3 December 2018 - Hari Satu ba Minggu Keterubah Musim Penatai (Adven) (Memorial of Saint Francis Xavier, Priest) - Berita Iban Online

Header Ads

  • Baru Nyadi

    3 December 2018 - Hari Satu ba Minggu Keterubah Musim Penatai (Adven) (Memorial of Saint Francis Xavier, Priest)



    3 December 2018 - Hari Satu ba Minggu Keterubah Musim Penatai (Adven) (Memorial of Saint Francis Xavier, Priest)

    Bacha Ke Satu: Isaiah 2: 1 - 5

    Tu pesan ti udah diberi Allah Taala ngagai Isaiah anak Amos pasal menua Judah enggau Jerusalem:

    Jemah ila bukit ti alai Rumah Sembiang bediri deka nyadi bukit ti pemadu tinggi lalu ngayung semua bukit ti bukai. Semua bansa deka beterudus datai ngagai iya, lalu sida deka bejaku,

    “Aram kitai niki ngagai bukit TUHAN, ngagai Rumah Sembiang Allah Taala ke disembah orang Israel ngambika Iya ngajar kitai pasal utai ti deka dikereja kitai. Kitai deka bejalai nengah jalai ti udah dipilih Iya, laban ajar ti diberi TUHAN datai ari Jerusalem. Iya bejaku ari Sion ngagai bala nembiak Iya.”

    Iya deka mutarka laya entara mayuh bengkah bansa ti besai. Sida deka nempa pedang sida nyadi pengeradu tanah lalu sangkuh sida nyadi duku kena nyarau kayu. Semua bansa deka badu agi beperang, nadai agi nyendiaka diri beperang.

    O peturun Jakop, aram kitai bejalai dalam penampak ti udah diberi TUHAN ngagai kitai!

    Masmur Entara:

    Masmur 122: 1 - 2, 3 - 4B, 4CD - 5, 6 - 7, 8 - 9

    Saut (peda 1): Aram kitai mansang ngagai rumah TUHAN enggau gaga ati.

    Ke Satu
    Aku gaga ati lebuh sida bejaku enggau aku,

    “Aram kitai mansang ngagai rumah TUHAN.”

    Lalu diatu kitai bisi ditu, bediri ba mua pintu nengeri Jerusalem!

    Saut: Aram kitai mansang ngagai rumah TUHAN enggau gaga ati.

    Ke Dua
    Jerusalem udah digaga nyadi nengeri ti manah gaya sereta betul atur. Tu meh endur alai raban bansa datai, raban bansa orang Israel.

    Saut: Aram kitai mansang ngagai rumah TUHAN enggau gaga ati.

    Ke Tiga
    Meri terima kasih ngagai TUHAN. Tu meh endur alai sida raja orang Israel duduk ngakim bala nembiak sida.

    Saut: Aram kitai mansang ngagai rumah TUHAN enggau gaga ati.

    Ke Empat
    Besampi minta pemaik ke nengeri Jerusalem:

    “Awakka orang ke rinduka nuan, nyadi kaya-raja. Awakka pemaik seruran meruan dalam kandang dinding kuta nuan enggau pengelikun dalam menara nuan.”

    Saut: Aram kitai mansang ngagai rumah TUHAN enggau gaga ati.

    Ke Lima
    Aku deka bejaku ngarika kaban belayan enggau pangan aku munyi tu ngagai Jerusalem,

    “Awakka pemaik meruan dalam nuan!”

    Ketegal rumah TUHAN Allah Taala kami
    aku deka besampi minta nuan nyadi kaya-raja.

    Saut: Aram kitai mansang ngagai rumah TUHAN enggau gaga ati.

    Alleluia (peda Masmur 80: 3)

    Alleluia, alleluia
    Datai lalu selamatka kami, TUHAN, Allah Taala kami;
    Ayanka pengasih Nuan ke kami, ngambika kami diidupka!
    Alleluia.

    Bacha Injil:

    Matthew 8: 5 - 11

    Lebuh Jesus tama ngagai nengeri Kapernaum, siku pemesai soldadu Rome betemu enggau Iya, minta saup Iya.

    Ku iya, “Tuan, nembiak aku sakit, gali di rumah, enda ulih engkebut, lalu merinsa amat.”

    Ku Jesus bejaku ngagai iya, “Aku deka kin lalu ngeraika iya.”

    Tang ku pemesai nya bejaku, “Tuan, rumah aku enda patut alai Nuan datai. Tak bejaku aja, lalu nembiak aku deka gerai.

    Laban aku empu bekereja di baruh orang, lalu aku mega bisi soldadu dipegai aku. Aku bejaku ngagai siku, ‘Mupuk nuan!’ lalu iya mupuk.

    Aku bejaku ngagai siku, ‘Datai kitu!” lalu iya datai. Aku bejaku ngagai ulun aku, ‘Kereja tu!” iya lalu ngereja.”

    Lebuh Jesus ninga nya, Iya balat alit ati, lalu bejaku ngagai orang ke nitihka Iya, “Enggau bendar Aku madah ngagai kita, indah di menua Israel deh Aku nadai udah kala tetemuka pengarap ti baka tu.

    Aku madah ngagai kita, mayuh orang deka datai ari timur enggau ari barat, lalu duduk makai enggau Abraham, Isak enggau Jakop dalam Perintah serega.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads