19 February 2019 - Hari Dua ba Minggu Ke-enam Musim Selama
Cari Berita

Advertisement

19 February 2019 - Hari Dua ba Minggu Ke-enam Musim Selama

Staf @beritaibanMY
February 19, 2019

Sida lalu berandauka nya enggau pangan diri, “Laban kitai nadai roti.”

Bacha Ke Satu: Pemungkal 6: 5 - 8; 7: 1 - 5, 10

Lebuh TUHAN meda penyai semua orang di dunya tu, enggau runding sida ke seruran jai, Iya ngesal udah ngaga sida lalu ngengkahka sida di dunya tu. 

Iya balat amat ngesalka nya datai ke Iya nyau bejaku, “Aku deka munuh semua mensia ti udah digaga Aku, enggau jelu enggau burung, laban Aku ngesal udah ngaga sida.”

Tang Noah ngelantangka ati TUHAN.

Ku TUHAN bejaku ngagai Noah, “Bai semua kita sebilik tama ngagai bandung nya. Aku nemu, ka semina nuan siku aja dalam dunya tu ti ngereja utai ti ngena.

Bai enggau nuan tujuh pasang ari semua bansa jelu ti tuchi, tang semina sepasang aja ari semua jelu ti enda tuchi.

Bai mega tujuh pasang ari semua bansa burung. Kereja nya, ngambika semua bansa jelu enggau burung deka mengkang idup lalu beranak betelesak baru di dunya tu.

Tujuh hari da agi, Aku deka ngasuh hari ujan 40 hari, 40 malam, kena ngerusak semua utai ti idup, ti udah digaga Aku.”

Noah lalu ngereja semua utai nitihka asuh TUHAN.

Tujuh hari udah bekau nya, bah besai lalu nyadi.

Masmur Entara: Masmur 29: 1 - 2, 3AC - 4, 3B & 9c - 10

Saut (peda 11b): TUHAN deka merekat bala nembiak Iya lalu meri sida pemaik.

Ke Satu
Puji meh TUHAN, kita orang serega.
Puji meh mulia enggau kuasa Iya.
Puji meh nama TUHAN ti bemulia.
Meremi di mua Iya ti kudus lebuh Iya pegari.

Saut: TUHAN deka merekat bala nembiak Iya lalu meri sida pemaik.

Ke Dua
Nyawa TUHAN bisi didinga di tasik
lalu munyi nyawa Iya belauh ba tasik.
Nyawa TUHAN ti bekuasa
sereta bemulia bisi didinga.

SautTUHAN deka merekat bala nembiak Iya lalu meri sida pemaik.

Ke Tiga
Allah Taala ti bemulia bejaku munyi guntur.
semua orang dalam Rumah TUHAN manjung nyebut, “Muliaka Allah Taala!”
TUHAN merintah ai ti dalam.
Iya nyadi Raja belama iya.

SautTUHAN deka merekat bala nembiak Iya lalu meri sida pemaik.

Alleluia / Aklamasi sebedau Injil (peda John 14: 23)

Alleluia, alleluia
Orang ke rinduka Aku deka ngasika pesan Aku, ku TUHAN;
lalu Apai Aku deka rinduka iya,
lalu kami duai Apai deka datai ngagai iya.
Alleluia.

Bacha Injil: Mark 8: 14 - 21

Nyadi sida murid enda ingat mai roti. Sida semina bisi setuku aja dibai sida dalam perau nya.

Lalu Jesus nangkan sida enggau jaku, “Bejimat kita, sereta bejaga ari ragi orang Parisi, enggau ragi Herod.”

Sida lalu berandauka nya enggau pangan diri, “Laban kitai nadai roti.”

Jesus nemu utai ti dikerandauka sida, lalu ku Iya bejaku ngagai sida, “Nama kebuah kita berandauka pasal nadai roti? Kati kita lalu apin nemu tauka mereti? Nama kebuah ati kita kieh?

Kita bisi mata, lalu kita enda meda? Kita bisi pending, lalu kita enda ninga? Kati kita enda ingat?

Lebuh Aku mechahka lima iti tuku roti ke lima ribu iku orang, berapa bakul teda digumpul kita?” “Dua belas,” ku sida nyaut.

“Lalu tujuh iti tuku roti ke empat ribu iku orang, berapa bakul teda digumpul kita?” “Tujuh,” ku sida nyaut.

Iya lalu bejaku ngagai sida, “Lalu kita mengkang enda mereti?”