18 February 2019 - Hari Satu ba Minggu Ke-enam Musim Selama
Cari Berita

Advertisement

18 February 2019 - Hari Satu ba Minggu Ke-enam Musim Selama

Staf @beritaibanMY
February 18, 2019

Orang Parisi datai lalu belabuh betalat enggau Jesus, minta Iya ngayanka tanda ari serega, kena sida nguji Iya.

Bacha Ke Satu: Pemungkal 4: 1 - 15, 25

Udah nya Adam lalu besetubuh enggau bini iya. Bini iya ngandung, lalu ngadaka anak lelaki siku. Ku bini iya bejaku, “Aku ngadaka anak lelaki tu ari saup TUHAN.” Nya alai iya meri iya nama Kain.

Udah nya iya ngadaka siku agi anak lelaki benama Abel. Abel nyadi pengibun bedus, lalu Kain nyadi orang bumai.

Nyau kelama udah bekau nya, Kain mai sekeda utai ti diketau iya, lalu meri utai nya nyadika piring ngagai TUHAN.

Udah nya Abel mai anak bungas ari raban bedus iya, nyayat jelu nya, lalu meri perengka tubuh ti pemadu manah nyadika piring. TUHAN rinduka Abel enggau piring iya, tang Iya enda rinduka Kain enggau piring iya. Kain ringat, lalu mua iya mengut-mengut.

Udah nya TUHAN lalu bejaku enggau Kain, “Nama kebuah nuan ringat, lalu mengut-mengut?

Enti nuan udah ngereja utai ti ngena, nuan tentu deka tuchum; tang laban nuan udah ngereja utai ti jai, dosa diatu benung ngipa nuan ba mua pintu nuan. Iya keran deka merintah nuan, tang nuan enda tau enda ngalahka iya.”

Udah nya Kain bejaku enggau menyadi iya Abel, “Aram tua ke babas.”  Lebuh seduai iya di babas, Kain ngamuk lalu munuh menyadi iya.

TUHAN lalu nanya Kain, “Dini alai menyadi nuan Abel?” Disaut Kain, “Nadai aku nemu. Kati aku pengibun menyadi aku?”

Udah nya TUHAN lalu bejaku, “Nama utai tu ti udah dikereja nuan? Darah menyadi nuan nyabak ngangauka Aku ari tanah.

Lalu diatu nuan kena sumpah ari tanah ti udah merangapka nyawa nerima darah menyadi nuan ti neritik ari jari nuan.

Lebuh nuan bumai ba tanah, tanah nya enda mansutka asil. Nuan deka bejalai segau-segau di dunya tu, nadai endur alai diau.”

Ku Kain bejaku enggau TUHAN, “Ukum tu kelalu berat ke aku.

Sehari tu Nuan muru aku ari menua tu enggau ari mua Nuan. Aku deka bejalai segau-segau di dunya tu, nadai endur alai diau, lalu barang sapa tetemuka aku, deka munuh aku.”

Tang ku TUHAN nyaut, “Ukai baka nya. Enti orang munuh nuan, orang nya deka diukum tujuh kali lipat.” TUHAN lalu ngengkahka siti kelai ba Kain, enggai ke orang ke betemu enggau iya munuh iya.

Adam enggau bini iya bisi siku agi anak lelaki. Ku bini iya bejaku, “Allah Taala udah meri aku siku anak lelaki kena nganti Abel ti udah dibunuh Kain.” Nya alai Awa meri iya nama Set.

Masmur Entara: Masmur 50: 1 & 8, 16BC - 17, 20 - 21

Saut (peda 14a): Beri sampi terima kasih nyadika piring ngagai Allah Taala.

Ke Satu
TUHAN Allah Taala ti Pemadu Bekuasa bejaku. 
Iya ngangauka semua mensia di dunya ari timur nyentuk ke barat.
“Aku ukai nganu kita ketegal piring kita 
tauka ketegal piring tunu ti selalu dibai kita ngagai Aku.”

Saut: Beri sampi terima kasih nyadika piring ngagai Allah Taala.

Ke Dua
“Nama kebuah kita besebutka pesan Aku? 
Nama kebuah kita berandauka sempekat Aku?
Kita enggai ngelakka Aku ngajar kita. 
Kita nulak pesan Aku.”

SautBeri sampi terima kasih nyadika piring ngagai Allah Taala.

Ke Tiga
“Kita sedia deka bedawaka kaban belayan kita empu 
lalu begigaka penyalah sida.
Kita udah ngereja semua utai nya, 
lalu Aku enda bejaku seleka, 
nya alai kita ngumbai Aku baka kita. 
Tang diatu Aku nganu kita lalu nerangka pekara tu ngagai kita.”

SautBeri sampi terima kasih nyadika piring ngagai Allah Taala.

Alleluia / Aklamasi sebedau Injil (peda John 14: 6)

Alleluia, alleluia
Aku tu meh jalai, pemendar, enggau pengidup, ku TUHAN; 
nadai orang ulih datai ngagai Apai enti enda nengah Aku.
Alleluia.

Bacha Injil: Mark 8: 11 - 13

Orang Parisi datai lalu belabuh betalat enggau Jesus, minta Iya ngayanka tanda ari serega, kena sida nguji Iya.

Iya lalu meresu ngesuhka seput, lalu bejaku, “Nama kebuah orang ke rebak diatu minta tanda? Enggau bendar Aku madah ngagai kita, nadai tanda deka diberi ngagai rebak ti diatu!”

Iya lalu ninggalka sida, nepan perau nya baru, lalu ngelayang ke seberai.