5 January 2019 - Memorial of Saint John Neumann, Bishop
Cari Berita

Advertisement

5 January 2019 - Memorial of Saint John Neumann, Bishop

Staf @beritaibanMY
January 5, 2019

Memorial of Saint John Neumann, Bishop.

5 January 2019 - Memorial of Saint John Neumann, Bishop

Bacha Ke Satu: 1 John 3: 11 - 21

Menyadi ti dikerinduka aku:

Laban tu pesan ti udah didinga kita kenyau ari pun: rinduka pangan diri.

Kitai enda tau baka Kain ke endang enggi Sitan, lalu iya munuh menyadi iya Abel. Nama kebuah iya munuh Abel? Laban utai ti dikereja iya jai, lalu utai ti dikereja menyadi iya, lurus.

Anang tekenyit ati, menyadi, enti dunya begedika kita.

Kitai nemu diri udah meraka ari pemati ngagai pengidup, laban kitai rinduka pangan diri. Barang sapa enda rinduka pangan diri, mengkang dalam pemati.

Semua orang ke begedika pangan diri endang pemunuh, lalu kita nemu, orang ke pemunuh nadai pengidup ti meruan belama iya dalam iya.

Baka tu ku jalai kitai ngelala pengerindu: Kristus udah nyerahka nyawa Diri ketegal kitai. Nya alai, kitai patut mega nyerahka nyawa diri ketegal pangan kitai!

Enti orang ke kaya tepedaka pangan iya suntuk, tang enggai nulung iya, baka ni ku pengerindu Allah Taala bisi dalam iya?

Anak, aram kitai rinduka pangan diri, ukai ngena leka jaku tauka ngena utai ti disebut kitai, tang ngena pemendar enggau pengawa ti dikereja kitai.

Nya meh jalai kitai nemu diri enggi pemendar, lalu kempang ati bediri di mua Iya genap kali ati kitai besalahka kitai; laban Allah Taala besai agi ari ati kitai, lalu Iya nemu semua utai.

Menyadi ke dikesayauka aku, enti ati kitai enda besalahka kitai, kitai berani bediri di mua Allah Taala.

Masmur Entara: Masmur 100: 1 - 2, 3, 4, 5

Saut (peda 2a): Sembah meh TUHAN enggau ati ti gaga semua kita dunya.

Ke Satu
Nyanyi gaga ati ke TUHAN meh semua kita dunya!
Sembah meh TUHAN enggau ati ti gaga, datai ngagai Iya enggau lagu lantang ati!

Saut: Sembah meh TUHAN enggau ati ti gaga semua kita dunya.

Ke Dua
Anang enda ngaku TUHAN nya Allah Taala! Iya ngaga kitai, lalu kitai endang enggi Iya. Kitai tu nembiak Iya, kitai tu raban domba Iya.

Saut: Sembah meh TUHAN enggau ati ti gaga semua kita dunya.

Ke Tiga
Tama nengah pintu Rumah Sembiang mai sampi terima kasih. Mansang ngagai endur ti kudus enggau pantun puji. Beri terima kasih ngagai Iya, lalu puji Iya.

Saut: Sembah meh TUHAN enggau ati ti gaga semua kita dunya.

Ke Empat
TUHAN endang badas. Pengerindu Iya meruan belama iya, lalu penetap ati Iya meruan belama iya.

Saut: Sembah meh TUHAN enggau ati ti gaga semua kita dunya.

Alleluia
Alleluia, alleluia
Hari ti kudus udah mancar atas kitai.
Datai, semua bansa lalu sembah TUHAN.
Sahari tu penampak ti besai datai ngagai dunya.
Alleluia.

Bacha Injil: John 1: 43 - 51

Hari siti Jesus mutuska runding deka mupuk ngagai Galili. Iya tetemuka Philip, lalu bejaku ngagai iya, “Titihka Aku!”

Penatai asal Philip nya ari Betsaida, nengeri Andrew seduai Peter.

Philip tetemuka Natanel, lalu madah ngagai iya, “Kami udah tetemuka orang siku ke dikenang Moses dalam Bup Adat enggau ditulis sida nabi, Jesus anak Josep, ari Nasaret.”

Natanel lalu bejaku enggau Philip, “Kati utai ti badas ulih datai ari Nasaret?”  Philip lalu nyaut, “Aram tua meda.”

Lebuh Jesus meda Natanel mansang ngagai Iya, Iya lalu bejakuka pasal Natanel, “Tu baru orang Israel ke bendar, ke nadai nemu ngelakar!”

Natanel lalu nanya Iya, “Baka ni ku Nuan ngelala aku?”  Disaut Jesus, “Aku endang udah meda nuan di baruh kayu ara nya tadi, sebedau Philip ngangauka nuan.”

Natanel lalu nyaut Iya, “Pengajar, Nuan amat Anak Allah Taala! Nuan tu meh Raja orang Israel!”

Disaut Jesus, “Kati nuan arap laban Aku udah madahka Diri meda nuan di baruh kayu ara nya tadi? Nuan deka meda utai ti besai agi ari nya!”

Lalu ku Iya bejaku ngagai Natanel, “Enggau bendar Aku madah ngagai kita: 

kita deka meda langit tebuka, lalu meda bala melikat Allah Taala nurun-niki ngagai Anak Mensia.”