7 October 2018 - Hari Minggu Ke Dua Puluh Tujuh Musim Selama - Berita Iban Online

Header Ads

  • Baru Nyadi

    7 October 2018 - Hari Minggu Ke Dua Puluh Tujuh Musim Selama

    Tang lebuh Jesus meda nya, Iya pedis ati lalu bejaku ngagai sida murid Iya, “Awakka sida ke mit datai ngagai Aku. Anang nagang sida, laban Perintah Allah Taala diempu orang ke baka sida tu. Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.”
    7 October 2018 - Hari Minggu Ke Dua Puluh Tujuh Musim Selama

    Bacha Ke Satu:

    Pemungkal 2: 18 - 24

    Udah nya TUHAN Allah Taala bejaku, “Enda manah orang tu diau kediri. Aku deka ngaga siku penulung ke iya, nyadika tawing iya.” 

    TUHAN Allah Taala lalu nempa ari tanah semua bansa jelu enggau semua bansa burung. Udah nya Iya lalu mai sida ngagai orang nya, ngambika iya meri sida nama. Nya meh jalai sida bulih nama.

    Nya alai orang nya meri nama ngagai semua bansa jelu tupi, semua bansa burung, enggau semua bansa jelu babas; Tang nadai siku sida nya ditemu tau nyadika penulung enggau kaling iya.

    Nya alai TUHAN Allah Taala ngasuh orang nya tinduk jenak. Orang nya lalu tinduk. Udah nya TUHAN Allah Taala lalu ngambi siti tulang kerigai orang nya, lalu nampal abi nya ngena isi. 

    TUHAN Allah Taala lalu nempa siku indu ari tulang kerigai nya, lalu mai indu nya ngagai iya. 

    Orang nya lalu bejaku, “Tu baru sedarah, segetah enggau aku saum tulang, saum isi enggau aku. Iya dikumbai “Indu”, laban iya udah diambi ari lelaki.”

    Nya kebuah lelaki ninggalka apai indai iya, lalu begulai enggau bini iya, lalu seduai iya nyadi siku.

    Masmur Entara:

    Masmur 128: 1 - 2, 3, 4 - 5, 6

    Saut (peda 5): Awakka TUHAN merekat kitai genap hari, sepemanjai umur kitai.

    Ke Satu
    Beberekat meh orang ke nangika TUHAN, ke ngasika adat Iya. Nuan deka makai utai ti ulih jari nuan empu; Nuan deka gaga sereta nyadi kaya-raja.

    Saut: Awakka TUHAN merekat kitai genap hari, sepemanjai umur kitai.

    Ke Dua
    Bini nuan baka pun anggur ti bebuah lebat, dalam rumah nuan, lalu bala anak nuan baka anak kayu kana, ngelingi mija nuan.

    Saut: Awakka TUHAN merekat kitai genap hari, sepemanjai umur kitai.

    Ke Tiga
    Baka nya meh orang ke ngasika TUHAN 
    deka diberi berekat. TUHAN deka merekatka nuan ari Sion! Awakka nuan meda Jerusalem nyadi kaya-raja sepemanjai umur nuan!

    Saut: Awakka TUHAN merekat kitai genap hari, sepemanjai umur kitai.

    Ke Empat
    Awakka nuan idup tepedaka bala uchu! Awakka Israel seruran diau dalam pemaik! 

    Saut: Awakka TUHAN merekat kitai genap hari, sepemanjai umur kitai.

    Bacha Ke Dua:

    Hebrew 2: 9 - 11

    Menyadi:
    Tang kitai meda Jesus, ke udah digaga baruh mimit ari melikat enda lama, diberi makota mulia enggau basa laban Iya udah merinsa natka pemati, ngambika, ulih pengasih Allah Taala, Iya mati ke semua mensia.

    Laban Allah Taala, ke ngaga sereta bempu semua utai, endang patut ngasuh Jesus nyadi pemadu badas ulih pemerinsa, lebuh Jesus muka jalai pengelepas ke mayuh anak Allah Taala lalu mai sida bempu mulia Iya.

    Laban Iya ke ngudus, enggau orang ke dikuduska Iya, sama datai ari ruang bilik siti aja. Nya kebuah Jesus enda malu ngumbai sida menyadi Iya.

    Alleluia (peda 1 St. John 4: 12)

    Alleluia, alleluia

    Enti kitai rinduka pangan diri, Allah Taala meruan dalam kitai, lalu pengerindu Iya digaga nyadi pemadu badas dalam kitai.

    Alleluia.

    Bacha Injil:

    Mark 10: 2 - 16

    Orang Parisi datai deka nguji Jesus. Ku sida nanya, “Kati laki tau muai bini?”
    Iya lalu nyaut sida, “Nama pesan Moses ngagai kita?”

    Ku sida, “Moses ngemendarka laki nulis surat sarak, lalu muai bini iya.”

    Tang ku Jesus bejaku ngagai sida, “Moses nulis pesan nya ke kita, laban kita kieh.

    Tang kenyau ari penumbuh dunya, ‘Allah Taala ngaga mensia lelaki enggau indu.’

    Ketegal nya, lelaki deka ninggalka apai indai iya, lalu begulai enggau bini iya, lalu seduai iya deka nyadi setubuh.’ Nya alai, seduai iya ukai dua iku agi, tang siku.

    Nya alai, nadai orang tau nyeraraka utai ti udah ditampilka Allah Taala.”

    Lebuh sida pulai baru ke rumah, sida murid nanya Iya baru pasal pekara nya.

    Lalu ku Iya bejaku ngagai sida, “Barang sapa muai bini, lalu jadi enggau indu bukai, butang ngelaban bini iya, lalu enti bini muai laki, lalu jadi enggau lelaki bukai, iya butang.”

    Orang mai anak mit ngagai Jesus, ngambika Iya ngengkahka jari Iya atas sida. Sida murid lalu nganu orang nya.

    Tang lebuh Jesus meda nya, Iya pedis ati lalu bejaku ngagai sida murid Iya, “Awakka sida ke mit datai ngagai Aku. Anang nagang sida, laban Perintah Allah Taala diempu orang ke baka sida tu. Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.”

    Iya lalu merap sida anak mit nya, ngengkahka jari Iya atas sida, lalu merekatka sida.

    Tauka:

    Mark 10: 2 - 12

    Orang Parisi datai deka nguji Jesus. Ku sida nanya, “Kati laki tau muai bini?”
    Iya lalu nyaut sida, “Nama pesan Moses ngagai kita?”

    Ku sida, “Moses ngemendarka laki nulis surat sarak, lalu muai bini iya.”

    Tang ku Jesus bejaku ngagai sida, “Moses nulis pesan nya ke kita, laban kita kieh.

    Tang kenyau ari penumbuh dunya, ‘Allah Taala ngaga mensia lelaki enggau indu.’

    Ketegal nya, lelaki deka ninggalka apai indai iya, lalu begulai enggau bini iya, lalu seduai iya deka nyadi setubuh.’ 

    Nya alai, seduai iya ukai dua iku agi, tang siku.

    Nya alai, nadai orang tau nyeraraka utai ti udah ditampilka Allah Taala.”

    Lebuh sida pulai baru ke rumah, sida murid nanya Iya baru pasal pekara nya.

    Lalu ku Iya bejaku ngagai sida, “Barang sapa muai bini, lalu jadi enggau indu bukai, butang ngelaban bini iya, lalu enti bini muai laki, lalu jadi enggau lelaki bukai, iya butang.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads