16 February 2019 - Hari Enam ba Minggu Kelima Musim Selama
Cari Berita

Advertisement

16 February 2019 - Hari Enam ba Minggu Kelima Musim Selama

Staf @beritaibanMY
February 16, 2019

Iya lalu ngasuh orang mayuh duduk ba tanah. Iya ngambi tujuh iti tuku roti nya, lalu lebuh Iya udah meri terima kasih, Iya mechahka roti nya, lalu nyuaka roti nya ngagai sida murid Iya, ngambika sida nyadung utai nya ngagai orang mayuh.

16 February 2019 - Hari Enam ba Minggu Kelima Musim Selama

Bacha Ke Satu: Pemungkal 3: 9 - 24

TUHAN Allah Taala ngangauka lelaki nya, ku Iya, “Dini alai nuan?”

Lelaki nya lalu nyaut, “Aku ninga Nuan bisi dalam kebun, lalu aku takut, laban aku telanjai. Nya alai aku belalai.”

TUHAN Allah Taala lalu nanya iya, “Sapa madahka nuan telanjai? Kati nuan bisi udah makai buah ti enda disagi Aku empa nuan?”

Lelaki nya lalu nyaut, “Indu ke diberi Nuan nyadika tawing kaling aku, ke meri buah ari kayu nya ngagai aku, lalu aku makai.”

TUHAN Allah Taala lalu bejaku ngagai indu nya, “Nama kebuah nuan ngereja nya?” Indu nya lalu nyaut, “Ular nya ti nipu aku, lalu aku makai buah nya.”

TUHAN Allah Taala lalu bejaku ngagai ular nya, “Laban nuan udah ngereja nya, nuan deka kena sumpah. Ari semua bansa jelu, ka semina nuan aja deka ditinggang sumpah tu. Kenyau ari diatu nuan deka ngerayap ngena perut nuan, lalu nuan deka makai amau seumur idup.

Aku deka ngasuh nuan enggau indu tu begedika pangan diri. Anak iya enggau anak nuan deka seruran bemunsuh enggau pangan diri. Anak iya deka ngeredakka pala nuan, lalu nuan deka mantuk tumbit anak iya.”  

TUHAN Allah Taala lalu bejaku ngagai indu nya, “Aku deka nambahka pemerinsa nuan lebuh nuan ngandung, lalu nambahka pemedis nuan lebuh nuan beranak, tang taja pia, nuan deka seruran inginka laki nuan, lalu iya deka bekuasa atas nuan.”

TUHAN Allah Taala lalu bejaku ngagai lelaki nya, “Laban nuan udah mendingka jaku bini nuan, lalu udah makai buah ti enda disagi Aku, nya alai tanah deka kena sumpah, lalu nuan deka bebendar gawa ngulihka pemakai ari tanah seumur nuan idup.

Tanah deka tumbuh rumput enggau duri, lalu nuan deka bepakaika utai ti diambi ari babas.

Nuan deka bepeluh tusur ngulihka asil ari tanah, nyentuk ngagai maya nuan pulai baru ngagai tanah, laban nuan endang ditempa ari tanah. Nuan endang digaga ari amau, nya alai ngagai amau meh nuan pulai.”

Adam ngumbai bini iya Awa, laban iya indai semua mensia.

TUHAN Allah Taala lalu ngaga gari ari kulit jelu ke Adam enggau bini iya, lalu ngerasukka gari nya ba seduai iya.

TUHAN Allah Taala lalu bejaku, “Mensia nyau sebaka enggau Kitai, nemu bagi utai ti manah enggau utai ti jai.  Sida enda tau ngambi buah ari kayu pengidup, enggai ke sida makai buah nya, lalu idup belama iya.”

Nya alai TUHAN Allah Taala muai seduai iya ari kebun Eden lalu ngasuh seduai iya gawa beridup ba tanah ti udah dikena nempa seduai iya empu.

Udah nya TUHAN Allah Taala ngengkahka melikat cherubim enggau pedang ti beapi-api, ti mantap kia-kia, ba tisi timur kebun nya kena nyaga jalai ngagai kayu pengidup nya.

Masmur Entara: Masmur 90: 2, 3 - 4, 5 - 6, 12 - 13

Saut (peda 1): O TUHAN, Nuan endang seruran nyadika rumah kami.

Ke Satu
Sebedau Nuan nempa bukit tauka nempa dunya, 
Nuan endang Allah Taala ti meruan belama iya, nadai pun nadai ujung, 
lalu Nuan deka nyadi Allah Taala belama iya.

Saut: O TUHAN, Nuan endang seruran nyadika rumah kami.

Ke Dua
Nuan udah ngasuh kami pulai ngagai gaya asal kami. 
Nuan ngubah kami nyadi amau baru.
Ba Nuan, seribu taun baka sehari. 
Sida iya baka kemari ti nadai agi, 
baka ke sejam lebuh malam hari.

SautO TUHAN, Nuan endang seruran nyadika rumah kami.

Ke Tiga
Nuan nabanka kami baka ai bah. 
Kami tu baka mimpi, enda tan lama. 
Kami tu baka rumput ti matuk pagi hari,
tumbuh lalu bebungai lebuh pagi hari, 
lalu udah nya, rangkai lalu mati lemai nya.

SautO TUHAN, Nuan endang seruran nyadika rumah kami.

Ke Empat
Ajar kami pasal pemandak umur kami, 
ngambika kami tau nyadi orang ke pintar.
Ni pengelama Nuan agi ringat? 
Kasihka kami ke nembiak Nuan, O TUHAN!

SautO TUHAN, Nuan endang seruran nyadika rumah kami.

Alleluia / Aklamasi sebedau Injil (peda Matthew 4: 4B)

Alleluia, alleluia
Mensia enda ulih idup makai roti aja, 
tang beridup ba genap leka jaku ti pansut ari mulut Allah Taala.
Alleluia.

Bacha Injil: Mark 8: 1 - 10

Lebuh maya nya, mayuh amat orang begempuru, lalu sida nadai utai diempa. 

Nya alai Iya ngangauka sida murid Iya, lalu bejaku ngagai sida, “Aku sinu ati ke bala orang tu, laban sida udah enggau Aku tiga hari, lalu nadai utai diempa.

Enti Aku ngasuh sida pulai lapar, sida deka lepi di rantau jalai, lalu sekeda sida datai ari jauh.”

Ku sida murid nyaut Iya, “Baka ni ku kitai meri bala orang tu makai di menua puang tu?”

Iya lalu ngasuh orang mayuh duduk ba tanah. Iya ngambi tujuh iti tuku roti nya, lalu lebuh Iya udah meri terima kasih, Iya mechahka roti nya, lalu nyuaka roti nya ngagai sida murid Iya, ngambika sida nyadung utai nya ngagai orang mayuh. Sida lalu nyadung roti nya.

Sida mega bisi dua tiga iku ikan ti mit. Lebuh Iya udah merekatka ikan nya, Iya mega ngasuh sida murid nyadung ikan nya.

Semua sida makai, lalu kenyang magang. Sida lalu ngumpul tujuh bakul penuh teda repik pemakai nya.

Orang ke makai nya kira empat ribu iku. Iya lalu ngasuh orang mayuh pulai.

Iya nepan perau enggau sida murid Iya, lalu mupuk ngagai pelilih menua Dalmanuta.