Header Ads

  • Baru Nyadi

    EKSIDEN: Siku lelaki bebadi nyawa, siku indu bakal

    BA PALAN EKSIDEN KE NYADI: Pendiau motosikal ke ditepan "mansa" pengudah kena lantak Hilux.

    LAWAS: Siku deriba motosikal bebadi nyawa, tang siku pelajar indu bakal pengudah kena lantak kerita Hilux di Jalai Lawas Damit, Kampung Batu Mulong, tengah malam tadi, Hari Dua. 

    Eksiden nyadi urung jam 12 tengah malam nya ngejung ke siku lelaki (mansa), Lois Jabli, 26 taun, penatai ari Kampung Tang Itong bebadi nyawa ba palan eksiden ke nyadi.

    Ketuai Opis Tasat enggau Penguasa Trafik Sarawak, Superintenden Alexson Naga Chabu, madahka eksiden nyadi dipechayaka ketegal pengilap siku deriba kerita Hilux.

    Ku iya, asil pansik tumu, kerita Hilux nya enda mukai-mukai tama ke jalai ngelaban arus lalu belantak enggau motosikal ke ditepan "mansa". Dempa pemalat eksiden nya, ngejung ke "mansa" tepelanting enggau diripotka balat bakal. 

    “Ba eksiden ke sama kerita Hilux nya mega ngelantak siku indu ke benung duduk ba langkau penganti bas ba tisi jalai nya,” ku iya lebuh ke dirandau pengarang berita sehari tu tadi.

    Alexson ngelansa, deriba Hilux nya diripotka selamat tauka nadai bakal ba sebarang alai endur tubuh.

    Ku iya, bangkai tauka tubuh "mansa" pengudah nya dianjung ke Sepital Lawas kena bejalaika pengawa silik agi.

    “Indu ke bakal nya mega dianjung ke Sepital ke sama ngambika ulih diperubatka enggau silik agi.

    “Kes nya dipansik ari baruh 'Seksyen 41 (1) Akta Pengangkutan Jalan 1987',” ku iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads