Header Ads

  • Berita Tebaru

    8 October 2018 - Hari Satu ba Minggu Ke Dua Puluh Tujuh Musim Selama

    Iya mansang ngagai orang nya, nuang minyak enggau wain ba bakal orang nya, lalu malut bakal iya. Udah nya iya nepanka orang nya ba jelu iya empu, mai iya ngagai rumah numpang, lalu ngintu iya.
    8 October 2018 - Hari Satu ba Minggu Ke Dua Puluh Tujuh Musim Selama

    Bacha Ke Satu:

    Galatia 1: 6 - 12

    Menyadi:
    Aku alit ati ke kita tu! Jampat amat kita ninggalka Iya ke udah ngangauka kita ulih pengasih Kristus, lalu nguingka diri ngagai “berita manah” ti bukai.

    Ukai reti nya kitai bisi “berita manah ti bukai,” tang sekeda orang nyarutka runding kita lalu nguji nunsangka Berita Manah Kristus.

    Tang enti sema kami, tauka melikat ari serega, bisi nusui ngagai kita berita manah ti lain agi ari Berita Manah ti udah ditusui kami ngagai kita, awakka orang nya diukum belama-lama iya.

    Munyi ti udah disebut kami suba, lalu diatu aku nandu nya baru: enti orang bisi nusui berita manah ti lain agi ari Berita Manah ti udah diterima kita, awakka orang nya diukum belama-lama iya.

    Kati aku diatu minta diri dikerinduka mensia, tauka minta diri dikerinduka Allah Taala? Tauka aku nguji ngerinduka ati mensia? Enti aku agi nguji ngerinduka ati mensia, aku ukai ulun  Kristus

    Laban aku dekaka kita nemu, menyadi: Berita Manah ti ditusui aku ukai datai ari mensia, laban aku ukai nerima Berita Manah nya ari mensia, lalu orang pen nadai mega ngajar nya ngagai aku. Aku nerima Berita Manah nya ari pemandang Jesus Kristus.

    Masmur Entara:

    Masmur 111: 1B - 2, 7 - 8, 9 & 10C

    Saut (peda 5): TUHAN endang seruran ingatka sempekat Iya belama iya.

    Ke Satu
    Aku deka meri terima kasih ngagai TUHAN enggau pengabis ati aku lebuh nembiak Iya begempuru bebala mayuh. Naka meh pemadas pengawa TUHAN, ti deka dipelajarka semua orang ke gagit ati ke utai nya.

    Saut: TUHAN endang seruran ingatka sempekat Iya belama iya.

    Ke Dua
    Dalam semua utai ti dikereja Iya, Iya endang tetap ati sereta lurus. Semua pesan Iya endang tau dikarapka magang. Pesan Iya meruan belama iya; Iya ngeletak pesan nya enggau ati ti tetap sereta enggau pengelurus.

    Saut: TUHAN endang seruran ingatka sempekat Iya belama iya.

    Ke Tiga
    Iya udah nebus bala nembiak Iya lalu udah ngaga siti sempekat ti meruan belama iya enggau sida. Iya endang kudus sereta bekuasa! Awakka TUHAN dipuji belama iya.

    Saut: TUHAN endang seruran ingatka sempekat Iya belama iya.

    Alleluia (peda John 13: 34)

    Alleluia, alleluia

    Aku meri kita pesan ti baru: Rinduka pangan diri baka Aku ke udah rinduka kita.

    Alleluia.

    Bacha Injil:

    Luke 10: 25 - 37

    Siku pengajar Adat lalu bediri, deka nguji Jesus. Ku iya, “Pengajar, nama utai ti enda tau enda dikereja aku ngambika aku bulih pengidup ti meruan belama iya?”

    Jesus lalu nyaut iya, “Nama utai ti ditulis dalam Adat? Nama utai ti dibacha nuan dia?

    Orang nya lalu nyaut, “Rinduka Tuhan Allah Taala nuan enggau pengabis ati nuan, enggau pengabis semengat nuan, 
    enggau pengabis pengering nuan, 
    enggau pengabis runding nuan, 
    lalu rinduka pangan nuan baka nuan ke rinduka diri empu.”

    Jesus lalu bejaku ngagai iya, “Betul saut nuan; Kereja nya, nya baru nuan deka idup.”

    Tang pengajar Adat nya ingin deka mandangka diri nemu utai ti disebut diri, nya alai iya lalu nanya Jesus, “Sapa pangan aku?”

    Jesus lalu nyaut, “Nyadi sekali orang siku nurun ari Jerusalem mansang ngagai Jeriko. Bala penyamun ngamuk iya, nelanjaika iya, malu iya, lalu ninggalka iya setengah mati.

    Seninjik bendar siku imam bejalai nengah jalai nya, lalu lebuh iya tepedaka orang nya, iya lalu ngelaung nengah tisi sepiak.

    Baka nya mega siku orang Lewi, lebuh iya datai ba endur nya lalu tepedaka orang nya, iya mega ngelaung nengah tisi sepiak.

    Tang lebuh siku orang Samaria bejalai nengah jalai nya, iya tepedaka orang nya, lalu kasihka iya.

    Iya mansang ngagai orang nya, nuang minyak enggau wain ba bakal orang nya, lalu malut bakal iya. Udah nya iya nepanka orang nya ba jelu iya empu, mai iya ngagai rumah numpang, lalu ngintu iya.

    Hari siti, iya mantaika dua singkap duit pirak, lalu meri duit nya ngagai orang ke bempu rumah numpang nya. 

    Ku iya, ‘Intu iya. Lebuh aku pulai kitu baru, aku deka mayar nuan ungkus ti lebih ari nya ti dikena nuan ngintu iya.’

    Dalam penemu nuan, sapa ari sida tiga nya pangan orang ke diamuk penyamun nya?”

    Ku pengajar Adat nya nyaut, “Orang ke kasihka iya.” 

    Jesus lalu bejaku ngagai iya, “Mupuk meh nuan lalu kereja baka nya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: