah ngagai kita, lebuh Hari Pechara ila, Allah Taala deka lebih agi kasihka Sodom ari ke kasihka nengeri nya!”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads