INJIL SEHARI TU: 1 November 2018 - Hari Empat ba Minggu Ke Tiga Puluh Musim Selama - Berita Iban Online

Header Ads

  • Baru Nyadi

    INJIL SEHARI TU: 1 November 2018 - Hari Empat ba Minggu Ke Tiga Puluh Musim Selama

    Solemnity of All Saints
    1 November 2018 - Hari Empat ba Minggu Ke Tiga Puluh Musim Selama (Solemnity of All Saints)

    Bacha Ke Satu:

    Pemandang 7: 2 - 4, 9 - 14

    Udah nya aku lalu tepedaka siku agi melikat niki ari timur mai chop tambit Allah Taala ti idup. Iya lalu ngangau enggau nyawa ti inggar ngagai empat iku melikat ke udah diberi kuasa ngerusak tanah enggau tasik.

    Ku iya, “Anang ngerusak tanah, tasik, tauka kayu, sebedau kitai ngechop kening bala ulun Allah Taala.”

    Aku lalu ninga pemayuh tubuh sida ke deka dichop: 144,000 iku, ari semua raban bansa orang Israel.

    Udah nya aku malik, lalu tepedaka mayuh amat orang, datai ke sida nyau enda ulih diitung. Sida nya datai ari genap bengkah bansa, ari semua raban bansa, menua, enggau jaku, lalu sida bediri di mua kerusi diraja enggau di mua Anak Domba. Sida ngena baju panjai ti burak, lalu sida megai dan engkerema ba jari sida, lalu sida ngangau enggau nyawa ti inggar, 

    “Pengelepas endang datai ari Allah Taala kitai ke duduk ba kerusi diraja, enggau ari Anak Domba!”

    Semua melikat lalu bediri ngelingi kerusi diraja nya, enggau ngelingi bala tuai enggau ngelingi empat iku utai ti idup, lalu sida nyungkurka diri di mua kerusi ti diraja nya, lalu nyembah Allah Taala.

    Ku sida, “Amin! Beri meh puji, mulia, penemu-dalam, terima kasih, basa, kuasa enggau pengering ngagai Allah Taala kitai belama-lama iya! Amin!”

    Siku ari bala tuai lalu nanya aku, “Sapa bala orang nya ke ngena baju panjai ti burak, lalu ari ni penatai sida?”

    Ku aku bejaku ngagai iya, “Tuan, nuan nemu.” Lalu ku iya bejaku ngagai aku, “Tu meh bala orang ke udah pansut ari penusah ti besai. Sida udah masu baju panjai sida, lalu ngaga baju nya burak ngena darah Anak Domba.

    Masmur Entara:

    Masmur 24: 1 - 2, 3 - 4, 5 - 6

    Saut (peda 6): TUHAN, tu meh orang ke lelengau deka meda mua Nuan.

    Ke Satu
    Dunya enggau semua utai ti dalam dunya endang enggi TUHAN. Dunya enggau semua orang ke diau di dunya endang enggi TUHAN; Laban Iya udah nudukka dunya ba tasik enggau ba sungai.

    SautTUHAN, tu meh orang ke lelengau deka meda mua Nuan.

    Ke Dua
    Sapa tau niki ngagai bukit TUHAN? Sapa tau bediri dalam Rumah Sembiang Iya ti kudus? Orang ke tuchi jari, tuchi ati, ti enda nyembah engkeramba lalu enda ngaga semaya ti bula.

    SautTUHAN, tu meh orang ke lelengau deka meda mua Nuan.

    Ke Tiga
    TUHAN deka merekat lalu ngidupka sida. 
    Allah Taala ke meri sida pengelepas, deka ngumbai sida nadai penyalah. Nya meh orang ke ngiga Iya, ke ngiga Allah Taala Jakop.

    SautTUHAN, tu meh orang ke lelengau deka meda mua Nuan.

    Bacha Ke Dua:

    1 John 3: 1 - 3

    Peda kita pemesai pengerindu Apai ke kitai, datai ke kitai nyau dikumbai anak Allah Taala, laban kitai endang amat anak Iya. Kebuah dunya enda ngelala kitai nya laban dunya enda ngelala Iya.

    Menyadi ke dikerinduka aku, kitai diatu udah nyadi anak Allah Taala. Gaya kitai ti jemah ila apin dipandangka. Utai ti ditemu kitai nya, lebuh Iya dipandangka, kitai deka sebaka enggau Iya, laban kitai deka meda Iya mua mata.

    Lalu semua orang ke bisi pengadang tu ke Kristus, nuchi diri empu, baka Kristus Empu ke endang tuchi.

    Alleluia (Matthew 11: 28)

    Alleluia, alleluia
    Datai ngagai Aku semua kita ke lelak ngema utai ti berat, lalu Aku deka ngasuh kita belelak, ku TUHAN.
    Alleluia.



    Bacha Injil:

    Matthew 5: 1 - 12A

    Lebuh Jesus meda bala orang mayuh, Iya niki ngagai bukit sigi, lalu lebuh Iya nudukka Diri, sida murid Iya lalu datai ngagai Iya.

    Iya lalu belabuh ngajar sida, ku Iya:

    “Beberekat meh orang ke seranta dalam roh, laban Perintah serega endang enggi sida.

    “Beberekat meh orang ke ngulit, laban sida deka diperindang.

    “Beberekat meh orang ke baruh ati, laban sida deka bempu dunya.

    “Beberekat meh orang ke lapar sereta auska pengelurus, laban Allah Taala deka ngemuaska sida.

    “Beberekat meh orang ke kasihka orang, laban sida deka nerima pengasih.

    “Beberekat meh orang ke tuchi ati, laban sida deka meda Allah Taala.

    “Beberekat meh orang ke bekereja ke pemaik, laban sida deka dikumbai anak Allah Taala.

    “Beberekat meh orang ke kena perinsa ketegal pengelurus, laban sida deka bempu Perintah serega.

    “Beberekat meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal Aku.

    Lantang sereta gaga meh kita, laban upah ti besai udah disedia ke kita di serega.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads