Tesau nagang ketuai raban bansa digaga ketegal ulah ti dipunka perintah besai - Berita Iban Online

Header Ads

  • Baru Nyadi

    Tesau nagang ketuai raban bansa digaga ketegal ulah ti dipunka perintah besai

    Sapit Kepala Menteri, Datuk Amar Douglas Uggah Embas.
    KUCHING: Atur nagang ketuai raban bansa ngulu program ke ukai diatur perintah nengeri ukai dipunka perintah nengeri tang dipejalaika ketegal ulah perintah besai.

    Sapit Kepala Menteri, Datuk Amar Douglas Uggah Embas lebuh ditanya pekara tu madahka, surat kena 17 Mei 2018 ari Sapit Ketuai Sekretari Opis Menteri Menua Pesisir enggau Kandang Menua ti nesau nangguhka dulu pengawa bekaul enggau Jawatankuasa Kemajuan dan Keselamatan Kampung (JKKK) sereta Jawatankuasa Kemajuan dan Keselamatan Kampung Persekutuan (JKKKP).

    Nitihka dalam surat tu kena 17 Mei 2018 ku Uggah madahka, "Berindik ari pemutus Pengawa Bepilih Besai Menua Ke-14 ti ngujungka ketuai renggat serata menua berubah ke alai mega bekaul enggau institusi JKKK sereta JKKKP'.



    Ku Uggah dalam surat nya madah, "Beduduk ari pekara nya, kerejasama ari piak YBhg Dato'/Tuan/Puan dipinta nangguhka dulu semua pengawa bekaul enggau JKKK/JKKKP nyengkaum pengawa nyiri, nukar, bayar elawin enggau pekara bukai ti bekaul".

    "Berengkah ari hari nya, semua elawin Ketuai Genturung Pendiau JKKK dibayar ulih perintah nengeri. Nya alai aku enda nemu dini alai Baru Bian (Menteri Kerja Raya) bulih penerang.

    "Nya alai aku ngasaika nadai salah perintah nengeri mega nimbal bekaul enggau pekara JKKK. Aku ngasaika ukai kitai ti ngepunka nya dulu," ku iya madah ngagai raban pengarang berita, sehari tu.

    Dulu ari nya Uggah bejadika International Conference on Agriculture and Agro-based Industry Sarawak 2018 (ICAAS 2018) enggau ngemataka pengawa pengawa nyain sempekat pemereti ati (MoU) entara RECODA enggau Agrobank ba Penview Convention Centre (PCC) Demak ditu.

    Bejaku baru Uggah madahka, baka ke udah disebut Menteri Muda Kaunsil Kandang Menua Datu Dr Penguang Manggil dalam riput berita The Borneo Post kemari, nya amat.

    "Keterubah, pis Pemadah nadai agi meri servis ngagai kami, suba enti bisi pengerami tauka program sida ulih mantu tang dia tu nadai agi, lalu nuan nemu JASA mega udah dipadamka, pia mega KEMAS, pegawai KEMAS enda ulih dikena kami agi," ku Uggah.

    Isu nya dikerembaika lebuh memo ti pansutka kena 11 Oktober 2018 ari perintah nengeri ti ngemutuska ketuai raban pupu bansa enda dikemendar ngulu pengerami tauka program ti ukai diatur perintah nengeri.

    Lalu bepelasarka riput berita kena 21 Oktober 2018 Menteri Kerja Raya Baru Bian madahka Perintah Besai Pakatan Harapan (PH) deka ngagihka RM35 juta ba taun 2019 ungkup Sarawak dikena mayar elawin ketuai raban bansa.

    Taja pia Baru madahka elawin nya mesti diberi ngagai ketuai raban bansa ke dipilih rayat lalu ukai ngagai ketuai ti dipilih ketegal pekara politik. ✒ #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads