Header Ads

  • Baru Nyadi

    24 February 2019 - Hari Minggu Ketujuh Musim Selama

    Ku Jesus bejaku ngagai sida murid Iya: “Aku madah ngagai kita ke mending: Rinduka munsuh kita. Kereja utai ti manah ngagai orang ke begedika kita.

    Bacha Ke Satu: 1 Samuel 26: 2, 7 - 9, 12 - 13, 22 - 23

    Saul lalu angkat tekala nya, lalu mansang ngagai menua puang Sip, mai tiga ribu iku bala soldadu ke pemadu kering di menua Israel, ngiga David.

    Nya alai, malam nya David seduai Abisai mansang ngagai kem Saul, lalu nemu Saul tinduk dalam kem nya. Sangkuh iya diunjamka iya ba tanah semak puchuk pala iya; lalu Abner enggau bala soldadu tinduk ngelingi iya.

    Ku Abisai bejaku enggau David, “Allah Taala udah nyerahka munsuh nuan ngagai jari nuan malam tu. Awakka aku ngentumka sangkuh iya empu ngagai iya, sekali aja, enda ibuh ditandu.”

    Tang ku David bejaku ngagai Abisai, “Anang munuh iya, laban TUHAN deka ngukum orang ke ngenataika jari ba raja ti udah dipilih Iya.”

    David lalu ngambi sangkuh, enggau tepayan ai ari semak pala Saul; lalu seduai iya mupuk. Nadai orang meda tauka nemu utai nya udah nyadi, tauka tedani; laban TUHAN udah ngasuh semua sida tinduk jenak magang.

    David lalu meraka ke seberai, lalu bediri ba tuchung bukit, jauh ari Saul.
    Ku David, “Tu sangkuh nuan, Tuan Raja. Asuh siku ari bala nuan mansang kitu, ngambi sangkuh tu.

    TUHAN ngupah genap iku orang ke tetap ati sereta lurus; laban sehari tu TUHAN udah nyerahka nuan ngagai jari aku, tang aku enda ngenataika jari ngagai orang ke udah ditata TUHAN.”

    Masmur Entara: Masmur 103: 1 - 2, 3 - 4, 8 & 10, 12 - 13

    Saut (peda 8a): TUHAN endang kasih sereta rindu.

    Ke Satu
    Puji meh TUHAN, O semengat aku! 
    Semua semengat, roh enggau tubuh aku, 
    puji meh nama Iya ti kudus!
    Semengat aku, puji meh TUHAN, 
    lalu anang enda ingatka penelap Iya.

    Saut: TUHAN endang kasih sereta rindu.

    Ke Dua
    Iya ngampun semua dosa aku 
    lalu ngeraika semua penyakit aku.
    Iya ngelepaska aku ari kubur 
    lalu merekatka aku ngena pengerindu enggau pengasih.

    SautTUHAN endang kasih sereta rindu.

    Ke Tiga
    TUHAN endang kasih sereta rindu, lubah ringat, 
    sereta penuh laban pengerindu ti meruan belama iya.
    Iya enda ngukum kitai nitihka dosa kitai 
    tauka malas kitai nitihka penyai kitai.

    SautTUHAN endang kasih sereta rindu.

    Ke Empat
    Baka timur ti jauh ari barat, 
    baka nya meh penyauh Iya muai dosa kitai.
    Baka apai ke nelap enggau anak diri, 
    baka nya meh TUHAN nelap enggau orang ke nangika Iya.

    SautTUHAN endang kasih sereta rindu.

    Bacha Ke Dua: 1 Korint 15: 45 - 49

    Menyadi:
    Munyi ti ditulis, “Mensia ti keterubah, iya nya Adam, nyadi mensia ke idup”, tang Adam ti penudi nya Roh ti meri pengidup.

    Tang ukai tubuh roh ke dulu datai, tang tubuh dunya, udah nya baru tubuh roh.

    Mensia ti keterubah, ke digaga ari amau, datai ari dunya, tang mensia ti kedua nya datai ari serega.

    Semua orang ke digaga ari amau, sebaka enggau iya ke digaga ari amau, tang orang serega sebaka tubuh enggau orang ke datai ari serega.

    Baka kitai ke sebaka gamal enggau mensia ti digaga ari amau, baka nya mega kitai deka sebaka gamal enggau Orang ke datai ari serega.

    Alleluia / Aklamasi sebedau Injil (peda John 13: 34)

    Alleluia, alleluia
    Aku meri kita pesan ti baru, ku TUHAN; 
    rinduka pangan diri, baka Aku ke udah rinduka kita.
    Alleluia.

    Bacha Injil: Luke 6: 27 - 38

    Ku Jesus bejaku ngagai sida murid Iya: “Aku madah ngagai kita ke mending: Rinduka munsuh kita. Kereja utai ti manah ngagai orang ke begedika kita.

    Berekatka orang ke nyumpah kita, besampika orang ke merinsaka kita.

    Enti orang nampar kuyu kita sepiak, awakka iya mega nampar kuyu kita sepiak. Enti orang ngambi kelambi kita, awakka iya mega ngambi baju kita.

    Beri ngagai semua orang ke minta utai ari kita, lalu lebuh orang ngambi utai kita, anang minta utai nya dipulaika baru.

    Kereja ngagai orang baka ke dikedekaka kita kereja sida ngagai kita.

    Enti kita rinduka orang ke rinduka kita, baka ni ku nya tau nyadika berekat kita? Indah orang ke bedosa deh nemu rinduka orang ke rinduka sida!

    Lalu enti kita manah enggau orang ke manah enggau kita, baka ni ku nya tau nyadika berekat kita? Indah orang ke bedosa deh nemu ngereja nya!

    Enti kita nyali utai semina ngagai orang ke dikarapka ulih mulaika utai nya ngagai kita, baka ni ku nya tau nyadika berekat kita? Indah orang ke bedosa deh nemu nyali utai ngagai pangan diri, lalu ngarapka diri ulih nerima utai nya pulai baru!

    Tang rinduka munsuh kita, lalu kereja utai ti manah ngagai sida. Jali utai ngagai orang, lalu anang ngarapka diri nerima bayar. Nya baru upah kita besai, lalu kita deka nyadi anak Allah Taala ti Pemadu Tinggi; laban Iya manah enggau orang ke enda nemu beterima kasih, sereta enggau orang ke jai.

    Kasihka orang, baka Apai kita ti kasih.

    “Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun.

    Beri, lalu kita deka diberi. Takar ti chukup, ti dienyak, digusak, ti meruap lalu lilih, deka diberi ngagai kita; laban takar ti dikena kita nakar deka dikena nakar utai ke kita.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads