31 December 2018 - Hari Ke Tujuh Nyentuk Ngagai Octave Krismas
Cari Berita

Advertisement

31 December 2018 - Hari Ke Tujuh Nyentuk Ngagai Octave Krismas

Staf @beritaibanMY
December 31, 2018

The Seventh Day in the Octave of Christmas

31 December 2018 - Hari Ke Tujuh Nyentuk Ngagai Octave Krismas (The Seventh Day in the Octave of Christmas)

Bacha Ke Satu:

1 Saint John 2: 18 - 21

Anak, tu meh pengujung dunya! Munyi ti udah didinga kita, Munsuh Kristus deka datai. Nya alai diatu mayuh Munsuh Kristus udah datai. Nya meh jalai kitai nemu pengujung dunya udah datai.

Sida pansut ari bala kitai, tang sida ukai raban kitai, laban enti sida raban kitai, sida tentu agi meruan begulai enggau kitai. Tang lebuh sida pansut ari bala kitai, nya nyata nunjukka sida ukai raban kitai.

Tang kita udah ditata Iya ti Kudus, lalu semua kita bisi penemu.

Aku nulis ngagai kita, ukai laban kita enda nemu pemendar, tang laban kita nemu pemendar, lalu kita nemu, nadai pemula kala datai ari pemendar.

Masmur Entara:

Masmur 96: 1 - 2, 11 - 12, 13

Saut (peda 11a): Gaga ati meh kita, dunya enggau langit!

Ke Satu
Nyanyi lagu ti baru ke TUHAN! 
Belagu ke TUHAN, semua dunya!
Belagu ke TUHAN, lalu puji Iya! 
Padahka tiap hari berita manah pasal Iya ti udah ngelepaska kitai.

Saut: Gaga ati meh kita, dunya enggau langit!

Ke Dua
Gaga ati meh kita, dunya enggau langit! 
Inggar meh kita, tasik, enggau semua utai ti idup dalam kita.
Gaga ati meh kita, umai, enggau semua utai ti dalam kita! 
Kayu ti di utan deka manjung gaga ati.

Saut: Gaga ati meh kita, dunya enggau langit!

Ke Tiga
Lebuh TUHAN datai lalu merintah dunya, 
Iya deka merintah semua bansa di dunya 
ngena atur ti lurus sereta betul.

Saut: Gaga ati meh kita, dunya enggau langit!

Alleluia (peda John 1: 14A, 12A)

Alleluia, alleluia
Jaku Allah Taala nyadi mensia, lalu diau begulai enggau kitai.
Semua orang ke nerima Iya,
diberi Iya kuasa nyadi anak Allah Taala.
Alleluia.

Bacha Injil:

John 1: 1 - 18

Ba pun iya kelia, Jaku endang udah bisi. Jaku nya enggau Allah Taala, lalu Jaku nya endang Allah Taala.

Iya endang enggau Allah Taala kenyau ari pun.

Semua utai digaga ulih Iya; enti nadai Iya, nadai utai ti udah digaga ulih digaga.

Dalam Iya bisi pengidup lalu pengidup nya meri penampak ngagai semua mensia.

Penampak nya manchar dalam pemetang, lalu pemetang enda ulih ngalahka iya.

Siku orang dikirumka Allah Taala. Nama iya John.

John datai besaksika pasal penampak nya ngambika, ulih iya, semua orang tau arap.

John empu ukai penampak, tang iya datai ngambika iya besaksika pasal penampak nya.

Penampak ti bendar ti meri penampak ngagai genap iku mensia, bisi datai ngagai dunya.

Iya bisi di dunya, lalu dunya digaga ulih Iya. Tang taja pia, dunya enda ngelala Iya.

Iya datai ngagai menua Iya Empu, tang bansa Iya Empu enda nerima Iya.

Tang semua orang ke nerima Iya, ke arapka nama Iya, diberi Iya kuasa nyadi anak Allah Taala, ke diadaka Allah Taala, ukai diadaka mensia, tauka ulih peneka mensia.

Jaku nya nyadi mensia, lalu diau begulai enggau kitai, lalu kami udah meda mulia Iya, mulia Iya ke nyadi Anak Tunggal Apai, ke penuh laban pengasih enggau pemendar.

John besaksika pasal Iya. Ku John ngangau, 

“Tu meh orang ke dikenang aku lebuh aku nyebut: ‘Iya ke datai dudi ari aku, besai agi ari aku, laban Iya endang udah bisi sebedau aku ada.’”

Ulih pemesai pengasih Iya, semua kitai udah nerima pengasih ti nambah-menambah.

Adat amat udah diberi ulih Moses, tang pengasih enggau pemendar datai ulih Jesus Kristus.

Nadai orang udah kala meda Allah Taala.

Semina Anak Tunggal Allah Taala, ke begulai enggau Apai, ke madahka pasal Apai.