Header Ads

  • Baru Nyadi

    11 January 2019 - Hari Lima udah Epiphany

    Jesus lalu ngunjurka jari Iya, negu orang nya, lalu bejaku, “Aku deka! Tuchi meh nuan!” - Luke 5: 12 - 16.

    11 January 2019 - Hari Lima udah Epiphany

    Bacha Ke Satu: 1 John 5: 5 - 13

    Menyadi ti dikesayauka aku:
    Sapa ulih ngalahka dunya kelimpah ari orang ke arapka Jesus nya Anak Allah Taala?

    Jesus Kristus datai ngagai dunya ngena ai enggau darah, ukai semina ngena ai aja tang ngena ai enggau darah. Lalu Roh Kudus Empu ke besaksika nya, laban Roh Kudus nya pemendar.

    Nya alai tiga bengkah utai ti besaksi:
    Roh Kudus, ai, enggau darah, lalu sida tiga nya besetuju enggau pangan diri.
    Enti kitai teterimaka saksi mensia, saksi Allah Taala lebih besai agi ari nya, laban tu saksi ti diberi Allah Taala pasal Anak Iya.

    Orang ke arapka Anak Allah Taala bisi saksi nya dalam ati sida. Barang sapa enda arapka Allah Taala, udah ngumbai Allah Taala bula, laban iya enda arapka saksi Allah Taala pasal Anak Iya.

    Tu meh saksi nya: Allah Taala meri kitai pengidup ti meruan belama iya, lalu pengidup nya dalam Anak Iya.

    Barang sapa bisi Anak Allah Taala, bisi pengidup. Barang sapa nadai Anak Allah Taala, nadai pengidup.

    Aku nuliska tu ngagai kita ke arapka nama Anak Allah Taala, ngambika kita nemu diri bisi pengidup ti meruan belama iya.

    Masmur Entara: Masmur 147: 12 - 13, 14 - 15, 19 - 20

    Saut (peda 12a): Puji meh TUHAN, O Jerusalem!

    Ke Satu
    Puji meh TUHAN, O Jerusalem!
    Puji meh Allah Taala kitai, O Sion!
    Iya ngasuh semua pintu nuan tegap.
    Iya merekatka bala nembiak Nuan.

    Saut: Puji meh TUHAN, O Jerusalem!

    Ke Dua
    Iya nyaga garis entara menua nuan enggau likun
    lalu ngasuh kita kenyang makai gandum ti pemadu manah.
    Iya bejaku ngagai tanah,
    lalu utai ti disebut Iya nyadi enggau jampat.

    Saut: Puji meh TUHAN, O Jerusalem!

    Ke Tiga
    Iya meri pesan ngagai bala nembiak Iya,
    atur enggau Adat Iya ngagai orang Israel.
    Iya nadai kala ngereja utai nya ke semua bansa bukai.
    Sida enda nemu Adat Iya. Puji TUHAN!

    Saut: Puji meh TUHAN, O Jerusalem!

    Alleluia (peda Matthew 4: 23)
    Alleluia, alleluia
    Jesus nusui Berita Manah pasal Perintah Allah Taala,
    sereta ngeraika orang ke kena laban semua macham penyakit enggau pemedis.
    Alleluia.

    Bacha Injil: Luke 5: 12 - 16

    Nyadi sekali lebuh Jesus dalam sebuah nengeri, siku lelaki ke sakit lan datai. 

    Lebuh iya meda Jesus, iya nyungkurka diri, minta Jesus nulung iya, “Tuhan, enti Nuan deka, Nuan ulih ngaga aku nyadi tuchi!”

    Jesus lalu ngunjurka jari Iya, negu orang nya, lalu bejaku, “Aku deka! Tuchi meh nuan!” 

    Tekala nya penyakit lan nya lalu nadai agi ba orang nya.

    Jesus lalu enda nyagi iya madahka nya ngagai orang. Ku Iya, “Mansang ngagai imam, ngambika imam nya meresa nuan, lalu beri piring ti diasuh Moses, nyadika saksi di mua orang mayuh nuan udah gerai.”

    Tang berita pasal Jesus majak balat agi ngelekai, lalu mayuh amat orang datai ningaka Iya, sereta digeraika ari penyakit sida.

    Tang Iya mupuk ngagai endur ti sunyi, lalu besampi.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads