Rh Sambau Sandai angus, siku indu tuai ditemu retung
Cari Berita

Advertisement

Rh Sambau Sandai angus, siku indu tuai ditemu retung

Frankie John™
December 12, 2018

KASIH AMAI: Ba palan penusah angus ke nyadi.

SRI AMAN: Siku indu tuai (warga emas) bebadi nyawa lebuh rumah panjai pemanjai 28 pintu di Rh Sambau Sandai, Nanga Entulang di Jalai Stumbin angus pagi tu tadi.
Ku Sapit Direktor Operasyen, Opis Bomba enggau Penyelamat Malaysia (JBPM) Sarawak Tiong Ling Hii, indu ke beadi nyawa nya dikelala ngena nama Yon Manjat ke beumur 60 taun ditemu parai lebuh raban bomba benung merasa silik ba palan penusah angus ke nyadi.
"Siku indu ke dikelala ngena nama Yon Manjat, beumur 60 taun ditemu retung ba ruai bilik iya empu lebuh penusah angus nyadi," ku iya lebuh ke dirandau raban pengarang berita.
Bangkai 'mansa' pengudah nya disuaka ngagai raban polis ngambika ulih bejalaika pengawa silik agi.
Berindik ari penusah angus nya, urung penyampau 186 orang ke ngibun rumah nya semina tinggal gari ba tubuh aja. 
Penyampau sembilan iku raban bomba ari Balai Bomba enggau Penyelamat (BBP) Sri Aman berumban ngesah ke palan penusah angus pengudah nerima kangau urung jam 11 pagi.
"Penusah angus nya udah nganguska sebuah blok rumah panjai pintu bansa kayu. Sebuah blok rumah kediri bansa setengah entap angus 70 peratus," ku iya.
Kebuah penusah angus enggau penyampau pengerugi agi dipansik.