Header Ads

  • Berita Tebaru

    9 October 2018 - Hari Dua ba Minggu Ke Dua Puluh Tujuh Musim Selama

    Lebuh Jesus enggau sida murid Iya benung di rantau jalai, Iya datai ba sebuah genturung pendiau, alai siku indu ke benama Marta ngelaluka Iya tama ngagai rumah iya.
    9 October 2018 - Hari Dua ba Minggu Ke Dua Puluh Tujuh Musim Selama

    Bacha Ke Satu:

    Galatia 1: 13 - 24

    Menyadi:
    Kita empu tentu udah ninga pasal pengidup aku dulu suba, lebuh aku balat angkunka agama orang Judah. Aku balat merinsaka lalu nguji ngerusak eklisia Allah Taala.

    Aku jauh nyulut mansang dalam agama orang Judah ari orang bukai ke sama serebak enggau aku, laban aku balat agi ari sida angkunka adat asal aki ini kitai.

    Tang lebuh Allah Taala, ke udah milih aku sebedau aku ada, lalu ngangauka aku bekereja ke Iya, gaga ati mandangka Anak Iya ngagai aku, ngambika aku nusui pasal Iya ngagai orang bansa bukai, aku nadai betanya ngagai orang, lalu aku pen enda mega mupuk ngagai Jerusalem, ngagai orang ke dulu agi ari aku nyadi rasul, tang mupuk tekala nya ngagai menua Arabia, lalu udah nya pulai baru ngagai Damaskus.

    Tiga taun udah bekau nya, nya baru aku mupuk ngagai Jerusalem nemuai ngagai Peter, lalu aku diau enggau iya lima belas hari.

    Tang aku nadai betemu enggau rasul ti bukai kelimpah ari James, menyadi Tuhan Empu.

    (Utai ti ditulis aku tu endang amat. Allah Taala Empu nemu aku enda bula!)

    Udah nya, aku bejalai ngagai menua Siria enggau Silisia.

    Lebuh maya nya, aku apin dikelala raban eklisia Kristus di Judea.

    Sida semina bisi udah ninga ari padah orang, “Orang ke udah merinsaka kitai suba, diatu benung ngajar pasal pengarap ti deka dirusak iya suba!”

    Lalu sida muji Allah Taala ketegal aku.

    Masmur Entara:

    Masmur 139: 1 - 3, 13 - 14AB, 14C - 15

    Saut (peda 24b): Iring aku TUHAN, niti jalai ti meruan belama iya.

    Ke Satu
    O TUHAN, Nuan udah meresa lalu nemu aku. Nuan nemu semua utai ti dikereja aku; Ari jauh Nuan meda semua runding aku. Nuan meda aku lebuh aku gawa tauka belelak, lalu Nuan nemu semua utai ti dikereja aku.

    Saut: Iring aku TUHAN, niti jalai ti meruan belama iya.

    Ke Dua
    Laban Nuan udah nempa semua perengka tubuh aku; Lalu bejantilka aku dalam kandung indai aku.
    Aku muji Nuan laban Nuan endang patut dikenangika, laban semua utai ti dikereja Nuan endang nyelai sereta manah magang.

    Saut: Iring aku TUHAN, niti jalai ti meruan belama iya.

    Ke Tiga
    Nuan sigi nemu aku. Lebuh tulang aku benung ditempa, dipejantilka bejimat jimat dalam kandung indai aku, lebuh aku benung mansang besai dalam kandung enda dipeda mensia, Nuan nemu aku endang bisi dia.

    Saut: Iring aku TUHAN, niti jalai ti meruan belama iya.

    Alleluia (peda Luke 11: 28)

    Alleluia, alleluia

    Beberekat agi orang ke ninga 
    lalu ngasika jaku Allah Taala!

    Alleluia.

    Bacha Injil:

    Luke 10: 38 - 42

    Lebuh Jesus enggau sida murid Iya benung di rantau jalai, Iya datai ba sebuah genturung pendiau, alai siku indu ke benama Marta ngelaluka Iya tama ngagai rumah iya.

    Nyadi Marta bisi menyadi indu siku benama Maria, ke duduk semak kaki Tuhan, mendingka utai ti disebut Iya.

    Tang Marta nejuka diri dikelimpangka mayuh macham pengawa. 

    Nya alai iya mansang ngagai Jesus lalu nanya, “Tuhan, kati Nuan enda ibuhka menyadi aku ninggalka aku kediri mela utai? Asuh iya nulung aku!”

    Tang ku Tuhan nyaut iya, “Marta, Marta! Nuan irau sereta nejuka diri dikelimpangka mayuh macham utai.

    Semina siti aja utai ti beguna. Maria udah milih utai ti manah agi, lalu utai nya enda ulih dirampas ari iya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: