Header Ads

  • Berita Tebaru

    6 October 2018 - Hari Enam ba Minggu Ke Dua Puluh Enam Musim Selama

    Ku Jesus bejaku ngagai sida, “Aku meda Sitan labuh ari langit baka kilat.
    6 October 2018 - Hari Enam ba Minggu Ke Dua Puluh Enam Musim Selama

    Bacha Ke Satu:

    Jop 42: 1 - 3, 5 - 6, 12 - 17

    Udah nya Jop lalu nyaut TUHAN. Ku Jop:

    “TUHAN, Aku nemu Nuan endang bekuasa ari atas semua, lalu Nuan ulih ngereja semua utai ti dikedekaka Nuan.

    Nuan nanyaka kebuah aku kakang ati ke penemu-dalam Nuan taja pen aku nadai nemu utai. Aku bejakuka pasal utai ti enda ditemu aku, pasal utai ti nyelai ti enda ulih ditemu aku.

    Dulu menya, aku semina nemu utai ti dipadahka orang ngagai aku, tang diatu aku udah meda Nuan ngena mata aku empu.

    Nya alai aku malu ke semua utai ti udah disebut aku lalu aku nesal ati lalu ngerabu diri enggau amau enggau abus.”

    TUHAN merekatka pengidup Jop lebuh iya nyau tuai, lebih agi ari ti terubah. Jop bisi empat belas ribu iku jelu bedus, enam ribu iku unta, dua ribu iku jelu sapi, enggau seribu iku keledai.

    Iya bisi tujuh iku anak lelaki enggau tiga iku anak indu.

    Iya meri nama Jemimah ngagai anak indu iya ke tuai, iya ti kedua Kesiah, lalu iya ke pemadu biak Keren-hapuk.

    Nadai indu di serata dunya tu ti bajik agi ari anak indu Jop. Apai sida meri sida ungkup ari pesaka iya, sebaka enggau ungkup ti diberi iya ngagai sida menyadi lelaki sida.

    Udah bekau nya, Jop idup seratus empat puluh taun, lalu meda bala uchu enggau bala ichit diri.

    Iya mati lebuh umur iya nyau tuai amat.

    Masmur Entara:

    Masmur 119: 66, 71, 75, 91, 125, 130

    Saut (peda 135): TUHAN, awakka penampak mua Nuan manchar ngagai aku.

    Ke Satu
    Beri aku penemu enggau runding ti tajam 
    laban aku arapka pesan Nuan.

    Saut: TUHAN, awakka penampak mua Nuan manchar ngagai aku.

    Ke Dua
    Aku untung natka diri kena perinsa, 
    ngambika aku nemu belajarka adat Nuan.

    Saut: TUHAN, awakka penampak mua Nuan manchar ngagai aku.

    Ke Tiga
    Aku nemu atur Nuan endang lurus, O TUHAN, lalu Nuan udah ngukum aku laban Nuan endang tetap ati.

    Saut: TUHAN, awakka penampak mua Nuan manchar ngagai aku.

    Ke Empat
    Semua utai mengkang meruan magang 
    nyentuk ngagai sehari tu laban pesan Nuan, laban semua sida nya endang nembiak Nuan magang.

    Saut: TUHAN, awakka penampak mua Nuan manchar ngagai aku.

    Ke Lima
    Aku tu nembiak Nuan; Asuh aku mereti, 
    ngambika aku nemu adat Nuan.

    Saut: TUHAN, awakka penampak mua Nuan manchar ngagai aku.

    Ke Enam
    Lebuh jaku Nuan diterangka, iya meri penerang; Iya meri penemu ngagai orang ke enda nemu utai.

    Saut: TUHAN, awakka penampak mua Nuan manchar ngagai aku.

    Alleluia (peda Matthew 11: 25)

    Alleluia, alleluia

    Pujika Nuan Apai, Tuhan ke bekuasa di serega enggau di dunya, laban Nuan udah mandangka misteria Perintah ngagai bala anak mit.

    Alleluia.

    Bacha Injil:

    Luke 10: 17 - 24

    Sida tujuh puluh iku pulai enggau ati ti gaga. Ku sida, “Tuhan, indah antu deh ngasika kami dalam nama Nuan!”

    Ku Jesus bejaku ngagai sida, “Aku meda Sitan labuh ari langit baka kilat.

    Dinga kita! Aku udah meri kita kuasa ngindik ular enggau kala, sereta ngalahka kuasa munsuh, lalu nadai utai ulih ngemediska kita.

    Tang anang kita gaga ati ketegal antu nunduk ngagaikita, tang awakka ati kita gaga laban nama kita ditulis di serega.”

    Iya lalu gaga ati dalam roh lalu bejaku, “Aku meri terima kasih ngagai Nuan Apai, Tuhan ti bekuasa di serega enggau di dunya, laban Nuan udah ngelalaika utai nya ari orang ke bepenemu-dalam sereta bepelajar, lalu udah mandangka utai nya ngagai bala anak mit. 

    Sigi amat, Apai, laban nya endang peneka Nuan.

    Semua utai udah diserahka Apai Aku ngagai Aku, lalu nadai orang nemu sapa Anak, semina Apai aja; tauka nemu sapa Apai, tang semina Anak aja, enggau sebarang orang ke dipilih Anak alai Iya mandangka Apai.”

    Jesus lalu nguing ngagai sida murid Iya, lalu bejaku ngagai sida kediri, “Beberekat meh mata ke meda utai ti dipeda kita!

    Laban, Aku madah ngagai kita, mayuh nabi enggau raja udah keran deka meda utai ti dipeda kita, tang nadai meda utai nya; keran deka ninga utai ti didinga kita, tang nadai ninga utai nya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: