5 October 2018 - Hari Lima ba Minggu Ke Dua Puluh Enam Musim Selama - Berita Iban Online

Header Ads

  • Baru Nyadi

    5 October 2018 - Hari Lima ba Minggu Ke Dua Puluh Enam Musim Selama

    Barang sapa mendingka kita, mendingka Aku, lalu barang sapa nulak kita, nulak Aku. Lalu barang sapa nulak Aku, nulak Iya ke ngirumka Aku.
    5 October 2018 - Hari Lima ba Minggu Ke Dua Puluh Enam Musim Selama

    Bacha Ke Satu:

    Jop 38: 1, 12 - 21; 40: 3 - 5

    Udah nya TUHAN lalu bejaku ngagai Jop ari biaubalai nya.

    Jop, kati nuan, dalam sepemanjai umur nuan, bisi udah kala ngasuh hari siang?
    Kati nuan udah kala ngasuh merekah pajar merintah dunya lalu ngusak orang ke jai pansut ari endur alai sida ke belalai?

    Penampak mata hari ngasuh bukit enggau lebak ayan nyata baka lepi kain, nyengala baka chop ti ditekanka ba tanah liat.

    Penampak siang hari kelalu terang ke orang ke jai lalu nagang sida ngayanka pemangah sida.

    Kati nuan bisi udah kala bejalai ngagai mata ai ti ba buntut tasik? 

    Kati nuan udah kala bejalai nengah buntut tasik?

    Kati orang bisi udah kala mandangka ngagai nuan pintu ti nyaga dunya pemati ti petang?

    Kati nuan nemu pemesai dunya?

    Padahka ngagai Aku, enti nuan nemu semua utai nya.

    Kati nuan nemu asal penatai penampak tauka asal penatai pemetang?

    Kati nuan ulih madahka ikas entara pemetang enggau penampak, tauka ngasuh seduai iya pulai baru lebuh seduai iya udah datai?

    Aku nemu nuan ulih ngereja nya, laban nuan tuai amat umur lalu nuan endang bisi dia lebuh dunya digaga!

    Ko Jop nyaut TUHAN:

    Aku udah bejaku mapap, TUHAN. Baka ni ku jalai aku nyaut? Aku nadai nemu utai disebut agi.

    Aku udah nyebut lebih ari ti patut.

    Masmur Entara:

    Masmur 139: 1 - 3, 7 - 8, 9 - 10, 13 - 14AB

    Saut (peda 24b): Iring aku TUHAN, niti jalai ti meruan belama iya.

    Ke Satu
    O TUHAN, Nuan udah meresa lalu nemu aku. Nuan nemu semua utai ti dikereja aku; Ari jauh Nuan meda semua runding aku. Nuan meda aku lebuh aku gawa tauka belelak, lalu Nuan nemu semua utai ti dikereja aku.

    Saut: Iring aku TUHAN, niti jalai ti meruan belama iya.

    Ke Dua
    Kini ke tunga aku ulih ngerarika diri ari Nuan? Ngagai ni aku ulih ngerarika diri ari Nuan? Enti aku niki ke serega, Nuan ga bisi dia. Enti aku gali di dunya pemati, Nuan ga bisi dia.

    Saut: Iring aku TUHAN, niti jalai ti meruan belama iya.

    Ke Tiga
    Enti aku terebai lalu diau ba endur ti pemadu jauh, Nuan ga bisi dia nguluka aku, lalu jari kanan Nuan nulung aku.

    Saut: Iring aku TUHAN, niti jalai ti meruan belama iya.

    Ke Empat
    Laban Nuan udah nempa semua perengka tubuh aku; Lalu bejantilka aku dalam kandung indai aku. Aku muji Nuan laban Nuan endang patut dikenangika, laban semua utai ti dikereja Nuan endang nyelai sereta manah magang.

    Saut: Iring aku TUHAN, niti jalai ti meruan belama iya.

    Alleluia (peda Masmur 95: 7C - 8A)

    Alleluia, alleluia
    Sehari tu dingaka utai ti disebut Iya: Anang kieh. Alleluia.

    Bacha Injil:

    Luke 10: 13 - 16

    Ku Jesus bejaku ngagai sida: “Tulah meh nuan, Korasin! Tulah meh nuan, Betsaida!

    Laban enti kereja ajih ti dikereja dalam seduai, udah dikereja di Tire enggau di Sidon, sida tentu lama udah nesal ati, lalu ngerasuka kain guni, lalu ngerabu pala diri enggau amau. 

    Tang lebuh Hari Pechara ila Tire enggau Sidon deka nyamai agi ari kita.

    Lalu nuan, Kapernaum! Kati nuan deka diangkat ke serega? Enda. Nuan deka dibuai ngagai neraka!

    Barang sapa mendingka kita, mendingka Aku, lalu barang sapa nulak kita, nulak Aku. Lalu barang sapa nulak Aku, nulak Iya ke ngirumka Aku.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads