Dua semenyadi bebadi nyawa, dilantak Hilux besemak sekula - Berita Iban Online

Header Ads

  • Baru Nyadi

    Dua semenyadi bebadi nyawa, dilantak Hilux besemak sekula

    KASIH AMAI: Mansa diripotka bakal ba pala enggau tubuh.
    MIRI: Dua semenyadi bebadi nyawa pengudah dilantak kerita Hilux besemak sebuah sekula primary (SK) ba Jalai Bakong-Lapok di Baram, sehari tu tadi.

    Mansa dikelala ngena nama Carin Tigan, 10 taun enggau menyadi biak iya, Monica Ubong, 3 taun, bansa Penan, penatai ari Long Lutin, Baram.

    Nitihka penerang ke diterima, lebuh penusah nyadi urung jam 10.35 pagi nya, kededua mansa benung ngelayang jalai. 

    Ketuai Opis Tasat enggau Penguasa Trafik Sarawak, Superintenden Alexson Naga Chabu, madahka kededua mansa dilantak sebuah kerita Hilux ke datai ari muak ke Bakong, nuju ke pasar Lapok lalu ngejung ke kededua mansa balat bakal ba pala enggau tubuh.

    "Kededua mansa dianjung ke Klinik Beluru enggau diripotka bebadi nyawa ketegal balat bakal," ku iya lebuh dirandau pengarang berita sehari tu tadi.

    Nitihka penerang, deriba Hilux, 28 taun, diripotka selamat tauka nadai bakal ba sebarang alai endur tubuh.

    Bangkai kededua mansa dianjung ke Sepital Miri kena bejalaika pengawa buntas tasat. 

    Kes dipansik ari baruh Seksyen 41(1) Akta Pengangkutan Jalan 1987. 

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads