Header Ads

  • Baru Nyadi

    10 February 2019 - Hari Minggu Kelima Musim Selama

    Lebuh sida udah ngulurka pukat sida, sida bulih mayuh amat ikan, datai ke pukat sida nyau ka charik.

    10 February 2019 - Hari Minggu Kelima Musim Selama

    Bacha Ke Satu:

    Isaiah 6: 1 - 2A, 3 - 8

    Taun Raja Usiah mati, aku bisi meda TUHAN duduk ba kerusi diraja Iya, tinggi sereta bemulia, lalu baju panjai Iya ngemenuhka Rumah Sembiang.
    Melikat serapim bediri ari atas Iya.

    Sida ngangauka pangan diri, ku sida: “Kudus, kudus, kudus! meh TUHAN ti Pemadu Bekuasa! Semua dunya penuh laban mulia Iya.”

    Tiang pemun Rumah Sembiang berenyang laban penginggar nyawa iya ke ngangau, lalu Rumah Sembiang nya penuh laban asap.

    Ku aku bejaku, “Tulah meh aku tu! Nadai penyadi meh aku tu; laban mulut aku nyebut utai ti kamah, lalu aku diau enggau orang ke besebutka jaku ti kamah; tang taja pia, mata aku udah meda Raja, TUHAN ti Pemadu Bekuasa!”

    Udah nya siku melikat serapim terebai ngagai aku, mai bara api ti udah diambi iya ngena sepit ari alta.

    Iya negu mulut aku ngena bara api nya, lalu ku iya bejaku, “Bara api tu udah negu mulut nuan. Diatu penyalah nuan udah dibuai, lalu dosa nuan udah diampun.”

    Aku lalu ninga TUHAN bejaku, “Sapa orang ke patut dikirumka Aku? Sapa orang ke deka nyadi seruan kitai?”

    Aku lalu nyaut, “Aku, TUHAN! Kirumka aku!”

    Masmur Entara: Masmur 138: 1 - 2A, 2B - 3, 4 - 5, 7C - 8

    Saut (peda 1c): Aku deka belagu muji Nuan, TUHAN, di mua bala melikat.

    Ke Satu
    Aku meri terima kasih ngagai Nuan, O TUHAN,
    enggau pengabis ati aku.
    Aku belagu muji Nuan di mua bala petara.
    Aku meremi ngadap ngagai Rumah Nuan ti kudus,
    lalu meri terima kasih ngagai nama Nuan.

    SautAku deka belagu muji Nuan, TUHAN, di mua bala melikat.

    Ke Dua
    Ketegal pengerindu enggau penetap ati Nuan ti meruan belama iya,
    laban Nuan udah mandangka Diri enggau pesan Nuan
    endang tinggi ari semua.
    Nuan nyaut aku, lebuh aku ngangauka Nuan.
    Ngena pengering Nuan, Nuan ngeringka aku.

    SautAku deka belagu muji Nuan, TUHAN, di mua bala melikat.

    Ke Tiga
    Semua raja di dunya deka muji Nuan, O TUHAN,
    laban sida udah ninga semaya Nuan,
    lalu sida deka belagu ngenang utai ti dikereja Nuan,
    laban mulia Nuan amat besai.

    SautAku deka belagu muji Nuan, TUHAN, di mua bala melikat.

    Ke Empat
    Jari kanan Nuan ngelepaska aku.
    Nuan deka ngamatka semua utai ti udah disemaya Nuan ngagai aku;
    Pengerindu Nuan endang meruan belama iya, O TUHAN.
    Anang ninggalka nembiak Nuan Israel.

    Saut: Aku deka belagu muji Nuan, TUHAN, di mua bala melikat.

    Bacha Ke Dua: 1 Korint 15: 1 - 11

    Nyadi diatu, menyadi, aku deka ngasuh kita ngingatka Berita Manah ti udah ditusui aku ngagai kita, ti udah diterima kita, ti alai kita bediri tegap.

    Berita Manah nya nyelamatka kita, enti kita bepegai teguh ba jaku ti diajar aku ngagai kita -- nyangka meh kita semina arap ngapa.

    Laban aku meri ngagai kita utai ti pemadu beguna, ti udah diterima aku, iya nya, Kristus mati ketegal dosa kitai, munyi ti ditulis dalam Bup Kudus.

    Iya dikuburka, lalu diangkatka idup baru ba hari ti ketiga, munyi ti ditulis dalam Bup Kudus.

    Iya lalu pegari di mua Peter, lalu udah nya pegari di mua semua sida ke dua belas iku.

    Udah nya Iya pegari di mua lebih lima ratus iku murid Iya sereta sekali. Mayuh sida nya agi idup diatu, taja pen sekeda udah mati.

    Udah nya Iya pegari di mua James, lalu udah nya, di mua semua sida rasul.
    Ke penudi iya, Iya mega pegari di mua aku, ke ada salah maya.

    Laban aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Allah Taala.

    Tang ulih pengasih Allah Taala, aku nyadi aku ke diatu, lalu Iya enda lebu kasihka aku. Sigi amat enda lebu laban aku udah bebendar agi bekereja ari sida rasul ti bukai, taja pen ukai aku empu ke bekereja, tang pengasih Allah Taala ti dalam aku.

    Nya alai, nemuka orang ke bekereja nya aku tauka sida, kami mai Berita Manah lalu kita arap.

    Tauka1 Korint 15: 3 - 8, 11

    Menyadi:
    Aku meri ngagai kita utai ti pemadu beguna, ti udah diterima aku, iya nya, Kristus mati ketegal dosa kitai, munyi ti ditulis dalam Bup Kudus.

    Iya dikuburka, lalu diangkatka idup baru ba hari ti ketiga, munyi ti ditulis dalam Bup Kudus.

    Iya lalu pegari di mua Peter, lalu udah nya pegari di mua semua sida ke dua belas iku.

    Udah nya Iya pegari di mua lebih lima ratus iku murid Iya sereta sekali.

    Mayuh sida nya agi idup diatu, taja pen sekeda udah mati.

    Udah nya Iya pegari di mua James, lalu udah nya, di mua semua sida rasul.

    Ke penudi iya, Iya mega pegari di mua aku, ke ada salah maya.

    Nya alai, nemuka orang ke bekereja nya aku tauka sida, kami mai Berita Manah lalu kita arap.

    Alleluia / Aklamasi sebedau Injil (peda Matthew 4: 19)

    Alleluia, alleluia
    Titihka Aku,
    lalu Aku deka ngajar seduai jalai ngulihka mensia.
    Alleluia.

    Bacha Injil: Luke 5: 1 - 11

    Nyadi sekali, lebuh Jesus bediri ba tebing Danau Genesaret, mayuh amat orang mansang ngagai Iya, deka mendingka jaku Allah Taala.

    Iya tepedaka dua buah perau ba tebing danau nya, tang orang berikan udah ninggalka perau nya, benung masu jala sida.

    Iya lalu nepan sebuah ari perau nya ke diempu Simon, lalu ngasuh Simon ngejangka perau nya jauh mimit ari tebing. Iya duduk, lalu ngajar orang mayuh ari perau nya.

    Lebuh Iya udah tembu bejaku ngagai sida, Iya lalu bejaku ngagai Simon, “Kejangka perau tu ngagai ai ti dalam, lalu ulurka pukat nuan ngambika bulih ikan.”

    Simon lalu nyaut, “Pengajar, kami udah bebendar gawa semalam-malam tu, tang nadai bulih utai. Tang laban Nuan ngasuh, aku deka ngulurka pukat.”

    Lebuh sida udah ngulurka pukat sida, sida bulih mayuh amat ikan, datai ke pukat sida nyau ka charik.

    Nya alai sida ngepai ngagai pangan sida ke ba perau sebuah, minta sida datai nulung sida. Sida datai lalu ngisi dua buah perau nya enggau ikan, datai ke perau nya nyau deka karam.

    Tang lebuh Simon Peter meda nya, iya lalu nyungkurka diri ngagai patung Jesus, ku iya, “Rari ari aku, Tuhan, laban aku tu orang ke bedosa!”

    Laban iya enggau semua orang ke enggau iya balat alit ati ke pemayuh ikan ti ulih sida, lalu baka nya mega James seduai John, anak Sebedi, ke sama bekunsi berikan enggau Simon.

    Jesus lalu bejaku ngagai Simon, “Anang takut. Berengkah ari diatu nuan deka ngulihka mensia.”

    Lebuh sida udah narit perau dua buah nya ke tebing, sida ninggalka semua utai, lalu nitihka Iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads