Header Ads

  • Baru Nyadi

    28 February 2019 - Hari Empat ba Minggu Ketujuh Musim Selama

    Ku Jesus bejaku ngagai sida murid Iya: “Laban enggau bendar Aku madah ngagai kita, barang sapa meri kita ai irup ketegal kita nembiak Aku, deka nerima upah.

    Bacha Ke Satu: Sirak 5: 1 - 8

    Anang bepanggai ba pengaya nuan, ngumbai nya aja chukup, lalu enda bepanggai ba utai bukai. 

    Anang nitihka juluk ati nuan taja nuan tulihka utai nya. Anang nitihka peneka pengingin nuan. 

    Anang nyebut, “Nadai orang bekuasa atas aku.” Ila Tuhan tetap deka ngukum nuan. 

    Anang nyebut, “Amat aku udah bedosa, tang Tuhan enda ngukum aku”, laban Tuhan besabar enggau nuan. 

    Anang majak ngaga dosa siti-siti, laban nuan arapka diri tetap diampun Tuhan. 

    Anang nyebut, “Pengasih Tuhan endang besai amat, lalu pemayuh-mayuh dosa aku deka diampun Iya.” Tuhan amat bepengasih, tang Iya mega enggai meda orang bedosa. 

    Berubah jampat ngagai jalai Tuhan, lalu anang nganti-senganti laban pengeringat Iya tau datai sebarang maya ba nuan, lalu nuan deka tusah maya timpuh Iya ngukum nuan. 

    Anang bepangai ba pengaya nuan ti ulih enggau jalai ti enda lurus, laban pengaya nuan nya nadai guna semimit maya nuan kena penusah.

    Masmur Entara: Masmur 1: 1 - 2, 3, 4 & 6

    Saut (peda 40: 4a): Beberekat meh orang ke manggaika pengarap ba TUHAN.

    Ke Satu
    Beberekat meh orang ti enda nitihka penemu orang ke jai, 
    lalu enda nitihka teladan orang ke bedosa 
    ti enda begulai enggau orang ke ngeleseka Allah Taala,
    tang gaga ati ke Adat TUHAN, 
    lalu belematika Adat nya siang malam.

    Saut: Beberekat meh orang ke manggaika pengarap ba TUHAN.

    Ke Dua
    Orang nya baka kayu ti ditanam ba tebing sungai, 
    ti bebuah ninting musin lalu daun iya nadai kala layu. 
    Iya mujur dalam semua utai ti dikereja iya.

    SautBeberekat meh orang ke manggaika pengarap ba TUHAN.

    Ke Tiga
    Tang orang ke jai enda baka nya. 
    Iya baka rumput ti rangkai ti dikebuka ribut.
    Laban TUHAN deka ngintu orang ke lurus, 
    tang jalai pengidup orang ke jai deka dirusak.

    SautBeberekat meh orang ke manggaika pengarap ba TUHAN.

    Alleluia / Aklamasi sebedau Injil (peda 1 Tesalonika 2: 13)

    Alleluia, alleluia
    Terima jaku Allah Taala ukai baka ke nerima jaku mensia, 
    tang laban iya endang amat jaku Allah Taala.
    Alleluia.

    Bacha Injil: Mark 9: 41 - 50

    Ku Jesus bejaku ngagai sida murid Iya: “Laban enggau bendar Aku madah ngagai kita, barang sapa meri kita ai irup ketegal kita nembiak Aku, deka nerima upah.

    “Barang sapa ngasuh siku ari sida ke mit tu, ke arapka Aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik.

    Enti jari nuan mai nuan bedosa, tetak iya! Manah agi nuan tama ngagai pengidup nadai jari sepiak, ari ke bisi dua piak jari, lalu nuan dibuai ngagai neraka ngagai api ti enda nemu padam, alai ulat ti makai sida enda nemu mati, lalu api enda nemu padam.

    Lalu enti kaki nuan mai nuan bedosa, tetak iya! Manah agi nuan tama ngagai pengidup nadai kaki sepiak, ari ke bisi dua piak kaki, lalu nuan dibuai ngagai neraka alai ulat ti makai sida enda nemu mati, lalu api enda nemu padam.

    Lalu enti mata nuan mai nuan bedosa, keruk iya! Manah agi nuan tama ngagai Perintah Allah Taala mai sigi aja leka mata, ari ke bisi dua igi leka mata, lalu nuan dibuai ngagai neraka, alai ulat ti makai sida enda nemu mati, lalu api ti makai sida enda nemu padam.

    “Laban semua orang deka dituchi ngena api, baka piring ti dituchi ngena garam.

    Garam endang manah, tang enti iya nadai agi masin, baka ni ku jalai ngaga iya masin baru? Awakka kita masin baka garam, lalu diau bebaik enggau pangan diri.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads