2 bebadi nyawa, 5 bakal, pengudah eksiden ba simpang Jalai Batu Lintang
Cari Berita

Advertisement

2 bebadi nyawa, 5 bakal, pengudah eksiden ba simpang Jalai Batu Lintang

Staf @beritaibanMY
January 7, 2019

BA PALAN EKSIDEN NYADI: Raban bomba benung bejalaika operasyen nyelamat.

KUCHING: Dua bebadi nyawa, tang lima bakal pengudah dua buah entukar belantak ba simpang Jalai Batu Lintang, ditu, sehari tu tadi.

Sapit Direktor Operasyen Opis Bomba enggau Penyelamat Sarawak, Tiong Ling Hii madah, siku lelaki (mansa) diripotka bebadi nyawa ba palan eksiden ke nyadi. 

Ku iya, taja pia, siku agi (mansa) diripotka bebadi nyawa ba Sepital Sri Aman benung iya diperubatka ba wad 'emergency'. 

“Eksiden nyadi urung jam 1.40 lemai, sebuah kerita Proton Waja enggau sebuah Mitsubishi Triton (4WD).

“Seraban bomba ari Balai Bomba enggau Penyelamat (BBP) Sri Aman berumban ngesah ke palan eksiden ke nyadi ngambika ulih bejalaika operasyen nyelamat”, ku iya lebuh ke dirandau pengarang berita seharitu tadi.

KASIH AMAI: Raban bomba benung deka mansutka 'mansa' ke mengkang ba dalam kerita.

Tiong ngelansa, maya datai ba palan eksiden, raban bomba lalu bejalaika operasyen nyelamatka 'mansa' ke diripotka mengkang ba dalam kerita.

Dempa pemalat eksiden nya, ngejungka kededua entukar nya balat rusak tauka kempik. 

“Lungun tauka tubuh 'mansa' pengudah nya disuaka ngagai raban polis ngambika ulih bejalaika pengawa silik agi.

“Lima 'mansa' bakal dianjung ke Sepital Sri Aman ngambika ulih diperubatka enggau silik agi,” ku iya.

Tang taja pia, naka berita ditulis surat pengelala 'mansa' agi apin temu.