Header Ads

  • Baru Nyadi

    7 February 2019 - Hari Empat ba Minggu Ke-empat Musim Selama

    Jesus lalu ngangauka sida ke dua belas iku ngagai Iya, lalu ngasuh sida bejalai dua iku sepasang, lalu meri sida kuasa atas roh ti jai.

    7 February 2019 - Hari Empat ba Minggu Ke-empat Musim Selama

    Bacha Ke Satu: Hebrew 12: 18 - 19, 21 - 24

    Menyadi:
    Kita ukai datai ngagai utai ti ulih ditegu, ngagai api ti mau, ngagai mua hari ti petang, tauka ngagai kabut, tauka ngagai munyi terumpit, tauka ngagai nyawa ti bejaku, datai ke sida ke ninga nyawa nya minta nyawa nya badu agi bejaku ngagai sida.

    Utai ti dipeda sida balat amat ngenakut, datai ke Moses empu nyau nyebut, “Aku getar-getar takut!”

    Tang kita udah datai ngagai Bukit Sion, ngagai nengeri Allah Taala ti idup, ngagai nengeri Jerusalem ti di serega, enggau ngagai gempuru beribu-ribu iku melikat serega; ngagai gempuru bala anak tuai ke bisi nama ditulis di serega. Kita udah datai ngagai Allah Taala, Hakim ke semua mensia, enggau ngagai roh orang ke lurus ke udah digaga nyadi pemadu badas, enggau ngagai Jesus, ke nyadi pengari ke sempekat ti baru, enggau ngagai darah ti dipechikka, ti bejaku badas agi ari darah Abel.

    Masmur Entara: Masmur 48: 1 - 2AB, 2CD - 3, 8, 9 - 10

    Saut (peda 9): O Allah Taala, kami belematika pengasih Nuan dalam Rumah Sembiang Nuan.

    Ke Satu
    TUHAN endang besai lalu patut dipuji 
    dalam nengeri Allah Taala kitai, ba bukit Iya ti kudus.
    Sion, bukit Allah Taala, 
    endang tinggi sereta manah.

    SautO Allah Taala, kami belematika pengasih Nuan dalam Rumah Sembiang Nuan.

    Ke Dua
    Nengeri Raja Ti Besai mai pengaga ngagai semua dunya.
    Allah Taala udah nunjukka pengelikun endang bisi ba Iya 
    dalam kuta nengeri nya.

    SautO Allah Taala, kami belematika pengasih Nuan dalam Rumah Sembiang Nuan.

    Ke Tiga
    Kami bisi ninga pasal utai ti udah dikereja Allah Taala, 
    lalu diatu kami udah meda utai nya ba nengeri Allah Taala, 
    TUHAN ti Pemadu Bekuasa. 
    Iya deka ngibun nengeri nya enggau likun belama iya.

    SautO Allah Taala, kami belematika pengasih Nuan dalam Rumah Sembiang Nuan.

    Ke Empat
    Dalam Rumah Sembiang Nuan, O Allah Taala, 
    kami belematika pengerindu Nuan ti meruan belama iya.
    Nuan dipuji orang di semua endur, 
    lalu penampak nama Nuan ngelekai di serata dunya. 
    Nuan merintah enggau lurus.

    Saut: O Allah Taala, kami belematika pengasih Nuan dalam Rumah Sembiang Nuan.

    Alleluia / Aklamasi sebedau Injil (peda Mark 1: 15)

    Alleluia, alleluia
    Perintah Allah Taala nyau semak! 
    Nesal ati ke dosa kita, lalu arapka Berita Manah!
    Alleluia.

    Bacha Injil: Mark 6: 7 - 13

    Jesus lalu ngangauka sida ke dua belas iku ngagai Iya, lalu ngasuh sida bejalai dua iku sepasang, lalu meri sida kuasa atas roh ti jai.

    Iya enda nyagi sida mai utai lebuh sida bejalai, semina tungkat aja: enda mai roti, kandi, duit dalam belulang sida, tang semina ngena selipar, lalu enda tau mai baju kena besilih.

    Ku Iya bejaku ngagai sida, “Lebuh kita tama ngagai rumah orang, diau dia nyentuk ngagai maya kita mupuk ari endur nya.

    Enti orang dia enggai nerima kita lalu enggai mendingka kita, tesai abus  ari kaki kita lebuh kita mupuk ari endur nya, nyadika saksi kena ngelaban sida.”

    Sida mupuk, lalu madahka semua orang enda tau enda nesal ati ke dosa sida.

    Lalu sida muru mayuh antu, lalu nata mayuh orang ke sakit ngena minyak, lalu ngeraika sida.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads