3 January 2019 - Hari Empat ba Minggu Krismas (Christmas Weekday)
Cari Berita

Advertisement

3 January 2019 - Hari Empat ba Minggu Krismas (Christmas Weekday)

Chief Editor | Berita Iban MY
January 3, 2019

Hari siti John tepedaka Jesus mansang ngagai iya, lalu ku John bejaku, “Peda kita, nyin Anak Domba Allah Taala, ke muai dosa dunya! - John 1: 29 - 34

3 January 2019 - Hari Empat ba Minggu Krismas (Christmas Weekday)

Bacha Ke Satu: 1 John 2: 29 - 3: 6

Enti kita nemu Kristus endang lurus, kita patut nemu, semua orang ke ngereja utai ti lurus, endang diadaka Iya magang.

Peda kita pemesai pengerindu Apai ke kitai, datai ke kitai nyau dikumbai anak Allah Taala, laban kitai endang amat anak Iya. Kebuah dunya enda ngelala kitai nya laban dunya enda ngelala Iya.

Menyadi ke dikerinduka aku, kitai diatu udah nyadi anak Allah Taala. Gaya kitai ti jemah ila apin dipandangka. Utai ti ditemu kitai nya, lebuh Iya dipandangka, kitai deka sebaka enggau Iya, laban kitai deka meda Iya mua mata.

Lalu semua orang ke bisi pengadang tu ke Kristus, nuchi diri empu, baka Kristus Empu ke endang tuchi.

Genap iku orang ke bedosa endang ngelanggar adat, laban reti dosa nya ngelanggar adat.

Kita nemu, Kristus pegari ngambika Iya muai dosa, lalu Iya Empu endang nadai dosa dalam Iya.

Semua orang ke meruan dalam Iya, enda agi majak bedosa. Semua orang ke majak bedosa nadai udah kala meda tauka ngelala Iya.

Masmur Entara: Masmur 98: 1, 3CD - 4, 5 - 6

Saut (peda 3cd): Semua bansa di semua endur udah meda pemenang Allah Taala kami.

Ke Satu
Nyanyi pantun ti baru ke TUHAN. Iya udah ngereja utai ti badas! Ngena kuasa Iya enggau pengering Iya ti kudus. Iya udah bulih pemenang.

Saut: Semua bansa di semua endur udah meda pemenang Allah Taala kami.

Ke Dua
Semua bansa di semua endur udah meda pemenang Allah Taala kami.
Belagu gaga ati ke TUHAN, semua kita dunya. Puji Iya ngena pantun enggau panjung gaga ati!

Saut: Semua bansa di semua endur udah meda pemenang Allah Taala kami.

Ke Tiga
Belagu muji TUHAN! Tebah musik ngena belikan!
Sepu terumpit enggau tanduk lalu manjung gaga ati ke TUHAN ti Raja kitai.

Saut: Semua bansa di semua endur udah meda pemenang Allah Taala kami.

Alleluia (peda John 1: 14A, 12A)
Alleluia, alleluia
Jaku nya nyadi mensia, lalu diau begulai enggau kitai,
Tang semua orang ke nerima Iya, ke arapka nama Iya,
diberi Iya kuasa nyadi anak Allah Taala.
Alleluia.

Bacha Injil: John 1: 29 - 34

Hari siti John tepedaka Jesus mansang ngagai iya, lalu ku John bejaku, “Peda kita, nyin Anak Domba Allah Taala, ke muai dosa dunya!

Nya meh orang ke dikenang aku, ‘Siku orang deka datai dudi ari aku, ke besai agi ari aku, laban Iya endang udah bisi sebedau aku ada.’

Aku empu enda ngelala Iya, tang tu meh kebuah aku datai lalu maptisa orang ngena ai, ngambika Iya dipandangka ngagai orang Israel.”

John lalu besaksi: “Aku meda Roh Kudus nurun ari serega baka burung achang lalu meruan ba Iya.
Aku empu enda ngelala Iya; tang Allah Taalati ngasuh aku maptisa orang ngena ai, udah madahka ngagai aku, ‘Nuan deka meda Roh Kudus nurun lalu meruan ba orang siku; nya meh orang ke deka maptisa ngena Roh Kudus.’
Lalu aku empu udah meda Iya lalu aku besaksi madahka Iya nya Anak Allah Taala.”