ANGUS: Tujuh sebilik semina tinggal gari ba tubuh
Cari Berita

Advertisement

ANGUS: Tujuh sebilik semina tinggal gari ba tubuh

Chief Editor | Berita Iban MY
February 16, 2019

Api benung mau ba palan penusah angus ke nyadi.

KUCHING: Tujuh sebilik semina tinggal gari ba tubuh pengudah rumah ke diuan sida iya ba Kampung Sungai Apong di Jalai Pending, angus lemai tu tadi.

Penusah angus nya nyadi urung jam 3.35 lemai nya, udah nganguska rumah dua tingkat, 85 peratus.

Komander Operasyen ari Balai Bomba enggau Penyelamat (BBP) Tabuan Jaya, Faizal Saari, madahka raban bomba bisi nerima ripot bekaul penusah angus ke nyadi urung jam 3.37 lemai.

Ku iya, Berindik ari nya, lapan raban bomba lalu berumban ngesah ke palan penusah angus ke nyadi ngambika ulih bejalaika operasyen madamka api. 

“Sebelas raban bomba ari BBP Padungan, mega bisi datai mantu bejalaika operasyen madamka api.

“Lebuh datai ba palan penusah angus ke nyadi, ketuai operasyen bomba ngeripotka api benung mau nganguska rumah nya sebedau sida iya belabuh bejalaika operasyen,” ku iya lebuh ke dirandau pengarang berita sehari tu. 

Faizal ngelansa, semua bala ke ngibun rumah nya sempat pansut enggau nyelamatka diri ari rumah nya. 

Ku iya, nadai penusah bakal enggau bebadi nyawa diripotka ba palan penusah angus ke nyadi.

“Kebuah penusah angus nyadi enggau penyampau pengerugi agi dipansik. Operasyen tembu urung jam 4.50 lemai,” tandu iya.