9 January 2019 - Hari Tiga udah Epiphany - Berita Iban Online | Laman Web Berita Kitai

Header Ads

  • Baru Nyadi

    9 January 2019 - Hari Tiga udah Epiphany

    Iya baru deka mansa sida, lalu lebuh sida meda Iya bejalai ba atas ai, sida ngumbai Iya antu, lalu sida nyerauh, laban semua sida bela meda Iya lalu takut.Tang Iya tekala nya bejaku ngagai sida, “Anang takut! Aku tu. Anang takut!”. 📖 Mark 6:45-52.

    9 January 2019 - Hari Tiga udah Epiphany

    Bacha Ke Satu: 1 John 4:11-18

    Menyadi, laban Allah Taala udah balat rinduka kitai, kitai mega patut rinduka pangan diri.

    Nadai orang udah kala meda Allah Taala, tang enti kitai rinduka pangan diri, Allah Taala meruan dalam kitai, lalu pengerindu Iya digaga nyadi pemadu badas dalam kitai.

    Baka tu ku jalai kitai nemu diri meruan dalam Iya, lalu Iya meruan dalam kitai, laban Iya udah meri kitai Roh Iya.

    Lalu kami udah meda sereta besaksi madahka Apai udah ngirumka Anak Iya nyadika Juruselamat dunya.

    Allah Taala meruan dalam orang ke ngaku Jesus Kristus nya Anak Allah Taala, lalu sida meruan dalam Allah Taala.

    Nya alai kitai nemu sereta arapka Allah Taala rinduka kitai.

    Allah Taala nya pengerindu, lalu orang ke meruan dalam pengerindu, meruan dalam Allah Taala, lalu Allah Taala meruan dalam sida.

    Pengerindu udah digaga nyadi pemadu badas dalam kitai, ngambika kitai berani lebuh Hari Pechara, laban kitai idup baka Iya di dunya tu.

    Pengerindu nadai mai penakut, tang pengerindu ti pemadu menyana muai semua penakut, laban penakut bisi kaul enggau ukum, lalu barang sapa agi ngembuan penakut nunjukka pengerindu apin nyadi pemadu menyana dalam iya.

    Masmur Entara: Masmur 72:1-2, 10, 12-13

    Saut (peda 11): Tuhan, semua bansa di dunya deka nyembah Nuan.

    Ke Satu
    Ajar raja ngambika iya ngakim ngena pengelurus Nuan, O Allah Taala. Bagi ngagai iya atur Nuan ti lurus, ngambika iya megai bala nembiak Nuan enggau pengelurus lalu merintah orang ke seranta ngena atur ti lurus.

    Saut: Tuhan, semua bansa di dunya deka nyembah Nuan.

    Ke Dua
    Bala raja menua Spain enggau raja mayuh bengkah pulau deka meri iya pemeri. Raja menua Sheba enggau Seba deka mai pemeri ngagai iya.

    Saut: Tuhan, semua bansa di dunya deka nyembah Nuan.

    Ke Tiga
    Iya ngelepaska orang ke seranta, ke ngangauka iya, enggau sida ke suntuk sereta enda dikibuhka orang. Iya sinu ati ke orang ke lemi sereta seranta.
    Iya ngidupka nyawa sida ke suntuk.

    Saut: Tuhan, semua bansa di dunya deka nyembah Nuan.

    Alleluia (peda 1 Timoti 3:16)
    Alleluia, alleluia
    Pujika Nuan, O Kristus, ti ditusui ngagai semua bansa bukai.
    Pujika Nuan, O Kristus,ti dikarapka mensia di serata dunya.
    Alleluia.

    Bacha Injil: Mark 6: 45-52

    Jesus lalu kemaya nya ngasuh sida murid Iya nepan sebuah perau, lalu mupuk dulu ari Iya ngagai Betsaida, di seberai danau nya, benung Iya ke ngasuh orang mayuh pulai.

    Lebuh Iya udah meri selamat tinggal ngagai orang mayuh, Iya lalu niki ngagai bukit sigi, deka besampi.

    Lebuh hari nyau lemai, perau ti dikena sida murid Iya benung ba tengah danau, lalu Jesus keDiri ba darat.

    Iya meda sida bebendar amat bedayung nanjak ribut. Kira entara pukul tiga enggau pukul enam pagi, Iya bejalai ba atas ai mansang ngagai sida. 

    Iya baru deka mansa sida, lalu lebuh sida meda Iya bejalai ba atas ai, sida ngumbai Iya antu, lalu sida nyerauh, laban semua sida bela meda Iya lalu takut.Tang Iya tekala nya bejaku ngagai sida, 

    “Anang takut! Aku tu. Anang takut!”.

    Iya lalu nepan ngagai perau sida.Ribut lalu teduh. Semua sida lalu balat alit ati, laban sida enda meretika pasal tuku roti, laban ati sida kieh.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads